عملية الانزلاق الغضروفي القطني وتثبيت الفقرات

كتير من مرضى الانزلاق الغضروفي القطني من الدرجات المتقدمة , بيفكروا وبيسألوا هو انا لو هعمل عملية استئصال للانزلاق الغضروفي القطني لازم اعمل معاها عملية تثبيت الفقرات؟
طيب وبعد كدا هتحرك بعدها ازاي ؟ هتكون مؤلمة وهحس بيها ولا لا ؟

فتعالوا نعرف سوا 

هو كل اللي بيعاني من الانزلاق الغضروفي القطني لازم يعمل تثبيت فقرات؟ 

الإجابة هي لا، تثبيت الفقرات بيتعمل لحالات معينة بس والحالات دي بيتعملها تثبيت للفقرات عشان نتأكد ان مشكلة الانزلاق الغضروفي القطني مش هتحصل مرة تانية، طيب يا دكتور 

1. لو كان المريض من النوع اللي بيشيل اوزان كثيرة جدا سواء في حياته اليومية ، أو دي كانت طبيعة شغله ، او لو المريض مش هيقدر انه يلتزم بشكل تام بكل التعليمات اللى بتتقاله ، فى الوقت دا تثبيت الفقرات بيكون أفضل وأحسن للعيان وده على فكره مش هيأثر نهائي على الحركة.
2. و لو مريض الانزلاق الغضروفي القطني كان وزنه زايد و هيكون صعب عليه انه يقلله قبل العمليه ، فوقتها بردو بنحتاج اننا نعمل تثبيت للفقرات ، لأن الوزن الزايد بيأثر جدا على الفقرات القطنية والضهر بشكل عام .
3. أو لو كان المريض عنده مشكلة تانية مع الانزلاق الغضروفي القطني زى تزحزح الفقرات القطنية ، وتزحزح الفقرات بشكل سريع معناه ان فقرة من الفقرات الموجودة في العمود الفقري بيكون فيها عدم ثبات أو لخلخة ، ودا بيخلي الفقرة تتحرك من مكانها بدرجات معينة ، فساعتها بيفضل اننا نعمل تثبيت للفقرات عشان نضمن ان ميحصلش للمريض أي مشاكل و كمان عشان نحافظ على العمود الفقري من مشكلة زي تزحزح الفقرات .  
   

ودي كلها أسباب بتخليني انا كجراح عمود فقري اعملك تثبيت للفقرات مع استئصال الغضروف القطني 

طيب يا دكتور هو انا لو عملت تثبيت للفقرات مع عملية الانزلاق الغضروفي القطني كدا انا مش هقدر امشي واتحرك واعيش حياتي زي الأول؟

لا طبعا، تثبيت الفقرات لما بيتعمل صح ويكون المريض فعلا محتاجه فهو مش هيأثر على حياته ابدا وكمان هيقدر في نفس يوم العملية يقوم ويمشي بنفسه ويرجع بيته كمان .
فتثبيت الفقرات مش بيمنع المريض ابدا من الحركة ، لأن ضغط الحركة بدأ انه يتوزع على باقي الفقرات بالتساوي والمريض هيقدر يتحرك عادي جدا بعدها

الفكرة كلها ان المريض يلتزم بكل التعليمات اللي هتكون موصفة ليه وكمان يلتزم بعلاج طبيعي صحيح مع دكتور علاج طبيعي متخصص في العمود الفقري وساعتها ان شاء الله هيقدر انه يرجع لحياته الطبيعية أسرع ومش هيعاني من أي مشاكل .
و هنا لازم ناخد بالنا ان في الفترة الأخيرة بدأت تنتشر معلومات غلط كتيرة عن تثبيت الفقرات زي ان :  

• تثبيت الفقرات ممكن انه يتعمل بالميكروسكوب الجراحي
• تثبيت الفقرات ممكن انه يتعمل بالمنظار
• تثبيت الفقرات ممكن زي ما قلنا في المقال انه يمنعك من الحركة أو السجود فى الصلاه او ممارسة الرياضة
• وإن تثبيت الفقرات لازم تعمله لو هتعمل استئصال للغضروف القطني 
  

كل دي معلومات غلط عن تثبيت الفقرات ، ونصيحة مني انا كجراح عمود فقري لازم تعرف أي هو الصح فعلا من اهل التخصص لان ده هيساعدك تعرف فعلا امتى هتكون محتاج لتثبيت الفقرات ، وامتى مش هتكون محتاج إنك تعمله وكمان هيقدر انه يديلك خطة علاج كاملة تساعدك فعلا في علاج المشكلة اللي عندك سواء كانت المشكلة دى انزلاق غضروفي قطني أو اى مشكلة تانية فى العمود الفقري .