دكتور علي القاضي > الخدمات > تزحزح الفقرات اسبابها وطرق علاجها
تصفح جميع الخدمات
الانزلاق الغضروفي العنقي
ضيق الفقرات القطنية
تزحزح الفقرات
الإنزلاق الغضروفي القطني
مفصل الحوض الحرقفي
عرق النسا
تزحزح الفقرات القطنية معناه إن في فقرة بتتحرك لقدام عن الفقرة التانية، وده بيعمل ضغط على الأعصاب . وبيسبب ألم شديد في الضهر، بيزيد مع الوقفه أو المشي، ومعاه تنميل وحرقان في الرجل. الفرق بينه وبين الانزلاق الغضروفي إن هنا الألم الأساسي في الضهر أكتر من الرجل. أشهر نوعين لتزحزح الفقرات هم تيبس الفقرات اللي بيحصل مع الوزن الزائد ورفع الاوزان التقيلة، خصوصًا عند السيدات فوق 45 سنة، والنوع التاني هو كسر الفقرات اللي بيحصل عند الرياضيين أو اللي بيشيلوا أوزان تقيلة فجأة. تشخيص تزحزح الفقرات بيكون بالفحص الإكلينيكي وأشعة الرنين المغناطيسي، مع أشعة عادية بوضعيات معينة عشان نحدد درجة التزحزح وكام فقرة متزحزحة وهل الحالة محتاجة تدخل جراحي ولا لأ. العلاج بيبدأ بالأدوية (مسكنات، باسط عضلات، مضادات التهاب)، مع لبس حزام الضهر مؤقتًا، ولو المريض اتحسن , بنعمله علاج طبيعي لتقوية العضلات. لو الألم مستمر، بنلجأ للحقن والتردد الحراري كحل مؤقت، لكن لو كل الحلول فشلت، يبقى الحل الجراحي هو تثبيت الفقرات بمسامير وشرايح، وأحيانًا بنركب قفص كربوني. والجراحة بتساعد المريض يرجع لحياته الطبيعية بنسبة 90-95%، لكن زي أي عملية ليها مضاعفات زي النزيف، التهاب الجرح، أو استمرار بعض الآلام. المهم إن المريض يعرف حالته كويس، وياخد القرار المناسب مع الدكتور بعد تجربة كل الحلول المتاحة.
Your browser does not support HTML5 video.
مشكله من مشاكل بنقابلها كتير اوي في العياده عندنا مشكله تزحزح الفقرات القطنية . يعني اي تزحزح الفقرات القطنية ؟ يعني فقره متحركه قدام فقره , العيان بيبقي حاسس باي ؟ العيان بيبقي جاي عنده وجع شديد في ضهره ، بيقف شويه أو بيمشي شويه بيحس أن ضهره كانه بيتقطم , كأنه بيتفصل وبيجي مع الالم بتاع الضهر الام شديدة جدا في الرجل أو الرجلين مع تنميل وحرقان لغاية صوباع الرجل . والعيان دا مختلف شويه عن عيان الغضروف لانه بيقول أن المشكله الاساسيه أو الوجع اللي عنده موجود اكتر في ضهره من رجله , عكس عيان الانزلاق الغضروفي بيكون المشكله والوجع اكتر في رجله عن ضهره واكتر حاجه بتميز تزحزح الفقرات في آلام شديدة في الضهر, والعيان بيجي يقولنا بالظبط حاسس أن ضهره بينفصل من بعضه
في ٥ انواع لتزحزح الفقرات ,أشهر اتنين منهم : النوع بتاع تيبس الفقرات والنوع التاني اللي هو الكسر بتاع الفقرة . وتيبس الفقرات دا بيجي في العيانين اللي وزنهم كبير او بيشيلوا اوزان تقيله اللي بيبقي عاده معاهم خشونة في مفاصل تانيه زي مفصل الركبة أو مفصل الفخد أو غيره. ودا بيحصل لمعظم السيدات اللي بيكون عمرهم فوق ال٤٥ سنه اللي بيبقوا شالوا تقيل لفترات كبيرة من حياتهم ’ ومازالوا بيشيلوا . فالفقره نفسها لما بتوصل لحالة من الخشونة المتقدمة , تبدأ الفقره نفسها متستحملش وبتتحرك قدام الفقره التانيه . النوع التاني هو تاني أشهر نوع هو كسر الفقرات دا بيحصل اكتر في العيانيين الرياضيين أو في الرجاله اللي بتشيل اوزان تقيله بيجي عيان بيكون شال تقيل في الجيم بيحس أن ضهره طق وبيبقي فيه شرخ او في الناس اللي شغلتها أنها تشيل تقيل أو عيان مبيشليش تقيل في العادي وشال حاجه تقيله فجاه فحس بطق في ضهره دول اشهر نوعين
لما الفقرة تتحرك لقدام بيعمل حاجه اسمها الغضروف الكاذب ودي كلمه غريبه بالنسبه للعيانين فكره الغضروف الكاذب دا حاجه بتبان في اشاعة الرنين أن الغضروف نفسه ضاغط علي العصب , لكن في الحقيقه ان الفقرة نفسها هي اللي اتحركت.لقدام والغضروف ثابت في مكانه
زي ما قولنا سريعا هي آلام شديدة في الضهر تنميل في الرجل أو الرجلين بيزيد اكتر مع الوقفه لفترة أو المشي لفترات , ودا لأن العضلات بتاع الضهر اول ما تبتدئ تشيل الوزن وتبتدي تتعب الفقرات هي اللي بتشيل مكانها. أما الفقرات دي بتشيل وتتحرك زي السنه المتخلخلة بتخلي العصب يبقى ملموس أو بيبقي قريب جدا من العضم , وساعتها بيحصل احساس التنميل الشديد والعيان ساعتها بيحتاج يقعد و يرتاح أو حتي ميقدرش يكمل المشوار بتاعه , ممكن الموضوع يتطور واحده بواحده وان العيان مش قادر حتي يتمشي ويدخل الحمام.
اول حاجه بنعتمد عليها في التشخيص هي شكوي المريض , اللي احنا قولناها بيجي نفحصه اكلنيكيا , ونتأكد أنه معندوش مشاكل في المفاصل زي مفصل الحوض الحرقفي اللي بيعمل عرق نسا كاذب او غيره . وزي ما قولنا أن العيان اللي عنده تيبس أو خشونة فقرات متقدمة , بيبقي عاده معاه خشونة في مفصل الفخد أو مفصل الركبة و بنكشف ونشوف هل الآلام بسبب الضهر في الأساس أو المشاكل الي عنده في الرجل , والعلاج بيختلف علي اساس اي فيهم اللي مسبب الالم بعد الفحص الإكلينيكي والتاريخ المرضي بنعمل رنين مغناطيسى على الفقرات القطنيه اللي بنشوف منها هل في تزحزح في فقرة واحدة ولا اكتر من فقره وانهي فقرة فيهم بالظبط اللي فيها تزحزح . ودا لانه اشهر فقرات بيحصلها تيبس وخشونة هي الفقره الرابعه والخامسه , أما الفقرات اللي بيحصل فيها كسر هي الفقرة الخامسة القطنية والاولى العجزية وبعد كدا بتعمل الرنين والأشعة العادية بالحركة , وفي الاشعه العاديه بالحركة , العيان بيقف ويوطي وبعدين بيقف وبيرجع ضهره لورا ودي حاجه اسمها stressed position يعني وضعيات بتعمل ضغط على العمود الفقري فبنشوف , هل الفقرة دي اتحركت من مكانها اكتر ولا لا . وعلي أساسه برضو دي بتديلنا فكره هل هنحتاج عمليه ولا علاج دوائي , وبعد ما بنوصل للتشخيص بنعرض على العيان طرق العلاج المختلفه. اي عيان عمود فقري بنبتدي معاه الاول علاج دوائي اللي بيكون عباره عن باسط للعضلات ومسكن ومضاد للالتهاب وعلاج لالتهاب الأعصاب وعلاج تحسين الدورة الدموية للأعصاب وفيتامينات . وفي حاجه مهمه جدا لعيان تزحزح الفقرات أن هو لازم يلبس حزام الضهر , عشان يسند ضهره مبدئيا لغايه ما نبتدي نشوف جسمه هيتأقلم على الموضوع ولا لاالنقطة اللي بعدها لو العيان ابتدي يستجيب للعلاج الدوائي خلال اسبوعين أو تلاته , نبتدي نعمل معاه علاج طبيعي عشان نحسن العضلات سواء عضلات البطن أو الضهر , عشان العضلات تبتدي تشيل معانا شويه , وميحصلش تزحزح بعد فترة قصيرة ولو العيان استجاب للعلاج الدوائي والعلاج الطبيعي في خلال ال ٦ اسابيع , أقوله حمدلله علي سلامتك خد بالك من .
لكن لو العيان مستجيش للعلاج الدوائي والعلاج الطبيعي بعد ٦ اسابيع ممكن نعرض عليه الحقن و التردد الحراري , كنوع من أنواع تسكين الألم وليس العلاج الجذري مفيش حاجه من اللي انا قولتها دلوقتى هترجع الفقرة تاني مكانه , ا كل دي حلول لتسكين الالم عشان المريض يقدر يتعايش ويرجع لحياته الطبيعيه بدون آلام مبرحة لو العيان جرب الحاجات دي كلها هنلجأ للسلاح الاخير , الي احنا بنستخدمه كجراحيين عمود فقري , وبنخليه اخر اختيار اللي هو العملية و عملية تزحزح هي تثبيت الفقرات القطنية مينفعش نعمل عمليه تثبيت بالميكرسكوب مينفعش يبقي زي استئصال الغضروف الفكره كلها أن الفقرة دي مش ثابته أو متحركه فلازم نعملها تثبيت . التثبيت بيبقي في الأساس بشرايح ومسامير , وممكن معاها قفص كربوني في حالات أن احنا بنشيل الغضروف نفسه وبنركب مكانه قفص كربوني ودا علي حسب في بعض الجراحين بيحبوا يركبوا قفص كربوني واللي انا منهم , ودا عشان بيزود من نسبة الالتحام , ويخلي العيان يقدر يعيش حياته بشكل طبيعي اكتر. او في بعض الجراحين بيعملوا تثبيت فقرات من غير تركيب قفص كربوني ودي مفيهاش مشاكل كبيرة الفرق بس زي ما قولنا فرق الالتحام وان تركيب القفص الككربوني حاجه متطوره اكتر أو دي خطوه أزيد في العملية لكن العيان يقدر يرجع لحياته الطبيعيه بنسبة ٩٠ ل ٩٥ ٪ . اي هي مضاعفات عملية تثبيت الفقرات القطنية ؟ زي اي مضاعفة قولناها لاي عملية في العمود الفقري بالذات في الفقرات القطنية اللي هي
وفي مضاعفات تانية بالنسبه للعيان ان هو يحصل إصابة للعصب , او يحصل له سقوط قدم , او يحصل بعد الشر ضعف في حركه الرجلين دي زي ما قلنا قبل كده احنا قولتا ان نسبه حدوثالمضاعفات دي ١,٥ ٪ رقم مطمين جدا لكن لازم تبقوا فاهمين ان ممكن في أي وقت من الاوقات ان الدكتور اللي عمل 100 عمليه او 200 عمليه ممكن يحصل معاه لأي سبب ما حتى لو اصابه او ممكن التشريح نفسه بتاع العيان مش طبيعي فالمسمار يبقي ماثر على العصب ودي حاجه مؤقتة لكن بعد الشر بنسب قليله جدا بتبقى دائمه النقطه التانيه من المضاعفات اللي بتبقى موجوده مع تثبيت الفقرات , هي خشونه مفصل الحوض الحرقفي ودي بتحصل من 10 ل 15% من الحالات , بالذات الناس اللي وزنها تقيل و بتقعد وضعيات خاطئه , الناس اللي ما بتحافظش على العلاج الطبيعي ممكن يحصل لها خشونه في مفصل الحوض , و ده علاجه ان احنا بنمشي بالترتيب بنبتدي بالعلاج والعلاج الطبيعي وبعد كده ممكن نجرب الحقن والتردد الحراري مضاعفات اللي انا قلتها دي نسبتها من 7 ل 10% يعني بنسبه 90% الموضوع باذن الله مطمئن وزي ما قولنا احنا ما مبنلجاش للعمليات , الا لما بنستنفذ كل الطرق اللي ما قبل التدخل الجراحي , ولازم يبقى في ثقه ما بين العيان والدكتور , يبقى العيان متاكد ان هو بيعمل له الصح بتاعه علميا وعمليا لازم الدكتور يبقى بيعمل العمليه في المكان المناسب . الامكانيات الموجوده داخل العملية سواء الات او جهاز الاشعه او الميكروسكوب لو هو احتاجه في النص يبقى موجود , يبقى التعقيم مناسب عشان نبعد عن المشاكل اللي ممكن تحصل. وفي الاخر احب اطمنكم ان موضوع تزحزح الفقرات ده حاجه باذن الله مطمئنه , مش معنى ان انت عندك تزحزح ان عندك مشكله كبيره مش معنى ان انا بقولك ان في مضاعفات انها لازم تحصل انا بقولهالك عشان دي امانه علميه لكل عيان عنده مشكله في العمود الفقري , لازم يكون عارفها بالذات المقبلين على عملية تثبيت الفقرات , لازم اي دكتور يشرحلك النسب الحقيقية بتاع كل حاجة و في الاول وفي الاخر لو انت اخذت بالاسباب باذن الله تبقى من الناس اللي ربنا كتب لهم الشفاء على خير , وبعد الشر لو حصلك اي مضاعفات تبقى واثق من الدكتور بتاعك انه يقدر يتعامل مع المضاعفات دي . ولو عندك اي استفسار عن عملية تثبيت الفقرات القطنية ممكن تبعت لنا على رسايل الصفحه او على الوتساب 01000120118 دكتور علي يسري القاضي استشاري ومدرس المخ والاعصاب والعمود الفقري بجامعة القاهرة
