ما الفرق بين الانزلاق الغضروفي و الانزلاق الفقاري ؟

ما الفرق بين الانزلاق الغضروفي و الانزلاق الفقاري ؟

في ناس كتير متعرفش الفرق ما بين تزحزح الفقرات والانزلاق الغضروفي وبيفتكروا انهم مرض واحد في العمود الفقري , لكن في الحقيقة هم مشكلتين مختلفين عن بعضهم في الاعراض والاسباب وكمان العلاج , فتعالوا نعرف سوا اي الفرق بين الانزلاق الغضروفي وانزلاق الفقرات

نبدء بالانزلاق الغضروفي :
وعشان نفهمه اكتر لازم نعرف ان العمود الفقري عبارة عن فقرات فوق بعضها وكل فقرة والتانية بيكون بينها غضروف ، ومشكلة الانزلاق الغضروفي بتحصل في الغضاريف دي بسبب ان المادة الجيلاتينية اللي جوا الغضاريف دي خرجت لبرا , يعني الانزلاق الغضروفي هو تحرك للمادة الجيلاتينة اللي موجودة جوا الغضروف برا الحلقات الليفية اللي موجوده حواليها  

طيب ايه هى درجات الانزلاق الغضروفي؟

درجات الانزلاق الغضروفي عبارة عن 4 درجات :

1. الدرجة الأولى : هي انتفاخ الغضروف ، وهنا المادة الجيلاتينية بدأت تتحرك من مكانها بشكل بسيط بس لسه الانزلاق ملمسش العصب ولا سببله ضرر
2. الدرجة التانية : هي بروز الغضروف ، و في الدرجة دي الماده الجيلاتينيه بتتحرك اكتر وبتضغط على حلقة الغضروف الليفية ، ومن هنا بيبدأ المريض انه يحس ببعض الآلام في ضهره او رجله.
3. الدرجة التالتة : هي خروج الغضروف ، وهنا الحلقات الليفية بتتقطع بشكل كامل والمريض بيحس بآلام صعبه جدا في رجله نتيجة الضغط على الأعصاب .
4. الدرجة الرابعة : هي انفجار الغضروف ، ودي هي أخطر درجات الانزلاق الغضروفى وده لان الماده الجيلاتينيه بتكون خرجت برا الغضروف بشكل كلي ووصلت للأعصاب و هنا المريض بيحس بألم كبير جدا والأعراض هتكون واصلة لمرحلة الخطورة.

طيب ايه هي أعراض الانزلاق الغضروفي ؟

• ألم في أسفل الضهر ,الم و تنميل وشكشكة في الرجل , هنحس بنار أو سيخ ماشي في رجل واحدة أو الرجلين من اول الفخد لغاية صوابع الرجل ( الام عرق النسا )
• أما بالنسبة للأعراض الخطيرة للانزلاق الغضروفي :
• سقوط نسبي أو كلي في القدم واللي هي اننا منبقاش قادرين اننا نرفع مشط رجلنا من على الارض و احنا ماشين
• صعوبة أو عدم تحكم فى البول أو البراز
• ضعف الاحساس بمنطقة معينه في الجسم

وتقدر تعرف تفاصيل اكتر عن اعراض الانزلاق الغضروفي من الفيديو دا مع دكتور علي يسري القاضي

كدا عرفنا الانزلاق الغضروفي , تعالوا نعرف سوا مشكلة تزحزح الفقرات؟

احنا قولنا ان العمود الفقري عبارة عن فقرات فوق بعضها وبين الفقرات دي في غضاريف , مشكلة تزحزح الفقرات بقي عبارة عن تحرك الفقرات ذات نفسها مش الغضاريف اللي بين الفقرات ، والفقرات وهي بتتحرك ممكن انها تسحب الغضروف معاها وتعمل انزلاق غضروفي نتيجة الضغط اللي حصل على الغضروف , وممكن الفقرة تتحرك لقدام او لورا نتيجة ان العضمه اللي اللي بتكون ماسكة الفقرة مفيهاش ثبات .

طيب ايه هي درجات تزحزح الفقرات؟

درجات تزحزح الفقرات عباره عن 5 درجات والدرجة هنا نقصد بها نسبة تحرك الفقرة نفسها من مكانها الطبيعي
الدرجة الاولى: بتحصل لما الفقرات بتتحرك من مكانها بنسبة 25% واللي بيكون عبارة عن حركة بسيطة بين الفقرتين ودي أقل درجة من درجات الإنزلاق ودا أكثر نوع شائع بين الحالات.
الدرجة التانية: تحرك الفقرة بيزيد شوية عن أول درجة فبيبقى التحرك من 25% ل 50%.
الدرجة التالتة:بيبدأ الانزلاق الفقارى يدخل في مرحلة الخطورة وبيكون من 50% ل 75%.
الدرجة الرابعة : التزحزح بيكون من 75% ل 100% ، دا معناه ان الفقرة بعدت جدا عن مكانها.
الدرجة الخامسة : هي أخطر درجة لان نسبة التزحزح تكون زادت عن 100% وتكون الفقرة بعدت تماما عن باقي الفقرات
وتقدر تعرف معلومات اكتر عن درجات التزحزح من مقال درجات تزحزح الفقرات القطنية

طيب اي أعراض تزحزح الفقرات؟ 

• وجع اسفل الضهر شديد جدا نتيجة لعدم ثبات أو حركة غير طبيعية في فقرة من فقرات العمود الفقري ودا عكس الانزلاق الغضروفي اللي بيعمل الم في الرجل.
• آلام كبيرة جدا مع المشي والحركة وخصوصا لما نكون قاعدين وبنيجي نقف او لما نكون واقفين ونبدأ اننا نمشي
• ألم في الرجلين وتنميل وتخدير نتيجة الضغط على الحبل الشوكي وعلى جذور الأعصاب
• ضعف العضلات نتيجة تزحزح الفقرات وده بيخلينا نحس اننا مش قادرين نعمل أي نشاط بدني

وتقدر تفهم اكتر عن تزحزح الفقرات لما تسمع الفيديو دا مع دكتور علي يسري القاضي

وتعالوا دلوقت نعرف : ازاي بنعالج التزحزح الفقاري والانزلاق الغضروفي :
نبدأ بعلاج تزحزح الفقرات :

في الاول لازم نكون عارفين ان علاج 99 % من تزحزح الفقرات من الدرجه الاولى والتانيه هو العملية لكن احنا لازم نبدء مع المريض بالعلاج التحفظي الي عباره عن علاج دوائي وعلاج طبيعي لانه ممكن يتحسن عليه
واحنا بنفضل التدخل الجراحي لعلاج تزحزح الفقرات ودا لانها بتنهي علي المشكلة نهائيا , وبتكون عباره عن عملية تثبيت الفقرات عن طريق الشرايح والمسامير.

وبالنسبه لعلاج الانزلاق الغضروفي :
بنبدء مع المريض خطه علاج كامله , الخطه دي بتبدأ بالعلاج التحفظي ( علاج دوائي , علاج طبيعي ) لو المريض متحسنش ,بنعمل حقن وتردد حراري عشان نسكن الالم , ولو الاجراء دا المريض متحسنش عليه , اخر حاجه بنلجأ ليها هي العملية ودا افضل حل لعلاج الانزلاق الغضروفي خصوصا في الدرجات المتقدمة من الانزلاق الغضروفي لاننا هنقضي علي المشكلة من جذورها مش هنسكن الالم بس .

وتقدر تعرف تفاصيل اكتر عن ازاي تعالج الانزلاق الغضروفي من الفيديو دا مع دكتور علي يسري القاضي  

وبكده نكون عرفنا أي هو الفرق بين تزحزح الفقرات والانزلاق الغضروفي القطني وعرفت كل تفاصيلهم،

ولو عندك اي استفسار عن طرق علاج أي مشكلة في العمود الفقري تقدر تتواصل معانا على رسايل الصفحة او من خلال الواتساب 01000120118