اهم التعليمات قبل وبعد عملية الانزلاق الغضروفي القطني

اهم التعليمات قبل وبعد عملية الانزلاق الغضروفي القطني

كل مريض انزلاق غضروف قطني بيكون مقرر انه يعمل العملية بيكون محتار ومش عارف المفروض هيعمل ايه قبل وبعد عملية الانزلاق الغضروفي القطني، فخلينا بشكل مبدئي نتكلم النهاردة عن كل الإجراءات اللي بنطلبها من مريض الانزلاق الغضروفي القطني قبل وبعد عملية الانزلاق الغضروفي القطني، وخلونا نبدأ اول حاجه بالحاجات اللي بنطلبها من العيان قبل العملية ولازم نعرف ان
أي عملية في الدنيا ليها ترتيبات وتحاليل بنتطمن بيها على الوضع الصحي للمريض زي :  

• صوره دم عشان نتأكد ان كرات الدم البيضا مش كتير ، وده معناه ان مفيش التهابات عند المريض .
• و لازم نتاكد كمان ان مفيش انيميا حادة عند المريض .
• لازم المريض يعمل تحليل سيوله ، لان لو المريض طلع عنده مشكلة فى السيولة او مشكله فى صفائح الدم لازم وقتها نرجع لدكتور امراض دم عشان نعالج اى مشكله فى الدم قبل العملية .
• وفي الحالة دي ممكن اننا نأجل العمليه لو الحالة مش طارئة عشان نضمن ان مش هيحصل اي نزيف وقت العمليه سواء كان نزيف اولى او ثانوى بسبب مشاكل الدم ، أما لو وضع المريض كان محتاج العملية ضروري جدا بسبب ان اعراض الانزلاق الغضروفى دخلت فى مرحلة الخطر ، ممكن انها تسبب للمريض شلل دائم ومش هينفع نأجلها فساعتها بنضطر اننا نعملها بس بشوية ترتيبات تتناسب مع وضع المريض .
• و كمان بنعمل رسم قلب وموجات صوتية عشان نتأكد ان القلب سليم وان ضربات القلب منتظمة وكمان نتأكد من وظائف الكلى والكبد عشان نتاكد ان التخدير مش هياثر على وظيفتهم.
• نتأكد من قياسات الضغط والسكر عشان نتأكد من حالة المريض قبل ما نعمل الجراحة ونتأكد كمان ان التخدير مش هيأثر على الضغط أو السكر خلال العملية ونضطر اننا نستخدم ادوية معينة عشان نقلل الضغط لو كان عالي او نزوده لو كان الضغط قليل .
• لازم مريض الانزلاق الغضروفي القطني يكون عامل رنين جديد وميكونش عدى عليه اكتر من 6 شهور عشان نكون متأكدين من الحالة بتاعتنا وان ميكنش فيه أي مشاكل جديدة حصلت .
• و هنحتاج كمان نعمل أشعة عادية بالحركة عشان نتأكد من ثبات الفقرات وإننا مش هنحتاج اننا نعمل تثبيت للفقرات مع عملية الانزلاق الغضروفي القطني.  
  

دي هي الإجراءات اللي بنطلب من العيان انه يعملها قبل عملية الانزلاق الغضروفي القطني ، وتعالوا دلوقتي نعرف 

أي الإجراءات أو الحاجات اللي هنطلب من المريض يعملها بعد إجراء عملية الانزلاق الغضروفي القطني؟ 

• انه اول ما يفوق من البنج لازم انه يقوم ويمشي بنفسه على رجليه وكمان يدخل الحمام ، ودى خطوة مهمه جدا بعد العملية الجراحية عشان اول حاجه المريض يكون متطمن ويلاقي نفسه انه عارف يمشي طبيعي زي الأول بدون أي مشاكل وكمان نتأكد من وظيفة الرجل والوظائف الداخلية للجسم .
•  و لازم مريض الانزلاق الغضروفي القطني يخفف من الشغل في فترة التعافي ويرتاح كويس .
• لازم مريض الانزلاق الغضروفي القطني يبعد عن رفع الأوزان الثقيلة في فترة التعافي عشان يضمن ان الانزلاق الغضروفي القطني ميرجعش تاني .
• ان العيان يلتزم 100% بجلسات العلاج الطبيعي اللي بتكون مع دكتور متخصص في العمود الفقري ، وبنبدأ فيها بعد ٣ او 4 اسابيع من العمليه عشان يساعد العيان انه يقوي عضلات ضهره بعد عملية الانزلاق الغضروفي القطني وكمان يساعد العيان انه يتحسن يوم عن التاني .
• ان لو كان وزن المريض زايد فلازم انه يحاول يقلل من وزنه لان العمود الفقري هو اللي بيشيل كل وزن الجسم وقت الحركة وده هيأثر على غضاريف الضهر كلها وكمان ممكن انه يرجع الإنزلاق الغضروفي القطني بعد العملية ، ولو العيان مش هيقدر انه يقلل وزنه وقتها لازم نعمل للمريض تثبيت للفقرات مع عملية استئصال الغضروف المنزلق عشان الغضروف ميرجعش تانى .
• ولازم مريض الانزلاق الغضروفي القطني يحاول انه ميقعدش لفترات طويلة لان القعده لمدة طويلة بتسبب ضعف فى عضلات الضهر، فلازم نحاول اننا نغير وضعيتنا كل فترة ونقوم ونتمشى شوية .
• ولازم نهتم بنظافة الجرح وتعقيمه عشان نضمن ان ميحصلش أي التهابات في مكان الجرح .
• لازم نحاول نتجنب العصبية أو الحزق والكحة بشكل جامد على قد ما نقدر عشان متأثرش على مكان الجرح وممكن لاقدر الله تسبب في ان الغرز تتفك. 
  

ودي هي اغلب الحاجات اللي بنطلبها من العيان قبل وبعد عملية الانزلاق الغضروفي القطني سواء كانت بالميكروسكوب الجراحي أو المنظار،

و خليك عارف ومتأكد إنك طالما كنت محتاج العملية وعملتها فدا يعتبر أحسن قرار ممكن انك تعمله لنفسك ولجسمك، وده هيمنع عنك مخاطر كثيرة جدا زي السقوط في القدم أو الشلل وكمان هيخليك تتخلص من مشكلة الانزلاق الغضروفي القطني بشكل نهائي، ولو عايز تعرف اكثر عن تفاصيل عملية الانزلاق الغضروفي القطني تقدر تعرفها من هنا .