دكتور علي القاضي > من حقك تفهم > امتى تحتاج عملية الانزلاق الغضروفي القطني؟
اعرف عمودك الفقري
ليه رقبتك ممكن توجعك ؟
ليه ممكن تحس بوجع في اخر ضهرك
يعني ايه غضروف؟
١٠ أسباب للانزلاق الغضروفي القطني و عرق النسا
عيان الإنزلاق الغضروفي القطني اول ما بيسمع كلمة عملية بتبدأ تجيله حالة من الرعب والخوف ، وبيقعد يدور على أي علاج بديل عشان يتجنب العملية الجراحية ، زي كي غضروف وشفط الغضروف و تبخير الغضروف ، والعلاجات دي هي نوع علاج محدود جدا وبيتعمل لحالات معينة جدا تقدر تعرفها من هنا ، وكمان بقينا نسمع عن طرق تانية كتيرة زي شد الفقرات أوعلاج الغضروف بالعصا واللي بيكون ليها تأثير سلبي جدا على المريض . و كل العلاجات دي مريض الانزلاق الغضروفي القطني بدأ أنه يتجه ليها عشان يتجنب موضوع العملية ، وموضوع ان العملية ممكن تسببله شلل، طيب عشان انت من حقك تفهم خليني اقولك معلومة مهمه جدا عن عملية الانزلاق الغضروفي القطني . إن عملية الإنزلاق الغضروفي القطني مش هتعمل شلل ، اللي هيعمل شلل أن المريض يستنى على حالته بدون علاج صحيح ، لان وقتها هتبدأ الاعراض اللى عنده تزيد ويبقى ليها مضاعفات خطيرة جدا وساعتها التدخل الجراحي هيكون هو الحل الوحيد ليه، ومش هينفع معاه لا علاج دوائي ولا علاج طبيعي ولا تردد حراري . و خلينا بقى دلوقتى نعرف ايه هى المضاعفات دي عشان أولا نتجنب انها تحصل ، وتاني حاجه عشان نعرف ازاى نلحق نفسنا ونحاول اننا منتاخرش فى علاجها ، لان الاعراض دي مش بس هتأثر عليك لا دي كمان بتأثر على نتيجة العملية . - اول حاجه لو ابتديت تحس بعرجه في رجلك ، بمعني انك مبقتش عارف تمشي زي الأول ، أو بتكون حاسس ان الجزمة او الحاجة اللي بتلبسها في رجلك هتقع منك ، وده معناه ان ابتدأ يحصلك حاجه اسمها سقوط قدم نسبي طيب
سقوط القدم باختصار هو لما متكنش قادر انك ترفع مشط رجلك لفوق وانت بتتحرك ، وكمان ممكن تكون قاعد وتجرب تحرك مشط رجليك الاتنين هتلاقى ان فى مشط رجل أضعف من التاني وان فيه رجل أضعف من التانية ، ودي من اعراض الانزلاق الغضروفي القطني الخطيرة جدا لان العصب بتاعك كده بدأ يحصله ضمور . - النقطة التانية لو ابتديت تحس ان الاحساس في رجلك بقي مختلف عن الرجل التانية ، طيب ازاي يا دكتور؟ يعني لو جربت مثلا إنك تشك رجلك اللي فيها الوجع شكة بسيطة فأنت مش هتحس بالشكة دي او احساسها هيكون ضعيف عن رجلك السليمة ، و دا معناه ان العصب الحسي في رجلك اللي بيكون مسؤول عن المنطقة دي ابتدأ يتأثر ومبقاش قادر انه يوصل الإحساس من كثر ما الانزلاق الغضروفي القطني بقي ضاغط على العصب بشكل كبير جدا. - آخر نقطة و اللى تعتبر اخطرهم و هي صعوبة التحكم في البول والبراز ، لو ابتديت تحس ان إخراج البول والبراز بقي صعب عندك ومبقاش زي الاول او انك ما بتحسش بنزول البول أو البراز . و هى دى المضاعفات اللى بتقول ان الانزلاق الغضروفى القطنى اللى عندك دخل فى مرحلة خطيرة ماينفعش انك تسكت عليها ، و لازم إنك تعمل عملية الانزلاق الغضروفي القطني قبل ما يعدى عليك 48 ساعة من وقت احساسك بالمضاعفات دى ، عشان نلحق العصب اللي اتضرر بشكل كبير جدا قبل ما يضمر بشكل نهائي . و لو انت جربت كل طرق العلاج التانية زي العلاج الطبيعي والعلاج الدوائي ومجابتش معاك نتيجة ، وبدأ يبقى عندك الاعراض دي وخايف من العملية و بتأجل خطوة انك تاخدها، فنسبة أن يحصلك ضعف في الحركة دائم وعدم تحكم في البول والبراز دائم بتكون من 10 الى 15 % ، و هو دا الشلل اللي المريض خايف منه اصلا ، وساعتها حتى لو عملت عملية الانزلاق الغضروفي القطني نسبة رجوعك لحياتك الطبيعية وان رجلك تبدأ تتحرك تاني او تتحكم في البول والبراز بتقل جدا .
و فى النهاية عاوز اوضحلك ان عملية الإنزلاق الغضروفي القطني هي أسهل عملية ممكن تعملها في العمود الفقري وأن عملية استئصال الغضروف القطني سواء بالمنظار أو الميكروسكوب الجراحي فهي أساس جراحات العمود الفقري، وأن نسبة نجاحها من 93 الي 95%، وخليك عارف ان خوفك من أن العملية ممكن تعملك شلل او إنك تطلع على كرسي متحرك دي نسبتها اقل من نص فالمية من مية، و لو قارنها مع نسبة المضاعفات اللي هتحصل لو معملتش العملية فهي من 10 ل 15% . عشان كدا دايما بنقول إنك لازم تعرف أي هو الصح وتفكر فيه بعقلك مش بمشاعرك ، نسبة المضاعفات لو قررت إنك متعملش العملية بتكون عالية جدا وبتكون أكثر من قرار إنك تعملها ، ونسبة أن يحصلك عجز بتزيد كل ما بتسيب الانزلاق الغضروفي القطني ضاغط على العصب لفترة أطول . فبلاش نخلي الخوف يتحكم فينا ويتحكم في القرارات الصح اللي ممكن نعملها عشان نعيش حياة طبيعية من غير أي ألم، خطوة العملية لو كنت محتاجها فعلا فهي هتمنع عنك مخاطر كثيرة وهتضمنلك حياة طبيعية.
