امتى تحتاج عملية الانزلاق الغضروفي القطني؟ 

امتى تحتاج عملية الانزلاق الغضروفي القطني؟ 

مريض الإنزلاق الغضروفي القطني اول ما بيسمع كلمة عملية بتبدأ تجيله حالة من الرعب والخوف ، وبيقعد يدور على أي علاج بديل عشان يتجنب العملية الجراحية ،زي كي الغضروف وشفط الغضروف و تبخير الغضروف ، و زي شد الفقرات أوفي بعض المرض بيعملوا حاجه اسمها علاج الغضروف بالعصا واللي بيكون ليها تأثير سلبي جدا على المريض وبتزيد من مشكله الغضروف .

و كل العلاجات دي مريض الانزلاق الغضروفي القطني بيتجه ليها عشان يتجنب موضوع العملية ، ، طيب عشان انت من حقك تفهم خليني اقولك معلومة مهمه جدا عن عملية الانزلاق الغضروفي القطني .
إن عملية الإنزلاق الغضروفي القطني مش هتعمل شلل ، اللي هيعمل شلل أن المريض يستنى على حالته بدون علاج صحيح ، لان وقتها هتبدأ الاعراض اللى عنده تزيد ويبقى ليها مضاعفات خطيرة جدا وساعتها التدخل الجراحي هيكون هو الحل الوحيد ليه، ومش هينفع معاه لا علاج دوائي ولا علاج طبيعي ولا تردد حراري .

وهتعرف كل المعلومات عن امتى هتحتاج عملية الانزلاق الغضروفي القطني وازاى نلحق نفسنا ونحاول اننا منتاخرش فى العلاج من الفيديو دا

فلو انت مريض انزلاق غضروفي قطني وجربت كل طرق العلاج التانية زي العلاج الطبيعي و العلاج الدوائي ومجابتش معاك نتيجة ، وبدأ يبقى عندك اعراض زي سقوط القدم , ضعف في التحكم في البول والبراز وخايف من العملية و بتأجل خطوة انك تعملها فنسبة أن يحصلك ضعف في الحركة دائم وعدم تحكم في البول والبراز دائم بتكون من 10 الى 15 % ، و هو دا الشلل اللي المريض خايف منه اصلا ، وساعتها حتى لو عملت عملية الانزلاق الغضروفي القطني نسبة رجوعك لحياتك الطبيعية وان رجلك تبدأ تتحرك تاني او تتحكم في البول والبراز بتقل جدا .

و فى النهاية عاوز اوضحلك ان عملية الانزلاق الغضروفي القطني هي أسهل عملية ممكن تعملها في العمود الفقري وأن عملية استئصال الغضروف القطني بالميكروسكوب أو بالمنظار الجراحي فهي أساس جراحات العمود الفقري، وأن نسبة نجاحها من 93 الي 95%.

وخليك عارف ان خوفك من أن العملية ممكن تعملك شلل او إنك تطلع على كرسي متحرك دي نسبتها اقل من نص فالمية من مية، و لو قارنها مع نسبة المضاعفات اللي هتحصل لو معملتش العملية فهي من 10 ل 15% .
وتقدر تتأكد اكتر من الفيديو ده

عشان كدا دايما بنقول إنك لازم تعرف أي هو الصح وتفكر فيه بعقلك مش بمشاعرك ، نسبة المضاعفات لو قررت إنك متعملش العملية بتكون عالية جدا وبتكون أكثر من قرار إنك تعملها ، ونسبة أن يحصلك عجز بتزيد كل ما بتسيب الانزلاق الغضروفي القطني ضاغط على العصب لفترة أطول .

فبلاش نخلي الخوف يتحكم فينا ويتحكم في القرارات الصح اللي ممكن نعملها عشان نعيش حياة طبيعية من غير أي ألم.