افضل دواء للانزلاق الغضروفي القطني

ناس كتيرة ممكن تاخد ادوية عشان تعالج بيها الانزلاق الغضروفي القطني وتخف ، وناس تانية ممكن ما تحسش بأى تحسن بعد الأدوية دي.

وفي ناس ممكن تعمل التردد الحرارى للغضروف و حقن لجذور الاعصاب وتتحسن ، وناس تانية ممكن تعمله وتتحسن لفترة بسيطة وبعدها بيلاقوا ان آلام الانزلاق الغضروفي القطني رجعت مرة تانية ، و ممكن الألم يكون اقوى من المرة اللي قبلها وتقدر تسمع الفيديو ده عشان تعرف ليه ممكن تحس بالالم بعد ما عملت حقن وتردد حراري  

، طيب اي هى ,أسباب فشل عملية التردد الحراري ؟ وأسباب فشل العلاج الدوائي؟

1 - إن الوجع اللى انت حاسس بيه مش بسبب الانزلاق الغضروفي القطني
ودي مشكلة ممكن تحصل لناس كثيرة جدا و سببها أن المريض من الاول اتشخص غلط ، وده لان فى اكتر من مشكله ممكن تعملك أعراض عرق النسا زي :

• التهاب مفصل الحوض الحرقفي
• خشونة المفاصل الجار فقارية
• متلازمة العضلة الكمثرية 
  

فلو كان التشخيص من الأول خطأ ممكن المريض يفضل ياخد في أدوية كتيرة وهو مش محتاجها وكمان مش بتعالج المشكلة الأساسية اللي عنده و ده بيخليه يفضل حاسس بالوجع .

2 - ان المريض يكون فعلا عنده انزلاق غضروفي قطني ، و هو مش عارف درجة الانزلاق الغضروفي القطني اللي عنده
ودي تعتبر واحدة من أكبر الأسباب اللى ممكن تخلى المريض ما يحسش بأى تحسن بالعلاج أو بالتردد الحراري.
فلازم تعرف اي هي درجات الانزلاق الغضروفي القطني ، لأن كل درجة ليها أعراض مختلقة وكمان بيكون ليها طريقه علاج مختلفة . 

فمثلا لو المريض عنده انزلاق غضروفي قطني من الدرجة الرابعة و قعد يجرب في أدوية الانزلاق الغضروفي القطني
وكمان بيجرب التردد الحراري للغضروف و حقن جذور الاعصاب ، فالمريض ده مش هيحس بتحسن لان اللي محتاجة فعلا هو عملية استئصال الانزلاق الغضروفي القطني ، لإن ساعتها العصب بيكون مضغوط جدا و عامل زي الورقه فصعب جدا انه يستفيد من الأدوية أو التردد الحراري و حقن جذور الاعصاب في الحالة دي .

والعكس صحيح ممكن مريض الانزلاق الغضروفي القطني يكون من الدرجة الأولى ، بس عنده أعراض شديدة فيفكر انه محتاج التردد الحراري ، وهو كل اللي محتاجة خطة علاج صحيحة فيها علاج دوائي وعلاج طبيعي صحيح ، فعشان كده مهم جدا تعرف الغضروف اللى عندك من اى درجة قبل ما تبدأ تاخد اى علاج .
3 - ان المريض يكون داخل على مرحلة الخطر ولسه بيجرب في العلاجات التحفظية واللي هو محتاجة فعلا عملية جراحية، وبيكون خايف من فكرة عملية استئصال الانزلاق الغضروفي القطني وانها ممكن تسبب الشلل ،وتقدر تتأكد وتعرف معلومات اكتر كم الفيديو ده 

طيب تعالوا نعرف بكل بساطة اي المفروض تعمله عشان تتعالج صح من الاول :

1- التشخيص الصحيح مع دكتور متخصص
2- اتباع التعليمات اللي هيقولهالنا الدكتور المتخصص
3- والالتزام بالأدوية او طريقة العلاج اللي هيحددهالنا الدكتور سواء كانت أدوية أو عملية أو علاج طبيعي لأن كل حالة بتكون مختلفة عن التانية وبتكون طريقة علاجها مختلفة .

في النهاية انا كجراح عمود فقري بنصحك انك تتأكد من اختيارك للدكتور اللي هيكون مسئول عن حالتك ، عشان التشخيص يكون صح و يعرف سبب الالم اللى بتحس بيه ، و يكون قادر انه يحددلك خطة العلاج المناسبة ليك