علاج الانزلاق الغضروفى بالتردد الحرارى

كتير من مرضي الانزلاق الغضروفي القطني بيجوا العيادة يطلبوا مننا انهم عاوزين يعملوا علاج الانزلاق الغضروفى بالتردد الحرارى. لانهم بيكونوا سمعوا من حد قريب منهم انه جرب التردد الحراري وفعلا اتحسن كتير ويمكن كمان خف خالص.

بس لازم قبل ما تطلب من دكتورك او تاخد القرار انك تعمل تردد حراري لازم تعرف شوية حاجات مهمه عنه زي: هو اي اصلا التردد الحراري؟ وازاي هنستخدمه في علاج الانزلاق الغضروفي, وهو فعلا هيعالج الانزلاق وترجع تمارس حياتك بشكل طبيعي؟

ما هو التردد الحراري للغضروف

التردد الحراري عبارة عن جهاز من خلاله بنقدر نسكن الالم اللي انت حاسس بيه بسبب الانزلاق الغضروفي اللي عندك, طب اي شكل جهاز التردد الحراري او بيتكون من اي؟  التردد الحراري عبارة عن جهاز متوصل فيه كابلات, وبيتوصل في الكابلات دي ابر مخصصه وبنسميها ابر عازلة للتردد الحراري.

عارف انك قلقت من كلمة ابر وتخيلت انها حاجه مؤلمة لكن بالعكس دي مجرد إبر رفيعة شبه ابره الكانيولا, دا غير ان لازم نحقن المكان اللي هندخل فيه الابره بمخدر موضعي عشان متحسش باي الم وقت الإجراء طب هو احنا هنحط الابر كدا  بشكل عشوائي وخلاص من غير ما نحدد هو فين جذر العصب اللي هنسكنه بالتردد الحراري؟

 اكيد لا مش هنحط الابره بشكل عشوائي, لان في اشعة اسمها الاشعة التداخلية دي بنستخدمها في اننا نشوف كل حاجه بشكل واضح  في عمودك الفقري وكمان احنا بنحقن صبغة في المنطقة اللي هنشتغل فيها بالتردد الحراري , و دا هيساعد اننا نشوف الأعصاب بشكل واضح جدا ونشتغل بشكل دقيق.

ودي حاجه بتضمنلك ان التردد الحراري هيكون في مكانه الصح مش ف اي مكان ولا هيلمس العصب او يسببله ضرر , و غير اننا اصلا بنشتغل على جذور الاعصاب مش الاعصاب يعني بنحط الابره جنب العصب مش في العصب ذات نفسه  وبعد ما بنحط الابره ونوصلها بكابل  جهاز التردد الحراري بيبدء الجهاز  يطلع ذبذبات كهربائية  ودي بتعمل تقليل  الالتهابات اللي موجوده في العصب اللي الغضروف ضاغط عليه, وتخلي العصب ينقل اشارات طبيعية بدون الم للمخ  فبالتالي الالم بيتسكن. 
كل ما يخص التردد الحرارى لعلاج الألم

 قبل علاج التردد الحراري للانزلاق الغضروفي؟

وهي  ان جهاز التردد الحراري له نوعين او وظيفيتين, وانت كمريض انزلاق غضروفي محتاج وظيفة واحدة منهم وهي التردد الحراري النابض. ودا بيطلع حرارة 42 درجة مئوية مش بتزيد عن كدا طب اشمعنا لازم تردد حراري نابض؟

لان درجة الحرارة 42 مئوية مناسبة انها تسكن الالم اللي موجود في جذور الاعصاب. ودا عشان جذور الاعصاب في الفقرات القطنية والعجزية دي جذور حسية وحركية مينفعش نستخدم معاها درجة حرارة اعلي لان في الحالة دي العصب هيموت  وهتفقد الاحساس او كمان الحركة  لكن  التردد الحراري الكلاسيكي ودا النوع التاني, الكلاسيكي بيطلع حرارة 80 درجة مئوية ودي درجة حرارة عاليه عشان نموت بيها العصب خالص زي ما بيحصل في خشونة الركبة.

عشان نوقف الالم والاحساس بنموت العصب  اللي بينقل اشارات الالم للمخ فبالتالي المريض مش هيحس بالالم لكن في نفس الوقت حركته مش هتتأثر. 
من أهم أسباب الإحساس بالألم بعد إجراء التردد الحراري للغضروف
طب كلامنا دا معناه ان التردد الحراري هو مسكن زي المسكانات اللي اصلا بتكون انت واخدها في فترة العلاج الدوائي؟  خلينا  متفقين ان التردد الحراري فعلا مسكن لكنه فاعليته قوية جدا لاننا  بنسكن الالم في المكان اللي مسبب الالم  بشكل مباشر.

وهو نتيجته مش بتظهر بشكل فوري بعد 3 أسابيع بتبدء تظهر نتيجة التردد الحراري. وعشان كدا بنحقن مضاد للالتهابات بعد ما بنخلص إجراء التردد الحراري عشان المريض يحس بتحسن اول ما نخلص علطول.

وعشان فعلا يكون  التردد الحراري مؤثر بشكل قوي معاك وتستفيد منه , لازم اولا يكون الغضروف عندك صغير مش ضاغط علي العصب وتكون جربت العلاج الدوائي والطبيعي ومتحسنتش عليهم  او تكون حالتك الصحية متسمحلكش انك تعمل العملية زي مرضي القلب, ساعتها بتلجأ للتردد الحراري كحل بديل لعلاج الالم. 

قبل قرار علاج الانزلاق الغضروفى بالتردد الحرارى

ولو انت خلاص قررت تعمل تردد حراري وعاوز فعلا يكون له نتيجة , لازم تلتزم بالتعليمات اللي الدكتور هيقولهالك وتتوقف عن العادات السيئة اللي كنت بتعملها وكانت سبب في الغضروف عندك.

يعني لو كنت مدخن تقلل التدخين والافضل انك تبطله, لو وزنك زائد وكان اصلا سبب في الانزلاق الغضروفي عندك تبدء تقلل وزنك, وتمارس التمارين الرياضية الصحيحة اللي الدكتور هيقولك عليها.

ولو عاوز تعرف تفاصيل اكتر عن الحقن والتردد الحراري تقدر تتواصل معانا من خلال رسايل الصفحة او من خلال الواتساب: 01000120118
دكتور علي يسري القاضي استشاري ومدرس المخ والاعصاب والعمود الفقري بجامعة القاهرة