علاج تزحزح الفقرات القطنية

علاج تزحزح الفقرات القطنية

الم تزحزح الفقرات اكيد صعب وخصوصا لو كنت من درجات التزحزح المتقدمة (الدرجة الرابعة أو الخامسة ) بس أكيد لكل مرض علاج بس المهم ان يكون العلاج ده صح من البدايه عشان تخف وترجع لحياتك الطبيعية في اسرع وقت ممكن , لكن عشان يكون العلاج صح لازم يكون التشخيص كمان صح , فتعالي نعرف ازاي بنشخص مريض تزحزح الفقرات القطنيه ,

تشخيص تزحزح الفقرات القطنية

اول واهم حاجه في التشخيص هي شكوي المريض , بنسمع المريض بيشتكي من اي بالظبط وكمان الالم فين بالتحديد , ونسئله عن طبيعة شغله و روتين يومه وبعد كدا ندخل في الجزء الخاص بالاشاعات عشان نعرف مكان تزحزح الفقرة بدقه ونشوف نسبة التزحزح قد اي بالظبط
وبعد كدا ممكن نطلب اشاعات زي  

• الأشعة السينية (X ray) : عشان نقدر نشوف الفقرات بشكل واضح
• التصوير بالرنين المغناطيسي (MRI) الرنين بيساعدنا اننا نشوف الأنسجة اللي حوالين الفقرات زي الغضاريف وبتساعدنا في اننا نعرف هل فيه مشاكل تانية ولا لا ومهم جدا ان الرنين ميكنش عدى عليه أكتر من 6 شهور
• أشعة ديناميكية بالحركة عشان يساعدنا من اننا نشوف التزحزح ونتأكد اكثر من ان مفيش اي مشاكل تانية

بعد ما نخلص من مرحله التشخيص ونتأكد ان ده تزحزح في الفقرات مش مشكلة تانية ونشوف نسبه التزحزح و نحدد طريقة العلاج المناسبه

علاج تزحزح الفقرات بيتحدد علي حسب نسبة تحرك الفقرة او درجتها , فلو كان المريض عنده تزحزح من الدرجة الاولي او التانية في الحاله دي هنمشي علي العلاج التحفظي ( العلاج الطبيعي و العلاج الدوائي )

والعلاج الطبيعي لازم يكون مع دكتور علاج طبيعي متخصص في العمود الفقري , والعلاج بيبقي عباره عن تمارين بيعملها المريض في البيت , الدكتور بيقوله عليها , و تمارين هيعملها الدكتور للمريض , ونخلي بالنا بلاش اجهزه شد الفقرات في علاج تزحزح الفقرات لان دا هيعمل مشاكل كبيرة و هيزود من مشكلة التزحزح 

أما العلاج الدوائي بيكون عبارة عن مضادات للالتهاب ومسكنات وأدوية للاعصاب وتقوية العضلات , والمريض مينفعش ياخد علاج من نفسه عشان ميحصلوش اي مضاعفات تأذيه

والمريض بيمشي علي العلاج الطبيعي والدوائي لمده من 6 أسابيع , ولو مفيش استجابه للعلاج ولسه حاسس بالالم , في الحاله دي ممكن نلجأ للإجراءات محدودة التدخل : اللي هي الحقن والتردد الحراري ودول بنستخدمهم عشان نسكن الالم , وميزتهم ان الاجراء مش بياخد اكتر من نص ساعه , والمريض بيروح على بيته في نفس اليوم , وكمان نسبة نجاحها عاليه بتوصل ل 90 %

بس لو كان المريض من درجات تزحزح الفقرات المتقدمة ( الدرجة الرابعة او الخامسة ) وبدأت تظهر عليه أعراض خطيرة زي سقوط القدم وعدم التحكم في البول والبراز , في الحاله دي لازم نتدخل جراحيا في اسرع وقت قبل ما يحصل شلل دائم لقدر الله

والجراحة دي بتكون عبارة عن تثبيت الفقرات عن طريق شرايح ومسامير عشان نقدر اننا نثبت الفقرة دي في مكانها ، وكتير من المرضي بيفكروا ان بعد عملية التثبيت هيكون صعب نتحرك بس في الحقيقة دا غلط , لأننا بنقدر نتحرك بعد ما بنعمل تثبيت الفقرات بشكل افضل من الطبيعي وتثبيت الفقرات مش هيمنعك عن الحركة ابدا

ولو عاوز تعرف تفاصيل اكتر عن امتي تلجأ لعملية تزحزح الفقرات ممكن تشوف الفيديو دا مع دكتور علي يسري القاضي  

وفي النهاية لازم نفتكر ان مشكلة تزحزح الفقرات القطنية مشكلة مش بسيطة وممكن تأثر بشكل كبير علي حركتك وحياتك اليومية وعلشان كدا مهم جدا ان لما نحس بالاعراض ودي ممكن تعرفها من هنا اعراض تزحزح الفقرات واسبابها لازم تروح لدكتور متخصص في جراحة العمود الفقري وتتعالج صح من البداية .