التردد الحرارى لعلاج الألم

التردد الحرارى لعلاج الألم

لأي حد بيعاني من وجع الضهر لازم يكون فكر في الطريقة دي من طرق العلاج لأنها اولا مش تدخل جراحي وكمان بتوقف وجع الظهر ، والطريقة دي هي التردد الحراري ، و تعالو نعرف مع بعض كل معلومة تخص التردد الحراري وتعالوا نعرف أول حاجه

اي هو جهاز التردد الحراري ؟

هو جهاز بيطلع موجات كهرومغناطيسية ، وظيفة الموجات دى انها تقلل من التهاب الأعصاب اللى اتضررت بسبب انه حصلها ضغط يعني ببساطة كدا الموجات دي عامله زي المسكن ، والتردد الحراري بيكون ليه نوعين :

• تردد الحراري نابض : ودى ترددات بنعالج بيها جذور الاعصاب الحسيه(المسؤولة انها تخلينا نحس بأعراض زي التنميل والشكشكة والحرقان) ، ومبنقربش للأعصاب الحركية(المسؤولة انها تخلينا نحس بأعراض زي الضعف في الإيد أو الرجل ) زى عصب عرق النسا ، و اقصى درجة حرارة ممكن توصلها الموجات دى هى 42 درجة و بكده عمر العصب ما هيتضرر ولا الترددات دى هتأثر على وظيفة العصب أو على الحركة بتاعتنا
• اما النوع التانى من الترددات اسمها التردد الحرارى الكلاسيكي ، وده بنستخدمه لعلاج الجذور الحسية (وبنستخدمه للمفاصل زي المفاصل الجار فقرية و مفصل الحوض الحرقفي و مشاكل الغضروف الهلالي بالركبة) ، و مش بنستخدمه فى علاج الانزلاق الغضروفي في العمود الفقري ، و بتوصل درجة حرارته ل 80 درجة ، والترددات دى بنستخدمها عشان نوقف وظيفة العصب تماما و يتوقف عن نقل الإحساس بالألم زى فكره تمويت عصب الأسنان.

وتعالو نفهم مع بعض ازاى بنعمل إجراء التردد الحرارى ؟

بنبدأ ان المريض بيكون نايم على بطنه و بيكون متثبت فوقه جهاز اشعة تداخلية عشان نكون شايفين كويس فقرات العمود الفقري و الأعصاب ، و بعد ما نكون عقمنا المنطقه اللى فيها الفقرة اللى حصل فيها المشكلة زي الانزلاق الغضروفى القطني مثلا و خدرنها بمخدر موضعى ، بنبدأ اننا ندخل ابره رفيعه جدا (زى الكانيولا) جنب العصب اللى فيه المشكله .
و بنبدأ ندى حقنة صبغة فى الكانيولا عشان نكون شايفين كل الفقرات و الاعصاب بوضوح على جهاز الاشعه .

و بعدين ندخل فيها ابره تانيه بتكون متصلة بجهاز التردد الحرارى ، وبعدها بنشغل الجهاز اللى هيبدأ يطلع الموجات الكهرومغناطيسية ، فتبدأ الترددات دى انها تعالج الالتهاب اللى حصل للعصب بسبب الانزلاق الغضروفى و تسكن الالم .

و بعد ما بنخلص الجلسة بنعمل اجراء حقن لجذور الاعصاب عشان نخفف الألم و نضيع الالتهاب بشكل سريع لان مفعول التردد الحرارى مش بيبان بعد الجلسه على طول ، بنحتاج من 3 ل5 اسابيع لحد ما يبدأ تأثير التردد الحرارى يظهر و يضيع الالتهابات اللى حصلت و الألم. 

• و هنا لازم نعرف حاجة ان التردد الحرارى ممكن اننا نستعمله لو كنا عملنا عمليه قبل كده فى العمود الفقرى و حصل بسبب العمليه دى مشاكل زي التصاقات حوالين جذور الأعصاب ، وبنستخدمه فى اننا نفك الالتصاقات اللي حصلت و نخفف الألم اللي حاصل بسبب الأعصاب دي.

طيب ايه هي مميزات التردد الحرارى لعلاج آلام الظهر؟

• الإجراء بيتم خلال 20 دقيقة بالكتير .
• من غير ما يكون فى اى جرح .
• التردد الحرارى مش بيكون ليه اى ضرر ولا بيضر العصب وده لان اقصى درجة حرارة بتطلع هي 42 درجة ، وده عمره ما هيموت العصب ، لان عشان ده يحصل بنحتاج أن درجة الحرارة توصل ل 80 درجة زى حرارة التردد الكلاسيكي اللى بنستخدمه لعلاج الام الركبة و بنقدر بيه اننا نوقف وظيفة العصب .
• لو كان عندنا اكتر من فقره فيها انزلاق غضروفي بنقدر اننا نعالجها في نفس الوقت، لان الجهاز ممكن نوصل فيه اكتر من ابره .
• مش بنحتاج للتخدير الكلي .
• بنقدر اننا نرجع البيت بعد ساعة واحدة من الإجراء.

وتعالو نعرف هو التردد الحراري بيكون ليه وقت معين نعمله فيه ؟

• لما تكون مشاكل الضهر في بدايتها و مفيش تأثير أو ضغط على العصب بشكل كبير .
• و نكون جربنا العلاج التحفظى و مجابش نتيجة و الالتهاب و الألم فضلوا موجودين .
• لو بنحس بألم شديد و مش عايزين نستنى فترة العلاج الدوائي
• لو محتاجين نعمل عمليه و رافضين عمل العمليه، وده مش بنعمله لأنه هيحل المشكله ، لكن بنعمله عشان نحاول تسكين الالم بس

وهنا لازم نسأل سؤال مهم جدا وهو 

طيب هو التردد الحراري علاج ولا مسكن ؟

التردد الحرارى هو مسكن للالم بس مفعوله بيستمر لفترات طويلة ، لأننا هنا بنعالج الالتهابات اللى حصلت فى جذور الأعصاب و سببت الألم مش بنعالج المشكلة نفسها اللي في العمود الفقري ومثال على دا هو مشكلة الانزلاق الغضروفي القطني .

طيب اي هي نسبة نجاح التردد الحراري؟

ونسبة نجاح التردد الحراري بتكون من 75 لـ 80% بمعني ان في 8 بيستفيدوا من التردد و 2 بيحسوا ان مفيش اي فرق … اللي بيتحسنوا ممكن التحسن بيبقي مدته شهر لغاية سنه و دي حاجه مبتتوضحش للمريض بطريقة صحيحة للأسف من معظم الدكاتره

طيب دلوقتي يا دكتور بما ان التردد الحرارى مسكن ده معناه ان الالم هيرجع تانى ؟

الألم هيرجع فى حالة واحدة وهي لو محافظناش على التعليمات من الدكتور المتخصص و الضغط على الأعصاب هيبدأ يحصل مرة تانية وده اللى هيرجع الألم ، وعشان ده ميحصلش لازم اننا نغير من أسلوب حياتنا و نبعد عن أي أنشطة أو تصرفات ممكن تسبب ضغط على العمود الفقرى .

طيب يا دكتور لو الالم رجع تانى هل اقدر اعمل التردد الحرارى تانى ؟

الاجابة هي اه نقدر انك تعمل الجلسة اكتر من مره بدون اي مشاكل ، بس لازم الاول نشوف ايه اللى احنا عملناه اتسبب فى ان الالم يرجع تانى ، يعنى مثلا هل وزننا زاد ولا شيلنا حاجة تقيله هي اللي اتسببت في رجوع الألم ، و لو عرفنا السبب فلازم قبل ما تقرر إننا نعمل التردد الحرارى مره تانيه نعمل رنين مغناطيسي عشان نشوف اي هي المشكلة فعلا ، وهل هي كبيرة و ضاغطة على الأعصاب ولا لا ؟

خلينا نفق اننا لازم قبل ما نقرر إننا نعمل تردد حرارى ولا لا ، لازم نتاكد هل الوضع الحالى هيكون مناسب اننا نعمل تردد حرارى و هل لو عملناه هيجيب نتيجة ولا لا.

ومن هنا نكون وصلنا لآخر سؤال عن التردد الحراري  

هو التردد الحرارى ممكن يفشل ؟ وايه هو سبب فشل التردد الحراري؟

الاجابة هي اه ممكن التردد الحراري يفشل , و دا ممكن يحصل في 20 لـ 25% من الحالات بناءا على الأبحاث العالمية ، و نسبته بتزيد لو التشخيص كان غلط زي مشكلة الانزلاق الغضروفي اللي ممكن انها تتشخص غلط بنسبة كبيرة جدا ، لاننا وقتها هنكون بنطبق العلاج فى مكان غلط و مش هو سبب المشكلة اللي عندنا .

وعشان كده مهم جدا أن وقت الكشف المريض يقول كويس جدا هو بيحس بأيه و ومكان الالم فين بالظبط ، وبعد ما نسمع شكوى المريض لازم يكون فى فحص دقيق عشان نحدد المكان اللى فيه المشكله اللى مسببه الالم ، و بعد الفحص نعمل الفحوصات اللى هتأكد لنا التشخيص ، و نشوف هل الاشعة مطابقة لشكوى المريض والفحص ولا لأ ، وبعد كده نبدا نحط خطة العلاج المناسبة لحالة المريض .

افتكر دايما ان أساس أي علاج أي مشكلة خصوصا لو مشكلة في العمود الفقري هو التشخيص الصح