ضيق القناة العصبية القطنية

ضيق القناة العصبية القطنية

بتحب تمشي لمسافات طويلة ؟ بس بقيت بتحس انك مش قادر تمشي نفس المسافة اللي كنت بتمشيها في الأول . لانك بقيت بتحس بوجع و تشنجات , و تنميل فى رجلك وعشان كل ده يروح و تقدر تكمل مشي لازم تقعد وتوطي ضهرك لقدام ، طيب تعرف ان ده معناه انك عندك مشكلة في العمود الفقري و تحديدا في الفقرات القطنية ، والمشكلة دي اسمها ضيق القناة العصبية القطنية .

تعالو نفهم بقى مع بعض يعني اي فقرات قطنية ويعني أي ضيق القناة العصبية القطنية. 

اي هي الفقرات القطنية ؟

اول حاجه الفقرات القطنية هي آخر فقرات عمودنا الفقرى. يعنى بتكون موجوده فى اخر ضهرنا ، و بسبب انها اخر فقرات العمود الفقرى , فهي اكتر الفقرات اللى بتتعرض للضغط لانها بتكون شايله وزن جسمنا كله .
والفقرات القطنية دى بيمر منها حاجه مهمه جدا اسمها الضفيرة العصبية أو ديل الفرس ، واتسمت كدا لانها فعلا بتكون شبه ديل الحصان .

اي هي وظيفة الضفيرة العصبية او ديل الفرس ؟

الضفيرة دي بتكون مسؤولة عن انها تنقل أوامر الإحساس والحركة من المخ للجزء السفلي من الجسم .

طب يعني أي ضيق القناة العصبية القطنية ؟

عشان نفهم يعني اي ضيق القناة العصبية القطنية ,لازم نكون عارفين ان عمودنا الفقري بيكون فيه تجويف اسمه القناة العصبية ، والتجويف ده بيكون جواه الحبل الشوكي , وحاجه اسمها الضفيرة العصبية ، وبيطلع من الحبل الشوكي وجذور الأعصاب .
وتجويف القناة العصبية ده ربنا خلقه بمساحة معينة عشان يحمي الحبل الشوكي وجذور الأعصاب

طيب ايه اللي بيحصل لما يكون عندنا ضيق القناة العصبية القطنية ؟

اللي بيحصل ان مساحة القناة العصبية بتقل ، وهيكون في ضغط على الحبل الشوكي والضفيرة العصبية ، والضفيرة العصبية دي هي اللي بتكون مسؤولة عن الإحساس والحركة في الجزء السفلي من الجسم ، فبسبب الضغط ده هتبدأ حركتنا تتأثر وهتبدأ تحصلنا كل المشاكل اللي قولنا عليها في البداية.
ولو عاوز تعرف تفاصيل اكتر عن ضيق القناة العصبية تقدر تشوف الفيديو ده

طيب اي هي أعراض ضيق القناة العصبية القطنية

1. تنميل وألم في الرجلين خصوصا مع المشي
2. فقدان التوازن مع المشي
3. فقدان الإحساس بالأطراف

واي هي أعراض ضيق القناة العصبية القطنية الخطيرة.

1. عدم تحكم في البول أو البراز.
2. سقوط في القدم.
3. ضعف جنسي.
4. متلازمة ذيل الفرس بس هي حالة نادره جدا.

طيب اي هي أسباب ضيق القناة العصبية القطنية ؟

1. الزيادة في العمر عشان كل ما بنكبر كل ما مرونة الغضاريف بتقل وممكن انه يحصلها جفاف ويقل حجمها وساعتها ضيق القناة العصبية القطنية يحصل.
2. التهاب أو تضخم في المفاصل المجاورة للفقرات.
3. عوامل وراثية .
4. كسور العمود الفقري .

اي هو علاج ضيق القناة العصبية القطنية ؟

،بس قبل ما نبدأ في اي هي طريق العلاج نفسها لازم نعرف خطوة أهم من العلاج وهي التشخيص الصح ، عشان لو متشخصتش صح فانت كدا لسه موصلتش لعلاج المشكلة، والتشخيص بيكون عبارة عن 

• سماع شكوى المريض كويس جدا
• الفحص السريري
• الاشاعات اللي بتساعدنا اننا نأكد الشكوى والفحص السريري.

اما طرق علاج ضيق القناة العصبية القطنية عبارة عن :

1. علاج تحفظي اللي هو العلاج الدوائي والعلاج الطبيعي
2.  التردد الحرارى .
3.  حقن جذور الاعصاب
4. التدخلات الجراحية محدودة التدخل زي الميكروسكوب الجراحي أو زي الجراحة بالمنظار
   

ومتقلقش من علاج ضيق القناة العصبية القطنية لان %90 من حالات ضيق الفقرات القطنية علاجها بيكون تحفظي ،
يعني عن طريق العلاج الدوائي والعلاج الطبيعي ، بس عشان علاج ضيق القناة العصبية القطنية يكون فعلا مفيد لازم يكون التشخيص صح وكمان قبل ما يحصل اي مضاعفا خطيرة .
اما بالنسبة للتدخلات الجراحية محدودة التدخل فبتكون للحالات الشديدة جدا ، يعني للناس اللي ظهر عليهم اعراض خطيرة زي : 

1. عدم تحكم في البول أو البراز.
2. سقوط في القدم.
3. ضعف جنسي .
4. عدم الاحساس بمنطقة معينة في الجسم.

لو عندك أعراض ضيق القناة العصبية القطنية لازم تلحق نفسك في أسرع وقت وتروح لدكتور متخصص في جراحة العمود الفقري عشان تتعالج صح من البداية.
ولو عاوز تعرف تفاصيل اكتر عن طرق علاج ضيق القناة العصبية القطنية تقدر تتواصل معانا من خلال رسايل الصفحة او من خلال الواتساب 01000120118