علاج الانزلاق الغضروفي القطني من الدرجة الأولى والتانية

ا​الانزلاق الغضروفي القطني من اشهر مشاكل العمود الفقري ، بس عشان نقدر نعالج الانزلاق الغضروفى صح و نرتاح من الالم ، لازم نكون عارفين درجة الانزلاق الغضروفى القطني اللى عندنا ،
لأن درجة الانزلاق هى اللى بتحدد طريقة العلاج ، و تعالوا النهارده نعرف ازاى بنعالج درجات الانزلاق الغضروفي القطني اللي من الدرجة الأولى والتانية
بس خلونا الأول نعرف أي هي الأعراض اللي هيحس بيها المريض في الدرجات الأولى والتانية ، عشان انت كمان تكون قادر تحدد انت عند اي درجة ,

أعراض الانزلاق الغضروفي القطني من الدرجة الاولى او التانية

• المريض بييحس بوجع في الرجل كلها من اول المقعدة لغاية صوابع الرجل ودي بنسميها آلام عرق النسا
  
• وكمان ممكن يحس المريض بحرقان او شكشكة او لسعة في الرجل،  
  

كل الآلام دي هتخلي المريض مش قادر انه يمارس يومه بشكل طبيعي سواءا في شغله او في حياته الطبيعية،
و هنا خلينى اقولك حاجة ان الانزلاق القطني اللي من الدرجة الأولى والتانية تقدر انك تخف منه بشكل نهائي من غير لا شفط للغضروف ولا تبخير للغضروف ولا حتى عملية جراحية. 

الانزلاق الغضروفي القطني اللي من الدرجة الأولى والتانية يعتبر من أسهل وأبسط الانزلاقات الغضروفية اللي بنقدر نعالجها نهائيا بالأدوية والعلاج الطبيعي الصحيح ، و90% من حالات الانزلاق الغضروفي من الدرجة الاولى  والتانية هينفع معاهم العلاج الدوائي والعلاج الطبيعي.
تقدر تعرف معلومات اكتر من الفيديو دا 

طيب ولو كان الانزلاق الغضروفي القطني البسيط دا عامل أعراض شديدة هل هتحتاج انك تعمل عملية ؟ تقدروا تعرفوا الاجابة مع الدكتور علي يسري القاضي

طيب أي هو بقي علاج الانزلاق الغضروفي القطني من الدرجة الأولى والتانية؟ 

1. علاج دوائي.
2. علاج طبيعي.
3. حقن لجذور الاعصاب 
4. التردد الحراري. 

بس لازم ناخد بالنا من كام نقطة مهة جدا:

اول حاجة هي انك تكون متأكد انك بتعالج مشكلة الإنزلاق الغضروفي القطني فعلا، لان انت ممكن يكون عندك مشكلة التهاب المفصل العجزي الحرقفي ، او تضخم في المفاصل الجار فقارية ، أو متلازمة العضلة الكمثرية، والمشاكل دي هتعملك نفس اعراض الانزلاق الغضروفي القطني بالضبط وده بنعرفه عن طريق التشخيص الصحيح مع دكتور متخصص قادر انه يعرف فعلا أي هو سبب الألم اللي عندك.

2- لو طلع فعلا عندك انزلاق غضروفي قطني مينفعش تاخد اي علاج دوائي عشان تعالجه لان كل حالة بتختلف عن التانية، لان العلاج الدوائي مش بيكون مجرد مسكنات بس او مضاد التهابات بس، الدوا بيكون عبارة عن خطة علاج كاملة مخصصة ليك انت ، وبتكون عبارة عن مسكنات وباسط للعضلات ومضاد للالتهاب بنسب معينة عشان تساعد جسمك انه يتعود على الغضروف القطني.

3- بعد اسبوعين من العلاج الدوائي هتبدأ انك تحس بتحسن ، فبنبدأ ساعتها إننا نعمل علاج طبيعي، ليه؟

عشان نقوي عضلات الظهر ونساعد جسمك انه يتعود على وجود الغضروف بدون اي الم،
و هنا لازم ناخد بالنا من حاجة مهمة وهي مينفعش اي دكتور علاج الطبيعي يعملك الجلسات ، لازم يكون دكتور العلاج الطبيعي متخصص في علاج حالات الانزلاق الغضروفي ، و ده لان العلاج الطبيعي الصح هو العلاج اليدوي مش مجرد أجهزة وبس ، وده مش بيعمله غير دكتور علاج طبيعي متخصص في علاج الانزلاق الغضروفي القطني .

4- واخر حاجة لازم تكون عارفها و انت بتقرر تعالج الانزلاق الغضروفى ان التردد الحراري وحقن جذور الأعصاب مش بنقدر اننا نستخدمه فى علاج كل حالات الغضروف القطني بشكل عام ، إنما بنستخدمه فى حالات معينة بس.

ودا على عكس اللي بيحصل دلوقتي ، اللي هو ان مريض الانزلاق الغضروفي القطني بقي يروح يعمل حقن وتردد حراري بدون استشارة طبية صحيحة من دكتور متخصص في جراحة العمود الفقري ، عشان يرتاح و يخلص من الالم اللى حاسس بيه بس خليك عارف ان ده مش صح ، لان لازم دكتور متخصص في جراحة العمود الفقري هو اللى يحددلك :

• اى هو العلاج المناسب ليك،
• و هل انت فعلا هتستفاد من الحقن و التردد الحراري فعلا ولا لأ ،
• وامتى ممكن تعمل شفط للغضروف او كي للغضروف او تبخير للغضروف
•  وامتى يكون حلك الوحيد هو انك تعمل عملية جراحية .  

طيب يا دكتور أي هي حالات الانزلاق الغضروفي القطني اللي بينفع معاها الحقن والتردد الحرارى؟

1. اللي عنده انزلاق غضروفي قطني من الدرجة الأولى والتانية وبدأ علاج دوائي وعلاج طبيعي وفيه تحسن بس مش تحسن كبير
2. لو مريض الانزلاق الغضروفي القطني بدأ علاج طبيعي بس لسه عنده آلام مش مساعداه انه يعمل العلاج الطبيعي، فساعتها بنعمل التردد الحرارى عشان نقدر نسكن الألم شوية ويقدر المريض انه يكمل جلسات العلاج الطبيعي.
3. لو المريض محسش بأى تحسن بعد العلاج الدوائي ، وحابب انه يجرب التردد الحراري كحل أخير قبل العملية الجراحية .
   

غير كدا فالتردد الحرارى لعلاج الانزلاق الغضروفي القطني مش هيساعد المريض ابدا في انه يتحسن من الغضروف القطني، وفي خلال فترة الآلام كلها هترجعله مرة تانية واحتمال كمان ان المشكلة تدخل في مرحلة الخطورة والمريض مش حاسس، ودا عشان الحقن و التردد الحراري مش علاج، الحقن والتردد الحرارى عبارة عن مسكن قوي شوية مش أكثر

فى النهاية خلينى اقولك ان انت اللى فى ايدك تختار انك تكون من 99 % اللى هيتعالجوا من الانزلاق الغضروفى القطني بالأدوية و العلاج الطبيعى ، و انت اللى ممكن توصل نفسك لانك لازم تعمل عملية ، عشان ترتاح من الوجع اللى انت حاسس بيه
فبلاش تتأخر فى خطوة الكشف و بداية العلاج و اللى لازم يكون مع دكتور متخصص عشان تضمن انك فعلا بتتعالج صح