يعني ايه غضروف؟

كثير من الناس اللي عندها مشكلة الانزلاق الغضروفي دايما تسأل عن الغضروف وتفكر ، هي المشكلة في الغضروف ده ممكن تعمل أعراض مؤلمة جدا زي دي ؟ لدرجة ان مشكلة الانزلاق الغضروفي ممكن تعمل صعوبة كبيرة جدا في المشي لا قدر الله توصل لشلل!

طيب ليه كل دا بيحصل والغضروف بيتكون من ايه ؟ تعالو بقا نعرف كل دا في مقال النهاردة ، وخلونا اول حاجه نتكلم عن 

أي هو الغضروف ؟

الغضروف عبارة عن نسيج مرن بس في نفس الوقت قوي، والغضاريف بتكون موجودة في أماكن كثيرة في الجسم زي

• الاذنين والانف
• نهايات الأضلاع
• الركبتين والكاحلين
• نهايات العظام الطويلة
• أنابيب الشعب الهوائية
• بين فقرات العمود الفقري

والنهاردة بشكل أساسي هنتكلم عن الغضاريف اللي بتكون موجودة في العمود الفقري ، وبعد ما عرفنا ايه هو الغضروف وبيكون موجود فين  تعالو دلوقتي نعرف بكل بساطة  هو الغضروف اصلا  بيتكون من ايه ؟

الغضاريف في العمود الفقري بتكون بين كل فقرة والتانية ، و بيتكون بشكل أساسي من جزئين:

• الجزء الأول اللي هي المادة الهلامية أو الجيلاتينة اللي بتكون موجودة في نص الغضروف ووظيفتها انها تمتص الصدمات اللي بتحصل مع الحركة
• أم الجزء التاني هو الحلقة الليفية : واللي بتحاوط المادة الجيلاتينية و مش بتخليها تتحرك من مكانها ولا يحصل أي تسرب للمادة دي.

وهنا في معلومات مهمة لازم نعرفها :

1- الغضروف مش يحتوى على اى اوعية دموية ولا اعصاب ولا أوعية ليمفاوية ، وده بيكون سبب فى ان نمو الغضاريف يكون بطيء مع اى اصابه ، لإن مفيش اي اوعيه دمويه عشان تغذيه.

2- من مكونات الغضاريف هي الماية واللي بتكون موجودة بنسبة من 65 ل 80% في الغضروف .

طيب تعالوا دلوقتي نعرف ايه هي وظيفة الغضروف بشكل عام ؟

1. الغضروف بيكون ليه عدة مهام ومن مهامه الأساسية أنه بيمنع احتكاك العضم او فقرات العمود الفقري ببعضها عشان الغضروف بيفصل بين العظمة والتانية ،وكمان الغضروف نفسه بيكون عامل زي المخدة فبيسمح للفقرات انه ينزلق فوق بعضه وبكده بيمنع عنها الأذى والتلف.
2. الغضروف بيكون مسؤول أنه يمتص الصدمات اللي بتحصل بين فقرات العمود الفقري علشان يحمي العظام مع الحركة.
3. بيساعد المفاصل على انها تحافظ على شكلها مع الحركة وبكدا مش هيحصلها تآكل .
4. من مهام الغضروف كمان انه بيساعد على حماية نهاية الأطراف الطويلة في الجسم .
5. الغضروف بيساعد في تكوين بعض أجزاء الجسم زي الجزء الخارجي من الأذن ، وكمان بيكون موجود في مناطق معينة في الجسم زي القفص الصدري ، والغضاريف فيه بتساعد في عملية الشهيق والزفير بحيث انها بتسمح للعظام في القفص الصدري انها تتحرك مع عملية التنفس.
6. وكمان الغضاريف بتساعد في دعم وزن الجسم عند الجري أو الحركة، يعني حتى في ابسط الحركات الغضاريف اللي في الجسم بتساعدنا اننا نعملها.

بعد ما عرفنا أهمية الغضاريف في الجسم تعالوا نعرف بقى ايه هو ليه ممكن يحصل اصابة في غضاريف العمود الفقري

1. ممكن يحصل بسبب الإصابات زي وقت ممارسة الرياضة أو حوادث المرور.
2. قلة الحركة كمان من الاسباب المهمه لانها هتعمل ضعف في عضلات العمود الفقري وبالتالي هتأثر على الغضاريف .
3. السمنة المفرطة ، و ده لانها بتسبب ضغط كبير على الغضاريف و العمود الفقرى .
4. التقدم في العمر ، عشان كل ما كبرنا في العمر كل ما مرونة الغضاريف بتقل فبيكون عندها احتمالية اكبر انها تتصاب.
5. التدخين لإنه بيساعد في تقليل كمية الاوكسجين اللي بتروح للغضروف فبتخليه عرضة أكثر للإصابة.

ومن أشهر المشاكل اللي بتحصل للغضاريف في العمود الفقري هي الإنزلاق الغضروفي وتحديدا الإنزلاق الغضروفي القطني ، عشان كدا مهم جدا اننا نحافظ على صحة عمودنا الفقري وناخد بالنا من أننا 

1. نمارس الرياضة اللى بتقوى العضلات ، لان تقويه العضلات بتقلل من الضغط على الضهر والغضاريف .
2. نتجنب اننا نتني ضهرنا وقت القعدة ، و كمان نتجنب اننا نقعد لفترات طويلة .
3. نبعد عن شيل الأوزان الثقيلة ولو شيلناها فتكون بالطريقة الصح ونكون فاردين ضهرنا .
4. الانتباه على الوزن ، لأن زيادة الوزن بتسبب ضغط على العمود الفقرى .
5. نحاول اننا لو بنجخن فنبعد عن التدخين على قد ما نقدر .

في النهاية اتمنى تكونوا استفدتوا من مقال النهاردة وعرفتوا ايه هي أهمية الغضاريف في جسمنا وإن الإصابة فيها بتكون مؤلمة جدا ، ولو عايزين تعرفوا أكثر عن المشاكل اللي في العمود الفقري تقدروا تضغطوا  هنا و هتعرفوا كل حاجه بالتفصيل عن مشاكل العمود الفقري.