دكتور علي القاضي > الخدمات > متى تعود لحياتك الطبيعية بعد عملية تثبيت الفقرات القطنية ؟
تصفح جميع الخدمات
الانزلاق الغضروفي العنقي
ضيق الفقرات القطنية
تزحزح الفقرات
الإنزلاق الغضروفي القطني
مفصل الحوض الحرقفي
عرق النسا
بعد عملية تثبيت الفقرات القطنية، المريض مش محتاج يفضل في السرير شهور زي ما البعض فاكر، لكنه يقدر يتحرك ويدخل الحمام بعد ما يفوق من البنج بساعات ولو التزم بالعلاج الطبيعي، هيقدر يوطي ويصلي بعد فتره بسيطة من العملية . وأول يومين بعد العملية بيكون في متابعة لحاله المريض علي حسب نوع العملية، وألم الجرح بيكون بسيط مقارنة بالألم اللي كان بيعاني منه قبلها بسبب تزحزح الفقرات , وكمان بعد العملية يقدر يمشي في البيت لكن مش بيقدر يرجع للشغل علطول ودا علي حسب طبيعه شغله . و بعد شهرين تقريبًا ومع العلاج الطبيعي، بيبدأ يرجع لحياته الطبيعية ، وبعد 6 شهور المفروض يكون رجع لحياته بالكامل. ومضاعفات عملية تثبيت الفقرات قليلة لكن لو حصلت زي التهاب الجرح أو تسرب السائل النخاعي، بيتم التعامل معاها بسرعة. المهم إن يكون في ثقة بين المريض والجراح، لأن أي مشكلة ليها حل لو اتلحقت بدري.
Your browser does not support HTML5 video.
اولا في اسطوره ان العيان بتاع تثبيت الفقرات محتاج يقعد في السرير من 3 ل 6 شهور ودي مش حقيقه نهائيا العيان اللي عمل تثبيت للفقرات القطنيه بيقدر يتمشى ويخش الحمام اول ما يفوق البنج , اللي هو ساعتين تلاته اربعه مع بداية ان هو يبتدي يشرب وياكل يقدر يتمشى ويخش الحمام. النقطه التانيه او الاسطوره التانيه بتاع انا مش هقدر اوطي لو انا عملت تثبيت فقرات لو انت عملت علاج طبيعي صحيح بعد العمليه هتقدر توطي وتصلي وتعمل كل حاجه بدون اي مشاكل
بعد عملية التثبيت اول حاجه العيان اول ما بيفوق بيتمشي بيخش الحمام , لازم نطمن عليه في الحته دي ممكن في خلال 24 ساعه و 48 ساعه على حسب كل جراح بيحب العيان يبقى قاعد قد ايه في المستشفى وعلى حسب كبر العملية نفسها وعلى حسب اللي حصل جوا العملية وده اللي الجراح بيبقى عارفه مش حد تاني. وانا عاده بخلي العيان يفضل في المستشفي 24 ساعه , الا لو انا قلقان او محتاج اتابع حاجه معينه بخليه يقعد 48 ساعه , او مثلا لو انا عملت العمليه بخليه يقعد 36 ساعه بحيث ان انا ابقى مطمن عليها واشيل له الدرنقه , بحيث لو في اي بواقي دم او حاجه ما تتجمعش عنده في الجرح.
عيان التثبيت عكس عيان الغضروف, عيان التثبيت هيقدر يقعد , يقدر يقف , يقدر يتمشى , يقدر ينام على الجنب اللي هو عاوزه , مفيش اي مشاكل خالص , بيبقى في شويه الام مكان الجرح مقارنة بالام اللي قبل العمليه , ما قبل العملية العيان اللي عامل تثبيت فقرات ده غالبا عنده تزحزح في الفقرات , و 90 ٪ من اللي بيعملوا تثبيت بيبقى عندهم تزحزح في الفقرات , وآلام تزحزح الفقرات بتبقى اصعب بكتير من آلام بتاع المسامير لكن في شوية الام في الجرح لا تقارن بالام ما قبل العملية . النقطه التانية بيبقى في شويه الام في مفصل الحوض بالذات لو هو كان قاعد موطي الفترة الأخيرة ما قبل العملية من كتر ما هو مثلا ساب نفسه. الناس اللي بتسيب نفسها 5 و 10 و 15سنه ودول بنشوفهم كتير , المريض بيفضل سايب نفسه لحد لما ضهره بيبتدي يتعدل ويبتدي يحمل على المفاصل بالطريقة الصحيحة وعضلاته , بيجي له شويه الام ودي بنعالجها بالعلاج الدوائي وشويه كمان لما نيجي نعمل له علاج طبيعي الامور دي بتتحسن . الفترة الاولانيه بعد التثبيت زي ما احنا قولنا قبل كده في الغضروف بتبقى اول 14 يوم , الجرح بيتغير عليه يوم اه ويوم لا وددا بيحصل من خلال تعليمات معينة احنا بنعرفها للمريض , بيبقى في متابعة للجرح مع المساعدين وانا بكون متابع عشان لو في اي مشاكل في الجرح سواء تسريب او اي التهاب عشان نعرف نتعامل معاه اول باول. الفترة الاولانيه المريض يقدر يتمشى ويقعد في البيت لكن ميقدرش ينزل الشغل , ممكن استنى عليه من 10 ايام لاسبوعين عشان نقدر نرجعه الشغل . و ممكن العيانين اللي بيعملوا تثبيت دول يبقى حابين يشيلوا تقيل بعد العملية , والشيل في حالات التثبيت بيبقى اسرع من حالات الغضروف , لكن احنا مش بنبتدي في الشيل التقيل غير لما نعمل العلاج الطبيعي , اللي هو عادة بعد العملية بياخد من شهر ونص او شهرين على الأقل , و قبل كده يقدر يشيل بس يشيل حاجات خفيفه ميشيلش اوزان تقيلة . الفترة الاولانيه خلصت اللي هي اول 14 يوم اللي هو احنا بنطمن على الجرح , بنقدر ناكل ونشرب في الفتره دي اي حاجه زي ما قولنا لكن من المهم نقلل السجاير او ياريت نبطلها , لانها بتبقى مؤذيه جدا للجرح , لانها ممكن تسبب التهاب الجرح وكمان بتصعب التئامه , ومهم جدا ان احنا نبقى مظبطين السكر , عشان ما يحصلش التهاب في الجرح . ولو انت عندك مشاكل او امراض روماتيزمية أو العيانيين اللي عندهم بالذات روماتويد بيبقى عندهم نسبة تزحزح فقرات اعلى , ولازم يبقى في ادويه معينه بيمشي عليها المريض دا قبل العمليه واثناء العمليه و كمان بعد العملية , وانا بالذات ما بعملش عمليات غير لما اكون متابع مع دكاترة الأمراض الروماتيزمية , وبكتب زي خطه علاجية كامله للعيان ده , عشان العيان ده مختلف عن باقي العيانين . بعد ما العيان بيجي لي بعد 14 يوم واطمن ان الجرح خلاص التأم بنظبط له العلاجات بتاعته , بنقلل له المضادات الحيوية بنبتدي نديله شويه فيتامينات لو عنده بواقي الام بنبتدي ندي له حاجه تقلل الالم شويه بنبتدي نعمل معاه علاج طبيعي بعد أسبوعين , كمان بعد العلاج الطبيعي اللي هو بعد 12 جلسة او 24 جلسه اللي هي المرحلة التانية يعني الأسبوعين اللي بعد العملية علطول هي المرحلة الاولانيه اما المرحلة التانيه من اسبوعين لغاية شهر ونص اللي بنبتدي نعمل فيها العلاج الطبيعي وده على حسب استجابة كل مريض وحسب العيان عمل العمليه بعد فتره قد ايه من تعبه , بنبتدي نرجعه لحياته الطبيعية واحده واحده . بعديها بيبقى في متابعة تانيه بعد 3شهور وبعد 6 شهور وبعد سنه , والمتابعه بعد6 شهور بتبقى مهمه جدا بالنسبالى لان العضلات بتاع العيان المفروض رجعت لطبيعتها أو رجعت بنسبة ٨٠ ٪ , والعيان رجع لحياته بالذات لو عيان بيشيل تقيل يقدر يرجع لحياته طبعا , اما لو ست بيت وبتشتغل في بيتها و الكلام ده كله ممكن نقدر نرجعها لحياتها الطبيعية بعد شهرين او شهرين ونص حسب برضو استجابتها للعلاج الطبيعي وفي نقطه مهمه جدا لازم أكد عليها ان العيان اللي بيعمل عملية بعد ما عرف انه محتاج عمليه بعد سنه او سنتين , غير العيان اللي بيعمل العمليه بعد ما بيعرف ان هو محتاج عمليه بعد 10 سنين و15 سنه , لان احنا عملنا عمليات للناس دي وعملنا العملية للناس دي., الاستجابة للرجوع لحياته الطبيعية بتبقى اسرع كل ما يتحرك في خطوات في شفائه اسرع , وطبعا احنا بنتكلم في كل ده على العيانين اللي امورهم مشيت كويس بنسبة 90% فيما فوق. أما بعد الشر لو في اي مضاعفات بنتعامل معاها على حسب اي هي المضاعفات , لو تسرب السائل النخاعي بندي له علاج معين و بيلبس حزام بيستنى عليه لحد ما الدنيا تهدى , لو عنده التهاب في الجرح الشرائح والمسامير بنبتدي ندي له مضادات حيوية ونعمله مزرعة , لانه للاسف الشديد لو التهاب الجرح زاد , وده بيبقى نسبه من 2 ل 3% ممكن نحتاج نشيل المسامير بالذات لو البكتيريا بقت على المسامير والشرايح . برضو مش عايزين نخوف العيانين دي حاجه نسبتها مش عاليه , وبتعتمد بنسبة كبيرة على تعقيم المستشفى ونضافتها وتعقيم الجراحين فتره العمليه قد ايه , ولو في اي نزيف بنشوف العيان بيشرب سجاير ولا لا ، السكر بتاعه متظبط ولا لا . فاحنا ما نقعدش نخاف من حته المضاعفات دي , بس نكون فاهمين ان في كل حاجه ليها ترتيبات وليها حلول مش معنى انك انت عندك مشكله انها ملهاش حل , ولازم يكون في ثقة مابين العيان وما بين الجراح حتى لو حصل نسبة مضاعفات , وانها واردة لأي جراح في الدنيا من اشطر جراح لاكتر جراح متوسط لازم تبقى واثق من الجراح اللي انت استأمنته ان هو يعرف يتعامل معاه المشكله دي. لو عندك اي استفسار عن عمليات تثبيت الفقرات القطنية تقدر تتواصل معانا من خلال رسائل الصفحه او علي الواتساب 01000120118 دكتور علي يسري القاضي استشاري ومدرس المخ والاعصاب والعمود الفقري بجامعة القاهرة
