دكتور علي القاضي > الخدمات > تزحزح الفقرات القطنية
تصفح جميع الخدمات
الانزلاق الغضروفي العنقي
ضيق الفقرات القطنية
تزحزح الفقرات
الإنزلاق الغضروفي القطني
مفصل الحوض الحرقفي
عرق النسا
لو انت مريض انزلاق غضروفي فاكيد سمعت عن العلاج بالعصايا , وممكن ناس جربته وقالتلك انه فعلا علاج سحري وانهم مش بيشتكوا من اي الم بعد ما اتعالجوا بالعصايا , فتعالي كدا نعرف سوا هو اي علاج الانزلاق الغضروفي بالعصايا وهو فعلا له فايدة ولا لا هنبدء نفهم الاول :
هي جلسات بيعملها شخص غير متخصص بيستخدم عصايا او اداة صغيره شبه الشاكوش كدا علي المكان اللي بيشتكي منه المريض , كل اللي بيعمله انه بيمشي العصايا علي ضهر المريض بس بشكل عنيف , او بيستخدم الاداة اللي شبه الشاكوش ويضرب عليها .
وطبعا انت بتثق فيه عشان هو بيقولك انه عارف ان الانزلاق عندك في الفقره التالته والرابعة , او الرابعه والخامسة ومعني كدا انه حد بيفهم فعلا وقدر يحدد هو الانزلاق فين , بس الحقيقة ان اغلب حالات الانزلاق الغضروفي بتكون في الفقرات دي ( الفقرة التالته والرابعة , الفقرة الرابعة والخامسة ) ودي حاجه معروفه
لما بيمشي العصايا بشكل عنيف علي عمودك الفقري او ممكن يدخل العصايا بين الفقرات , فهو بيبعد الفقرات عن بعضها وبالتالي الضغط علي الغضروف هيقل والمريض هيحس بالراحه وانه حاسس فعلا انه بيتعالج من الانزلاق طيب هو فعلا في استفادة من جلسات العصايا دي ؟
بعد الجلسات دي في مريض بيحس انه خف خلاص ودا بسبب ان الفقرة اتحركت من مكانها وبعدت عن الغضروف فمبقاش في ضغط علي الغضروف وهو كدا بقي مرتاح لكنه ميعرفش ان بقي عنده فقره متحركة مش في مكانها السليم ودي مشكلة تانية خالص غير الانزلاق اللي عنده . وفي مريض تاني بقي بيحس انه تعب اكتر بعد الجلسات دي , ودا لان الشخص وهو بيحرك الفقرات بالعصايا , الفقرة ضغطت علي العصب اكتر , ما هو في حاجتين هيحصلوا لو الفقرة اتحركت اما هتضغط علي العصب اكتر ودا هيبقي من حسن حظ المريض لانه هيحس بآلام شديدة بس , لكن بقي لو الفقرة ضغطت علي الحبل الشوكي هتسببله شلل , فبدل مكان رايح يعالج انزلاق بالعصايا بقي عنده شلل دائم وفي مريض تالت عنده انزلاق غضروفي في الناحية الشمال والشخص ده اقنعه انه في الناحية اليمين وبدء معاه الجلسات بالعصايه لحد ما حصله تلخلخ في الفقرات وبدل ما كان عنده غضروف واحد بقي عنده اكتر من انزلاق غضروفي وكمان تلخلخ في الفقرات وآلام شديدة جدا تفوق آلام الانزلاق اللي كان عنده قبل الجلسات وفي مرضي تانيين ممكن يحصلهم كسور في فقرات العمود الفقري ,شروخ في الفقرات بسبب الجلسات بالعصايا فاكيد بعد اللي قرأته دا لازم تعرف إجابة السؤال هو أن العلاج بالعصايا مفهوش اي افادة ليك هو هيضرك بس وتقدر تشوف الحالة دي وعن تجربتها مع العلاج بالعصايا من هنا:
طبعا انا عارف انك عاوز تروح تعمل الجلسات بالعصايا عشان خوفك من العملية , بس انت ممكن متحتاجش العملية طالما انت لسه مجربتش الخطة الكامله لعلاج الانزلاق الغضروفي اللي بتبدء بالعلاج التحفظي اللي هو ( العلاج الدوائي والعلاج الطبيعي ) والادوية مش بس بتكون مسكنات بس او باسطات عضلات بس لا دي بتكون عبارة عن مجموعة من الأدوية من المسكنات وباسطات عضلات ومضادات التهابات و بجرعات محدودة ومعينة للمريض وبتكون لفترة اسبوعين وبعدها بنبدأ علاج طبيعي لتقوية عضلات الضهر وتأهيل العمود الفقري ,والعلاج الطبيعي بيكون مع دكتور علاج طبيعي متخصص في العمود الفقري بس . ولو انت منفعش معاك العلاج الطبيعي او العلاج الدوائي ولسه حاسس بالالم هنتنقل للخطوة التانية في خطة العلاج وهي طرق التدخل المحدود زي حقن جذور الاعصاب والتردد الحرارى ودا بينفع لحالات معينة , وبيكون عباره عن حقن او تردد حراري لجدر العصب فبنقلل الالم اللي حاسس بيه اما لو انت لسه بتعاني من اعراض الانزلاق الغضروفي وبدات تدخل في الاعراض الخطيرة ساعتها حلك هو العملية ومتقلقش دلوقت في عمليات محدودة التدخل عن طريق الميكروسكوب أو المنظار .العمليات من النوع دا بتاخد معانا من ساعه لساعه ونص بالكثير وبفتحات صغيرة جدا والمريض كمان بيقدر يرجع بيته في نفس اليوم بعد كام ساعه من الاجراء وتقدروا تعرفوا عنها اكثر من مقال الفرق بين عملية الانزلاق الغضروفي القطني بالميكروسكوب وبالمنظار . المهم ان لازم علاجك يكون مع دكتور متخصص في جراحة العمود الفقري مش اي تخصص تاني ومتعرضش نفسك لاي مخاطرة سواء كان علاج بالعصايا او غيره , حافظ علي عمود الفقري وعالجه صح من البداية .
