دكتور علي القاضي > من حقك تفهم > خطورة عملية الانزلاق الغضروفي القطني ومضاعفتها
اعرف عمودك الفقري
ليه رقبتك ممكن توجعك ؟
ليه ممكن تحس بوجع في اخر ضهرك
يعني ايه غضروف؟
١٠ أسباب للانزلاق الغضروفي القطني و عرق النسا
عملية الانزلاق الغضروفي القطني من أكثر العمليات اللي نسب نجاحها عالية جدا وملهاش اي خطورة على المريض ، بس خلينا نتفق ان أي عملية بيكون ليها نسب مضاعفات ، من أصغر عملية ممكن تتعمل لأكبر عملية ، فطبيعي ان عملية الانزلاق الغضروفي القطني يكون ليها مضاعفات بسيطة جدا بنقدر نتجنبها لو قدرت إنك تعرف كام نقطة مهمين هنذكرها في نهاية المقال، وزي ما قلنا قبل كدا ان نسبة نجاح عملية الانزلاق الغضروفي القطني بتبقى من 93% الى 95% لو المريض عملها في الوقت مناسب قبل ما يوصل للأعراض الخطيرة اللي ممكن مع الوقت تسببله شلل لو معملش العملية وبكدا نقدر نفهم ان في نسبة من 5 الى 7 % من المضاعفات ممكن تحصل ، بس خلينا نتفق ان دي تعتبر نسبة قليلة جدا جدا مقارنة بنسبة نجاح العملية ، وعشان انت من حقك تفهم وتعرف الصح تعالى نعرف أي هي المضاعفات دي :
1 - الالتهاب السطحي أو العميق للجرح أو ان يحصل تلوث ، ده بيحصل أكثر في العيانين
2- ان الغضروف يحصله ارتجاع
و ارتجاع الغضروف او ان الغضروف يرجع مرة تانية ، دى حاجه بتخوف العيانين جدا من فكرة العملية ، بس خلينى اقولك ان دى حاجة بنقدر نتجنبها تماما عن طريق حاجات كثيرة جدا زي الالتزام بالتعليمات اللي الدكتور المتخصص هيقولها وتعليمات تانية كتيرة تقدروا تعرفوها من مقال الغضروف المرتجع بعد عملية الانزلاق الغضروفي القطني 3- ان يحصل للمريض نزيف أولي او ثانوي ، و هنا لو حصل نزيف اولي ودا بيكون خلال العملية الجراحية واللي احنا بنكون قادرين اننا نسيطر عليه بسبب الأدوات وآلات اللي بقينا بنستخدمها دلوقتي أما النزيف الثانوي دا بيحصل بسبب مشكلة في السيولة ، ودى بنقدر اننا نتجنبها عن طريق :
4- تسريب السائل النخاعي، في بعض الحالات لما بنعمل عمليات في العمود الفقري بيطلع سائل لونه شفاف دا اسمه السائل النخاعي ، و كلمة السائل النخاعي بتكون مرعبة بالنسبة للعيانين ، بس خلينى اقولك ان بنسبة 95% بيتم السيطرة على السائل ده بشوية أدوية و وضعيات معينة ولبس حزام ، يعنى دى حاجة مش المفروض نقلق منها و ده غير انه نادر جدا ان يحصل تسريب للسائل النخاعى وقت عملية استئصال الغضروف المنزلق .
لان بيكون فى غشاء موجودة حوالين النخاع الشوكي أو جدر العصب ، فلو حصل خدش للغشاء ده وقت العملية ، زي الخدشة اللي ممكن تحصلنا في الجلد عادي خالص، بينزل منه سائل و هو ده السائل النخاعى وزي ما قلتلكم ان بنسبة 95% بيتم السيطرة عليه بالأدوية وبعض الوضعيات الصحيحة. 5- آخر مضاعفة واللي هي أكثر حاجة بترعب العيانين أن يحصل ضعف في الحركة وعدم تحكم في البول والبراز أو بالمعنى المنتشر أكثر ان يحصل للعيان شلل بعد العملية ، بس احب اقولكوا ان نسبتها اقل من نص في المية من 100، ودي نسبة قليلة جدا جدا . وبسبب التطور العلمي اللي بقي موجود بقينا بنستخدم أدوات زي الميكروسكوب اللي بيقدر انه يكبر الصورة 40 ضعف، وده بيدينا احنا كجراحين مجال كبير اننا نشوف مكان العملية كويس وبالتالي هنتجنب ان يحصل إصابة للعصب نفسه . فمفيش أي داعي للخوف المبالغ فيه من العمليه نفسها لانها ابسط جراحات العمود الفقري وزي ما انت متقبل جدا إنك تعمل عملية الزايدة او عملية المرارة لمجرد ان انت عندك حاجة طارئة ، لازم كمان تقبل فكرة ان الغضروف دا لو عملك أعراض طارئة لازم تشيله زي ما بتشيل المرارة أوالزايدة بدون اي رعب مبالغ فيه و تقدروا تعرفوا أي هي الأعراض الخطيرة اللي ممكن مريض الانزلاق الغضروفي القطني يوصل ليها من هنا
فدي حاجات مريض الانزلاق الغضروفي القطني لازم انه يدور ويسأل فيها وتبقى واثق في الدكتور بتاعك عشان ربنا يكرمك ان شاء الله ونسبة نجاح عملية الإنزلاق الغضروفي القطني متبقاش 95% تبقى نسبة نجاحها كمان 100% .
