الانزلاق الغضروفي القطني والحمل

الانزلاق الغضروفي القطني والحمل

ساعات في امهات حوامل بيسئلونا ليه قبل الحمل مكنش عندي اي الم اسفل الضهر ولا اي اعراض للانزلاق الغضروفي القطني لكن بعد الحمل اكتشفت ان عندي انزلاق غضروفي قطني ومسببلي الم شديد مع الحمل , ياترا اي السبب في الانزلاق الغضروفي اللي حصلي .

خلينا عارفين ان الطبيعي بيكون في الم اسفل الضهر وقت الحمل ودا بسبب : 

• زيادة الوزن وزيادة الضغط علي الحوض والفقرات القطنية .
• التغيرات الهرمونية اللي بتسبب ارتخاء الاربطة والمفاصل .
• وضع الجنين في بطن الام بيخلي العمود الفقري منحني للامام ودا بيزيد الضغط علي الفقرات
• الانقباضات اللي بتحصل في الرحم بتزيد من الم الضهر , لان الرحم مرتبط باربطه في الحوض , فاي حركة للجنين او انقباضات في الرحم هتزود من الالم والضغط علي الفقرات

فلو كان عندك انزلاق غضروفي بسيط ومش حاسه بيه فبعد الحمل هيزيد الالم وهتبدأي تحسي بيه أكتر

طب هتحسي بايه لو عندك انزلاق غضروفي قطني مع الحمل ؟

1- الم شديد جدا في اسفل الضهر , الشكشكة والتنميل والحرقان في الرجل ( آلام عرق النسا )
2- هتحسي بضعف شديد جدا في عضلات الضهر وانك مش قادرة تتحركي 

طيب لو عندك انزلاق غضروفي من قبل ما تفكري في الحمل , هل تقدري تاخدي خطوة الحمل ؟

أحنا مش بنرجح موضوع الحمل وانتي عندك انزلاق غضروفي غير لما تكوني اتعالجتي بشكل كامل من الانزلاق الغضروفي ودا لكذا سبب
ان طبعا الحمل بيزود الضغط علي الفقرات القطنية , فالم انزلاق الغضروف اللي عندك هيكون اضعاف اللي انتي حاسه بيه قبل الحمل

• أن فيه بعض الادوية للانزلاق الغضروفي ممكن انها تأثر عليكي وعلى الجنين لانها ممكن تبقى مسكنات قوية ، وتحديدا في اول شهور الحمل
• إننا مع الانزلاق الغضروفي القطني بنحتاج نعمل اشاعات كتيرة جدا واللي ممكن انها تكون خطيرة على صحتك وصحة الجنين
• دا غير ان تمارين العلاج الطبيعي ممكن تكون صعبه ومتقدريش تعمليها وممكن وجود الحمل يمنعها من تمارين مهمه لتقوية الضهر

عشان كدا دايما بننصح كل ام اننا نتعالج من الانزلاق الغضروفي القطني الأول وبعدها نقدر ناخد خطوة الحمل  

طيب انتي حامل خلاص وعندك انزلاق غضروفي قطني ومسببلك آلام تقدري تعملي اي ؟

• لازم نتابع مع دكتور متخصص في العمود الفقري عشان يكتبلنا أدوية مناسبة مع الحمل
• اننا نتجنب أي مجهود ممكن انه يزيد الضغط والوزن على الفقرات القطنية
• اننا نتأكد من الراحة ونتجنبي الحركات المفاجئة
• والاهم اننا بعد الولادة ان شاء الله نبدأ نعالج الانزلاق الغضروفي القطني صح

طيب اي هو اصلا علاج الانزلاق الغضروفي القطني ؟

1- العلاج التحفظي اللي بيكون عبارة عن علاج دوائي وعلاج طبيعي
والعلاج التحفظي دا بيعالج 90% من حالات الانزلاق الغضروفي القطني، وعلاجهم بيكون بشكل نهائي بمعنى انهم مش بيحتاجوا أي طريق تانية زي التردد الحراري وحقن جذور الاعصاب او حتى شفط او حقن للغضروف 

2- الإجراءات محدودة التدخل زي 

• التردد الحراري
• حقن جذور الاعصاب
• استئصال الانزلاق الغضروفي القطني بالميكروسكوب
• استئصال الانزلاق الغضروفي القطني بالمنظار

والعلاج دا بنحدده على حسب درجة الانزلاق الغضروفي القطني اللي عند المريض وكمان الاعراض اللي بيحس بيها

3- الجراحة التقليدية لاستئصال الانزلاق الغضروفي القطني  

و لو عاوزه تعرفي معلومات اكتر عن خطة العلاج الكاملة للانزلاق الغضروفي تقدري تشوفي الفيديو دا مع دكتور علي يسري القاضي

والمهم لازم لو انتي حامل وعند انزلاق غضروفي قطني تتابعي مع دكتور متخصص في العمود الفقري عشان لازم يكتبلك ادوية مناسبة ومتضرش الجنين , ولو كنتي لسه بتفكري في خطوة الحمل , الافضل لصحتك انك تتجنبي الخطوة دي لحد ما تتعالجي صح من الانزلاق الغضروفي .