أعراض الانزلاق الغضروفي القطني

ازاي اعرف ان انا عندي ​​​أعراض الانزلاق الغضروفي القطني ؟ سؤال بيسأله ناس كثيرة جدا عندهم وجع في الرجل أو في آخر الضهر، فخلينا نتكلم النهاردة عن أعراض الإنزلاق الغضروفي القطني اللي بتحصل لأغلب العيانين وهنتكلم كمان عن أعراض الإنزلاق الغضروفي القطني الخطيرة ، بس لازم نقول الأول ان الإنزلاق الغضروفي القطني مشكلة لازملها تشخيص و فحص إكلينيكي سليم من دكتور متخصص فى العمود الفقري ، عشان يقدر يحدد هل الوجع اللى حاسس بيه فعلا سببه الانزلاق الغضروفى القطني ، ولا مشكله تانية و عملالك اعراض شبه اعراض الانزلاق الغضروفى ،  

و تعالوا دلوقتى نعرف ايه هى 

أعراض الانزلاق الغضروفي القطني؟

1. اول حاجه هنحس بوجع في الرجل وممكن يكون معاه وجع في أسفل الضهر، وساعات الوجع عند العيان يبدأ بوجع في أسفل الضهر وبعد أسبوعين الوجع كله بيتنقل للرجل واحدة أو رجلين.
2. او هنحس بنار أو شكشكة أو حرقان في الرجل كلها بداية الفخد من ورا لغاية صوابع الرجل ودي اللي بنسميها أعراض عرق النسا.
   
   
3. هنحس بوجع في الرجل كل ما حاولنا نمشي او نتحرك شوية او نعمل أي مجهود حتى لو كانت المسافة صغيرة أو المجهود بسيط.
4. ممكن نلاحظ اننا بنميل ضهرنا لناحية معينة واحنا قاعدين او بنمشي ، عشان نحاول نقلل من الوجع اللي بنحس بيه 
   

ودي كدا تعتبر الأعراض البسيطة اللى ممكن يحس بيها مريض الانزلاق الغضروفي القطني ،
و على الاغلب المريض هنا هيكون عنده انزلاق غضروفي قطني من الدرجة الأولى او التانية ،

و دلوقتى خلينى اقولك معلومة تطمنك ، و هى ان 99 % من مرضى الانزلاق الغضروفى القطني من الدرجة الاولى و التانية علاجهم بيبقى عن طريق العلاج التحفظي اللي هو العلاج الدوائي والعلاج الطبيعي .

واحنا كجراحين متخصصين في العمود الفقري في الحالات دي بنقول دايما ان لازم اول ما نبدأ نحس بالأعراض اللى قولناها دى، اننا ناخد خطوة الكشف المبكر عشان نضمن ان علاجنا يكون دوائي وكمان عشان نتجنب انه يحصلنا أعراض الإنزلاق الغضروفي القطني الخطيرة اللي ممكن انها توصلنا لا قدر الله لصعوبة كبيرة جدا في الحركة أو الشلل اللي عيانين الانزلاق الغضروفي القطني بيخافوا منه ، لإن المشكلة مع الوقت بتزيد وبتزيد معاها الاعراض اللى بنحس بيها 

طيب أي هي أعراض الانزلاق الغضروفي القطني الخطيرة !؟ 

1. اننا نحس بسقوط في القدم واللي هو اننا منبقاش قادرين اننا نرفع وش رجلنا من على الارض و احنا ماشين، وبنحس دايما اننا لو لبسنا حاجه في رجلنا انها هتقع مننا واحنا ماشيين ، والسقوط في القدم الأول بيبقى نسبي بعنى اننا لو لحقنا و عالجناه هنرجع تانى نمشي بشكل طبيعي ، لكن لو اتأخرنا فى العلاج فسقوط القدم وقتها هيبقى كلي وفرص اننا نرجع تانى نتحرك بشكل طبيعي بتكون اقل .
2. او نبدأ نحس بالعرج واحنا بنمشي، يعني هنلاقي نفسنا اننا بقينا بنعرج واحنا بنمشي ودا بيكون واضح جدا في شكل المشية بتاعة العيان طيب ليه دا بيحصل؟
   لان العيان لما يميل شوية بجسمه بيبدأ انه يحس براحة كبيرة جدا من الألم، نتيجة ان الضغط اللي كان على العصب بدأ انه يقل
   فالمريض هيلاقي نفسه بدون وعي بيمشي وهو مميل عشان يحس بشوية راحة من أعراض الإنزلاق الغضروفي القطني
3. او إننا نفقد الإحساس بمنطقة معينة في الرجل، يعني لو حاولنا اننا نشك المنطقة دي بدبوس فالمريض مش هيحس بالمنطقة دي نهائيا، وده بيحصل عشان العصب اللي بيكون مضغوط عليه من الانزلاق الغضروفي القطني بيكون انفعص بشكل كامل و بقي عامل زي الورقة بالضبط و مبقاش قادر انه يقوم بوظيفته .
4. آخر حاجة هي اننا بقينا نلاقي صعوبة في التحكم في البول أو البراز وممكن انها تتطور وتوصل لعدم تحكم كامل في البول أو البراز لو اتأخرنا فى العلاج . 
   

كل الأعراض دي لو حسينا بيها لازم اننا نروح بسرعه لدكتور متخصص عشان نقدر نلحق المضاعفات دي قبل ما تبقى دائمة، يعني هيكون عندنا سقوط دائم في القدم وكمان عدم تحكم دائم في البول والبراز و فى الحالة دى حتى لو عملنا العمليه ففرصة اننا نرجع لحياتنا الطبيعية بتكون اقل .

وفي النهاية احب اقولك ان انا كجراح عمود فقري مش هقولك انت عندك انزلاق غضروفي قطني و علاجك هو العملية، الا لو كنت من الحالات المتقدمة جدا اللي قلت عليها ، فبلاش اننا نخاف من ​​أعراض الانزلاق الغضروفي القطني ونحاول اننا نعرف أي هو سبب الألم عندنا واي هو العلاج الصح ليه .