دكتور علي القاضي > من حقك تفهم > العمود الفقري
امتى تحتاج عملية الانزلاق الغضروفي القطني؟
ليه ممكن الم الانزلاق الغضروفي القطني يرجع تاني بعد العلاج الدوائي والتردد الحراري ؟
عملية استئصال الغضروف القطني بالميكروسكوب
الفرق بين عملية الانزلاق الغضروفي القطني بالميكروسكوب وبالمنظار
الم في الرجل بعد عملية الانزلاق الغضروفي القطني
هل عملية الانزلاق الغضروفي خطيرة؟
هل الشرائح والمسامير لازم تتشال بعد عملية تثبيت الفقرات القطنية
العمود الفقري هو اساس حياتنا لانك متقدرش تمشي من غيره ولا تلعب وتجري وتقف من غيره , كل خطوه بتمشيها انت محتاج عمودك الفقري , دا غير انه بيمثل درع الحماية لحاجه مهمه جدا وهي الحبل الشوكي ، والحبل الشوكي بيكون موجود جوا العمود الفقري , وهنتكلم سوا عن اهميه الحبل الشوكي والعمود الفقري في جسمنا
العمود الفقري عبارة عن مجموعة من الفقرات اللي بتكون مرصوصة فوق بعض زي السلم بالضبط ، والعمود الفقري ده بيبدأ من بعد الجمجمة على طول و بيوصل لحد منطقة الحوض ، و بتكون من 33 فقرة ، و بين كل فقره و التانية بيكون فى حاجة اسمها الغضروف ، و اللى بتكون وظيفته انه يبعد الفقرتين عن بعض وده بيخلى الفقرات متحتكش ببعضها ، ده غير ان الغضروف بيدى مرونة للعمود الفقرى وقت الحركة . زي ما قولنا العمود الفقري بيتكون من فقرات , والفقرات دي متقسمه الي 5 مجموعات , وهي
وتعالو دلوقتى نمسك كل جزء ونتكلم عليه بشكل مفصل أكتر :
الفقرات العنقية أو cervical vertebrae ، ودي ببساطة جدا هي الرقبة و بيرمز للفقرات العنقية بحرف (C) ، وبيكونوا عبارة عن 7 فقرات من أول c1 لغاية c7 ، والفقرات العنقية بتبدأ من آخر الراس لغاية بداية الكتف ، والفقرات العنقية تعتبر من أكثر فقرات العمود الفقري حركة و مرونة و كل فقرة من الفقرات العنقية بيكون ليها اسم ووظيفة فالفقرة الاولى اللي هي C1 واسمها الأطلس و ده لفظ يونانى معناه الحامل و ده بيدل على وظيفة الفقره دى وانها بتشيل أو بتحمل الجمجمه .
اما الفقرة التانية C2 و دى بنسميها المحور و دى بتكون متعشقة في الفقرة الاولى عشان الفقرة دي هي اللي بتخلينا نحرك راسنا يمين وشمال . ومن C3 لحد C6 دول بيكونوا مجموعه مع بعض و اسمها الفقرات النمطية ، ووظيفتها انها تحمي شريان اسمه الشريان العنقى وكمان بتحافظ على حركة الرقبة. و الفقرة الأخيرة اللي هي C7 و دى اسمها الفقرة الاستثنائية و دى مهمتها انها تربط الفقرات العنقية بالفقرات الصدرية اللي هي بعد الفقرات العنقية على طول . الفقرات العنقيه بيخرج منها (8 أزواج من الأعصاب ) ، و الاعصاب دى هى اللى بتكون مسؤوله عن انها تنقل الأوامر و الاحساس من وإلى الدماغ للذراعين .
الفقرات الصدرية أو Thoracic Vertebrae ، الفقرات دى بنمزلها بالحرف (T) بيكون عددهم 12 فقرة (من T1 لـحد T12) ، و الفقرات دى بتاخد¾ مساحة العمود الفقرى و بتبدأ من اول الضهر لغاية منطقة الضلوع ، و الفقرات الصدرية بتساعد الضلوع فى حماية الاعضاء اللى موجوده فى القفص الصدرى ، ده غير ان الفقرات دى هى اللى بتساعد للأضلاع انها تتحرك عشان نقدر نتنفس.
الفقرات القطنية أو Lumbar vertebrae والحرف اللي بنرمز بيه للفقرات القطنية هو حرف(L) و بيكون عددها 5 فقرات (منL1 لـحد L5) ، والفقرات القطنية بتكون موجوده بعد الفقرات الصدرية و لحد آخر الضهر و هى اللي بتوصل بين الضهر والحوض والرجلين ، والفقرات دي تعتبر من اكبر فقرات العمود الفقرى ، وده من حكمة ربنا لان الفقرات القطنية هي اكثر فقرات بتتعرض للضغط و بتشيل وزن العمود الفقري كله ، وده اللى بيخلى الفقرات القطنية تكون معرضة للأصابه اكتر عن باقى فقرات العمود الفقرى
الفقرات العجزية أو sacral vertebrae و الفقرات دي بيرمز ليها بالحرف (S) ، بتتكون من 5 فقرات (من S1 لـ S5) و فقرات العجز بتكون موجودة بعد الفقرات القطنية ، و وظيفتها انها تربط العمود الفقري بالحوض دة غير انها بتغطى الحوض و بتحمى الاعضاء اللى فيه و الفقرات العجزية بتبدأ تتكون وقت نمو الجنين فى رحم الأم ، و لما بنوصل لمرحلة البلوغ بتبدأ الفقرات دى تلتحم ببعضها ، وتبقى عظمة واحدة كبيره .
وده عبارة عن عضم صغير جدا مكانه بيكون موجود بعد عظام العجز ، فى اخر العمود الفقرى وبيتكون العصعص من 3 او 6 فقرات بيكونوا ملتحمين مع بعض ، والالتحام ده بيحصل بعد سن البلوغ ، و وظيفة الفقرات العصعصية انها بتساعد الجسم على التوازن وقت ما بنيجي نقعد. و عضم العصعص دى تعتبر من الفقرات اللى حركتها قليله جدا ، فالفقرات دى مش بتتحرك لو مشينا او وقفنا لفتره ، و الحالة الوحيده اللى بتتحرك فيها عظمة العصعص هى وقت القعدة و حركتها بتكون بسيطه جدا مش اكتر من 20 درجة.
و هنا لازم نعرف حاجة ان بالرغم من ان فقرات العصعص من الفقرات اللى حركتها بتكون بسيطة جدا ، لكنها من اكتر الفقرات اللى بتكون معرضة للأصابه ، و السبب فى ده ان عظم العصعص مش بيكون حواليه اي عظم عشان يحميه من اي اصابة ، فلو وقعنا عليه مثلا ممكن ده يضر بعظم العصعص و يسببلنا الم شديد جدا ، و اكتر ناس اللي بتكون معرضه لالام العصعص هما السيدات و ده بسبب الحمل و الولاده وكمان اللي بيكونوا معرضين لآلام العصعص هما اللى بيقعدوا لفترات طويله بدون حركة ، لإن كل ده بيعمل اجهاد كبير جدا على العصعص. و دلوقتى بعد ما عرفنا كل حاجة عن فقرات العمود الفقرى تعالوا نتكلم دلوقتى عن حاجة مهمة جدا و هى
الحبل الشوكي هو عبارة عن مجموعة من الأعصاب وزي ما قلنا ان الحبل الشوكي بيوصل لـ ¾ العمود الفقرى و بيكون موجود جوا العمود الفقري تحديدا في قناه اسمها القناة الشوكية ، والقناة دي حجمها بيكون مختلف ، يعني في الفقرات العنقية حجمها بيكون كبير جدا وبيبدأ حجمها يقل ويكون أصغر في باقي الفقرات ، و مهمة الحبل الشوكى انه بيكون مسؤول أنه ينقل الإشارات العصبية من الدماغ لمنطقة معينة في الجسم ومن المنطقة دي للدماغ ، أما الربع الأخير من العمود الفقري فبيكون فيه مجموعة من الأعصاب اسمها ذيل الفرس و دى اللى بتكون مسؤوله عن نقل الاشارات العصبية من الدماغ للرجلين. وهنتكلم بشكل مفصل أكثر عن اهمية الحبل الشوكي في مقال بعنوان ليه الحبل الشوكي مهم والكدمه فيه ممكن تعمل ايه ؟ ودلوقتي خلينا نتكلم عن أي هي المشاكل اللي ممكن انها تحصل في العمود الفقري ، و اللي هتأثر على الفقرات او الغضاريف او الحبل الشوكي و هتعمل الم في الضهر سواء في الرقبة أو نهاية الضهر مشاكل العمود الفقري : 1- الانزلاق الغضروفي العنقي 2- الانزلاق الغضروفي القطني 3- الكسور 4- ضيق القناة العصبية القطنية 5- تزحزح الفقرات القطنية 6- الزيادات العظمية وبكدا نكون عرفنا كل حاجه عن عمودنا الفقري واهميته الكبيره في حياتنا و اي هي أغلب أمراض العمود الفقري اللي ممكن انها تسبب لك آلام أسفل الضهر أو آلام الرقبة ، واكيد كل مشكلة مهم جدا انها تتعالج بدري ومع دكتور متخصص في العمود الفقري عشان تتعالج صح وتقدر ترجع لحياتك الطبيعية في أسرع وقت .
