ما هي أسباب فشل عملية تثبيت الفقرات

ما هي أسباب فشل عملية تثبيت الفقرات

مريض تزحزح الفقرات بعد ما كان خايف من عملية تزحزح الفقرات ذات نفسها بدء انه يخاف من فشل العملية , او انه يتعب اكتر بعد ما يعملها , وطبعا دا كلام سمعه من ناس حواليه , عشان كدا بدء يسئل هل فعلا عملية تثبيت الفقرات ممكن تفشل ؟ تعالوا نعرف سوا اسباب فشل عملية تثبيت الفقرات

تأجيل العملية لفتره كبيرة

في البداية كدا لازم نعرف ان ممكن يكون اول سبب في فشل عمليتك هو انت , طب ازاي ؟ لان انت لو ساكت علي المك بقالك سنين ومأجل عملية تزحزح الفقرات بسبب خوفك منها , الفتره اللي انت مستحملها دي , بيكون الفقرات ضغطت علي العصب بشكل كبير جدا ودا اللي بسببلك إحساس بالتنميل في رجلك , وبعد كدا الضغط الكبير دا بيخلي العصب يتلف

فانت لو عملت العملية بعد ما حصل تلف في العصب اكيد العصب دا مش هيرجع زي الاول تاني , هو اه مش هيكون بنفس احساس الالم قبل العملية , لكن هو خلاص تلف فدا الي بيخلي نسبه نجاح العملية متكنش عاليه , ودا برضو اللي بيخلي لسه عندك اعراض بعد العملية بس طبعا اقل بكتير من قبل العملية . 

عدم الالتزام بالتعليمات

وبرضو من اسباب فشل العملية هو عدم التزامك بالتعليمات بعد عملية تزحزح الفقرات زي

• رجعت تشيل حاجات تقيلة بعد العملية علطول .
• معملتش جلسات علاج طبيعي بعد العملية عشان تقوي عضلات ضهرك
• محاولتش تنزل من وزنك لو كان زايد ومأثر علي عمودك الفقري او كان هو اصلا سبب التزحزح عندك من البداية
• ملتزمتش بالراحة بعد العملية وعملت مجهود بدني كبير او لعبت رياضه عنيفه
• شيلت اوزان تقيلة , وشيل الاوزان التقيله في الوقت دا غلط جدا لان المفروض عضلات ضهرك ضعيفه , فلو شيلت حاجات تقيله الضغط هيكون علي عموك الفقري وعلي الشرايح والمسامير اللي مركبها , فممكن يحصلها كسر في اي وقت

والاسباب دي سهل جدا انها ترجعلنا التزحزح تاني وتفشل العملية ويبقي سبب فشلها برضو انت .

العملية مع غير متخصص

ومن اسباب فشل العملية , انك تعمل العملية مع غير متخصص , يعني مش متخصص في العمود الفقري اوالمخ والاعصاب , وطبعا انت لو عملت كدا هتضمن من اول دقيقة ان عمليتك فاشله لان كل مرض له دكتوره المتخصص اللي يقدر يتعامل معاه ويضمن نجاح علاجه

التشخيص الغلط

التشخيص الغلط بيأثر على نجاح العملية , لان لو انت اتشخصت عندك تزحزح فقاري في فقره واحدة وعملت العملية , وبعد العملية حسيت بالالم جديد تاني , واكتشفت ان عندك تزحزح في فقرات تانية متعملتش , فدا بيكون بسبب ان التشخيص مكنش صح من البداية  

خبره الجراح

خبرة الجراح , ايوا انت ممكن تختار متخصص في العمود الفقري لكنه معندوش خبره في عمليات تزحزح الفقرات وبالتالي نسبه نجاح عمليتك هتكون ضعيفه بعكس لو كانت عمليتك مع دكتور متخصص وعنده خبره كبيرة

طب هتعرف ازاي ان عملية تثبيت الفقرات فشلت ؟

هنلاحظ ان الالم اللي احنا كنا رايحين نعالجه لسه موجود زي ما هو , الم شديد اسفل الضهر , تنميل وشكشكة في الرجل ( الام عرق النسا )

طيب تعمل اي عشان تتجنب فشل عمليتك ؟

• لازم نعمل العملية في اسرع وقت ممكن اول ما الدكتور يحددهالنا عشان نلحق العصب قبل ما يتلف
• لازم نرتاح كويس جدا بعد العملية ومنتسرعش في إننا نتحرك ونعمل حركات مجهدة .
• نحافظ على المشي كل يوم بشكل منتظم عشان نقوي عضلات الضهر .
• نتجنب اننا نشيل اوزان ثقيلة .
• نتجنب القعدة لفترة طويلة في وضعية ثابتة ونحاول اننا كل نص ساعه نغير الوضعية أو نقوم ونتحرك حركة خفيفة

ومن هنا بنكون وصلنا لآخر نقطة وهي اعرف منين ان عملية تثبيت الفقرات نجحت ؟

• اننا نحس بتحسن يوم عن التاني بعد العملية .
• اننا نحس ان قوة عضلاتنا بتزيد اكثر مع الوقت .
• التنميل في الرجل بدء أنه يقل او اي اعراض كنا بنحس بيها قبل العملية بدأت تقل .
• مفيش اي التهابات حصلت مكان الجرح .
• اننا بنلاقي نفسنا بنرجع لحياتنا الطبيعية أسرع .

وانا ك دكتور متخصص في جراحة العمود الفقري فاهم كويس جدا اللي انت بتحس بيه والمخاوف اللي انت بتحس بيها عشان تاخد قرار عملية تثبيت الفقرات ، واحب اطمنك إن نجاح عملية تثبيت الفقرات مضمون طالما التشخيص هيكون صح وطالما هتلتزم بالتعليمات بعد العملية