درجات الانزلاق الغضروفي القطني وطرق علاجها

الانزلاق الغضروفي مشكلة ناس كثيرة متعرفش ان ليها درجات والدرجات دي بتخلي طرقة العلاج مختلفة تماما لكل حاله ، يعني في مريض ممكن ينفع معاه العلاج الدوائي ، ومريض تاني مينفعش معاه العلاج ده رغم ان هما الاتنين عندهم انزلاق غضروفي قطني

ودرجة الانزلاق الغضروفي القطني هي الحالة او الشكل اللي بتوصف المرحلة اللي فيها الغضروف القطني وهى كمان اللى بتحدد الاعراض اللي بيحس بيها المريض ، و الانزلاق الغضروفي بيكون ليه 4 درجات ، و تعالوا نفهم مع بعض كل درجة بالتفصيل  

الدرجة الأولى: اللي هي انتفاخ أو حركة بسيطة في الغضروف ، وهنا المادة الجيلاتينة بتكون اتحركت من مكانها بشكل بسيط جدا بس مش بتكون ضغطت على جذور الاعصاب أو الحبل الشوكي 

الدرجة التانية بعد ما الغضروف انتفخ شوية بيبدأ يحصله بروز واضح اكثر وهنا الحلقة الليفية بيبدأ يحصل فيها تشققات نتيجة الضغط اللي حاصل عليها من الماده الجيلاتينيه ، وبدأت انها تقرب من ا​​لأعصاب أكثر وتضغط عليها بشكل بسيط . 

و في الدرجة الأولى والتانية الألياف بتاعة الغضروف بتكون لسه سليمة ، و مفيش انفجار أو انزلاق غضروفي قطني كامل والحالات دي بينفع معاها العلاج الدوائي والعلاج الطبيعي بنسبة 90%. 

أما بالنسبة للدرجة التالتة و اللي هي خروج الغضروف ، فاللى بيحصل هنا ان الحلقات الليفية بتكون بدأت تتقطع بشكل كامل وكمان الضغط على الأعصاب بيزيد مع الوقت . 

اما الدرجة الرابعة و و اللى من اكبر درجات الانزلاق الغضروفي القطني ، و هي انفجار الغضروف ودي أسوأ درجة من درجات الانزلاق الغضروفى القطنى ، وده لان جزء من المادة الجيلاتينية بيكون خرج وانفصل عن باقي المادة الجيلاتينية اللي جوا الغضروف بشكل كلي ، و الماده الجيلاتينيه بتكون كمان وصلت للأعصاب والقناة الشوكية ، و المادة دي بتكون عاملة زى المادة الكاوية وهنا بنلاقى ان المريض بدأت تظهر عليه اعراض شديده جدا زي السقوط في القدم وعدم التحكم في البول والبراز  

وهنا لازم نقف ونسأل سؤال مهم ، يا ترى هي الدرجة التالتة والرابعة اللي هم اصعب درجات الانزلاق الغضروفى القطني علاجهم هيكون العملية الجراحية بس ؟ 

الإجابة لا ، لأننا اول حاجه لازم نجرب العلاج الدوائي الأول حتى لو عيان كان من الدرجات المتقدمة ، العلاج الدوائي بيكون لمدة 3 أسابيع وبنبدا نشوف درجة استجابة الغضروف القطني للعلاج الدوائي
لو ابتديت تحس بتحسن والاعراض بدأت انها تخف فأحنا هنستمر معاك في العلاج التحفظي اللي هو العلاج الدوائي وهنبدأ اننا نعمل معاه علاج طبيعي عشان نقوي عضلات الضهر ، وبعد 3 اسابيع كمان بنرجع ونقيم الوضع تاني .

و بعد 6 أسابيع، هتجيلي هسألك سؤال  

هل أنت عارف تعيش حياتك الطبيعية زي الاول وقادر انك تقوم بالروتين بتاعك اليومي بدون اي مشاكل ؟ 

لو كنت عارف تعيش حياتك بشكل طبيعي فمبروك انت خلاص عالجت الانزلاق الغضروفى القطني ، و مش محتاج لأي تدخلات جراحية ،
أما لو كانت الاجابة لا ، فهنا لازم نحدد هل انت مش عارف تعيش حياتك بشكل طبيعى عشان حاسس بألم بسيط لو كانت اجابتك اه ، فوقتها ممكن نجرب التردد الحرارى و حقن جذور الاعصاب
اما لو كنت مش قادر تمارس حياتك بسبب الم شديد جدا او صعوبة شويه فى الحركة فلازم تفهم ان دى رسالة من جسمك بيقولك الحقني قبل ما ابدأ ادخل في مرحلة الخطورة وساعتها هنبدأ نفكر في باقي الطرق المختلفة لعلاج الانزلاق الغضروفي نفسه زي استئصال الغضروف القطني بالميكروسكوب لو كانت الأعراض فعلا شديدة
فعشان كدا مهم جداجدا أن مريض الانزلاق الغضروفي القطني بالذات يكون عارف ايه هى درجة الانزلاق الغضروفي اللي عنده ، لأن لو مكنش عارفها فكل العلاجات اللي هيكون بياخدها مش هتعالج المشكلة صح ابدا والاعراض مع الوقت هتزيد .
فبلاش تجرب على نفسك طرق العلاج المختلفة وانت مش عارف ايه هى اصلا درجة الغضروف اللي عندك لانك ممكن مع تشخيص صحيح وعلاج دوائي وعلاج طبيعي انك متحتجش ابدا لأي تدخل جراحي .