حقن جذور الأعصاب

هنتكلم النهاردة عن طريقة من طرق علاج مشاكل وآلام العمود الفقري ، وكمان بيتم استخدامها مع تقنية التردد الحراري ، لإن مش هينفع إجراء التردد الحراري يتم بدونها والتقنية دي هي حقن جذور الاعصاب ، وتعالو واحده واحده نعرف تفاصيل التقنية دي واي هي مميزاتها. وبكل بساطة تعالو اول حاجه نعرف 

اي هو حقن جذور الاعصاب؟

حقن جذور الأعصاب عباره عن اجراء بيتم على جذور الاعصاب اللي بيكون فيها مشكلة و بنوصل فيه أدوية معينة مسؤولة عن تخفيف الألم للجزء المصاب في العصب ، وده عن طريق إبرة بتشبه الكانيولا ، عشان نقلل من الآلام اللي بيحس بيها المريض وكمان عشان يكون قادر انه يكمل العلاج الطبيعي بدون مشاكل ، والموضوع بيتم في غرفة العمليات رغم انها مش عملية جراحية ، مدتها مش بتزيد عن نص ساعه وبنستخدم فيها جهاز الأشعة التداخلية اللي بيوضح جذور الأعصاب بشكل كبير جدا.

طيب خلونا نعرف دلوقتي : 

 ايه هي مميزات حقن جذور الاعصاب ؟

1- الإجراء نفسه بيحصل خلال 10 دقايق بالكتير .

2- من غير ما يكون فى جرح لإنها شكة إبرة .

3- المواد اللى بنستخدمها فى حقن جذور الاعصاب مش بتضر العصب .

4- لو كان عندنا اكثر من فقره فيها انزلاق نقدر اننا نعالجها في نفس الوقت .

5- مش بنحتاج للتخدير الكلي وبكدا نكون بعدنا عن مخاطرة .

6- بنقدر اننا نرجع البيت بعد ساعة من الإجراء.

7- تسكين الألم بيظهر بشكل سريع جدا ويقدر المريض يلاحظه بكل بوضوح .

و عشان انت من حقك تفهم طريقة العلاج خلينا نعرف بالضبط ازاي الإجراء بيتم ازاي:

بنبدأ الإجراء بأن المريض بيكون نايم على بطنه و بيكون متثبت فوقه جهاز الأشعة التداخلية ، عشان نكون شايفين كويس فقرات العمود الفقري و الأعصاب ، و بعد ما نكون عقمنا المنطقه اللى فيها المشكلة  و خدرناها بمخدر موضعى بنبدأ اننا ندخل ابره رفيعه جدا جنب العصب اللى فيه المشكله ونحقن المواد اللي هتخفف من الألم .

 طيب اي هي المواد أو الأدوية اللي بيتم حقها ؟

مواد زي مضادات الالتهاب وبنج موضعي والكورتيزون ، والكورتيزون بيكون موضعي يعني مش بيتم امتصاصه من الدم يعني مش هسبب اي اضرار ، وكمان حقن الكورتيزون واللي بتكون حقن خاصة بيتم استخدامها ضمن خطة العلاج للمريض بهدف انها تقلل أو تخفف الالتهاب الحاصل ، وكمان بتساعد على تخفيف ردود فعل جهاز المناعة وخلايا الدم البيضاء ، واللي بتساعد بدورها من تقليل الالتهاب الموجود في الجسم.

وهنا بقا نكون وصلنا لأهم سؤال واللي هو 

هل حقن جذور الاعصاب هو حل نهائي لمشاكل العمود الفقري ؟

الإجابة هي لا ، حقن جذور الاعصاب مش حل نهائي ولكنه حل لعلاج وتسكين الألم ، وممكن مع محافظة المريض على التعليمات والإرشادات من الدكتور أن الألم يخف من عنده كليا بس بشرط الإلتزام بالتعليمات دي ، زي مثلا تقليل الوزن أو اننا منقعدش بطريقة غلط ممكن انها تأذي عمودنا الفقري,

خليكوا فاكرين دايما ان الأهم من العلاج نفسه هو التشخيص الصحيح للمشكلة ، ولو حابين تعرفوا اكثر عن التشخيص وأهميته تقدروا تضغطوا هنا التشخيص وهتعرفوا كل المعلومات اللي تخص التشخيص الصح