دكتور علي القاضي > من حقك تفهم > عملية استئصال الانزلاق الغضروفي القطني بالميكروسكوب
اعرف عمودك الفقري
ليه رقبتك ممكن توجعك ؟
ليه ممكن تحس بوجع في اخر ضهرك
يعني ايه غضروف؟
١٠ أسباب للانزلاق الغضروفي القطني و عرق النسا
بعد ما مريض الانزلاق الغضروفي القطني فهم وعرف ان هو فعلا محتاج انه يعمل عملية وإنها هي الحل الوحيد ليه عشان لو استنى أكثر من كدا ممكن انه بعد الشر يحصله سقوط قدم دائم وساعتها نسبة نجاح العملية هتقل جدا ، و هيقل معاها فرصة انه يرجع لحياته الطبيعية جيه الوقت اننا نعرف معلومات كفاية عن عملية استئصال الانزلاق الغضروفي القطني و فى مقال انهارده هنتكلم عن استئصال الغضروف المنزلق بالميكروسكوب ، عشان تكون متطمن أكتر و انت بتاخد قرار العملية وخلونا نبدأ بأول حاجه وهي
مقاس الجرح في عملية الانزلاق الغضروفي القطني بالميكروسكوب ، فبيكون عبارة عن عقلة صباع واحده أو عقلة ونص بالكثير، ودا عشان الأدوات الميكروسكوبية اللي بنستخدمها عشان نشيل بيها الغضروف المنزلق بتكون دقيقة جدا، واللي بتساعدنا اننا نعمل الإجراء بدون أي خطأ أو أي مشكلة ، وطبعا الميكروسكوب الجراحي بيساعدنا في تكبير مكان الجرح 40 مرة أكتر من الصورة الطبيعية ودا بيسمحلنا اننا نعمل الإجراء صح لاننا بنكون شايفين المكان اللى بنعمل فيه العملية بوضوح ، ومن هنا هنوصل للإجراء نفسه بس احب اقولكم الاول ان عملية استئصال الانزلاق الغضروفي القطني بالنسبة للجراح اللي فعلا متمكن فيها وعنده خبره كبيره في الميكروسكوب و اتعود انه يستخدمه فهي سهلة جدا ومفيهاش اي صعوبة
و عشان انت من حقك تفهم خليني اقولك ان جذور الأعصاب في جسم الانسان ربنا خلقها متحاوطة بـ 3 طبقات من ، والطبقات دي هي الأم الجافية والأم العنكبوتية والأم الحنون، و اللي بيكونوا محاوطين العصب بشكل تام فصعب جدا ان الجراح وقت العملية يؤذي العصب بأي شكل ممكن لأن ربنا خالق للأعصاب دي الحماية بتاعتها. بعد ما خلصنا الإجراء الجراحي خلونا دلوقتي نتكلم عن وقت العملية نفسها ، وامتى المريض بيقدر انه يمشي ويرجع بيته بعد العملية وقت الإجراء نفسه مش بياخد أكثر من ساعة أو ساعة ونص بالكثير لإن زي ما بنقول عملية الانزلاق الغضروفي القطني هي من أسهل وأبسط العمليات اللي ممكن تتعمل فى العمود الفقري ، والمريض بيقدر انه يمشي بعد ما يفوق من العملية على طول ، أما بالنسبة للرجوع للبيت فالمريض بيقدر يرجع البيت في نفس اليوم على طول مش بيحتاج انه يقعد أكثر من كدا في المستشفى يعني مش بيكمل حتى 24 ساعة في المستشفى
وخلال شهر بالكثير ان شاء الله هيكون المريض اتحسن بشكل نهائي وهيكون قادر انه يرجع لحياته الطبيعة بدون أي مشاكل أو أي آلام عرق النسا مرة تانية، وهيكون كدا المريض حل مشكلة الانزلاق الغضروفي القطني بشكل نهائي وهيقدر انه يعيش مرتاح ويرجع لحياته وشغله بشكل طبيعي. فبلاش اننا نقلق من فكرة عملية استئصال الانزلاق الغضروفي القطني لأنها أسهل بكثير من اللي بيكون في تفكير وبال المريض.
