الم في الرجل بعد عملية الانزلاق الغضروفي القطني  

الم في الرجل بعد عملية الانزلاق الغضروفي القطني  

بنسمع كتير عن ناس عملت عمليات في ضهرها وبعد فترة بنلاقيهم بيقولوا ان العملية مجابتش معاهم نتيجة والألم لسه موجود في رجلهم، دا بالعكس زاد أكثر ومفيش أي تحسن،
وكمان بيقولوا ان العملية ملهاش أي فايدة سواء كانت العملية عشان نعالج 

• الانزلاق الغضروفي القطني .
• أو تزحزح الفقرات القطنية .
• أو ضيق القناة العصبية القطنية . 
  

عاوز اقولكم أن دي فعلا متلازمة موجودة في الطب اسمها متلازمة فشل جراحات العمود الفقري أو
(failed back surgery syndrome) ، والمتلازمة دي بتعمل رعب كبير جدا للعيانين فخلونا نعرف أي هي المتلازمة دي واي هي أسبابها و ازاي نتجنب انها تحصل ، وخلونا نبدأ بأول نقطة وهي  

أي هي متلازمة فشل جراحة العمود الفقري أو (failed back surgery syndrome) ؟

بكل بساطة متلازمة فشل جراحة العمود الفقري هي رجوع الألم اللي كان عند المريض قبل العملية مرة تانية بعد العملية، و الالم ده اما بيكون بسبب المشكلة نفسها اللى عملنا عشانها العملية ، او سببه مشكلة جديدة بقت موجود بعد الجراحة.

و عشان نفهم الكلام ده اكتر خلينى اقولك مثال ، لو مريض كان عنده انزلاق غضروفي قطني عامله أعراض عرق النسا وراح عمل عملية استئصال الانزلاق الغضروفي القطني فهو ممكن يطلع من العملية مش حاسس بأي تحسن و اعراض عرق النسا لسه موجودة زي ما هي  

طيب اي هي أسباب فشل جراحة العمود الفقري ؟ 

متلازمة فشل جراحة العمود الفقري ليها 3 أسباب، اما بسبب الدكتور المتخصص أو الجراحة نفسها، أو بسبب مشاكل من المريض نفسه
وخلونا نبدأ بالم الرجل بعد عملية الانزلاق الغضروفي القطني بسبب الدكتور المتخصص أو الجراحة نفسها 

1 - ان المريض يكون عمل عملية جراحية هو مش محتاجها : 

بمعنى ان المريض ممكن يكون عنده انزلاق غضروفي قطني عامله وجع في رجله وفي نفس الوقت عنده التهاب في مفصل العجزي الحرقفي أو الاسم التاني ليه هو (عرق النسا الكاذب) ، فممكن ساعتها نتيجة التشخيص الغلط من الدكتور ان المريض يعمل عملية لاستئصال الانزلاق الغضروفي القطني وهو مش محتاجها لان الانزلاق الغضروفي القطني مش السبب فى الالم اللى المريض حاسس بيه ، وساعتها مليون في المية المريض هيخرج وهيحس بالوجع مرة تانية ، لأنه معالجش المشكلة الأساسية اللي كانت عملاله الوجع اللي هي التهاب المفصل العجزي الحرقفي .  

2 - ​ان الدكتور مش جراح عمود فقري متخصص بشكل كافي او معندوش خبرة كبيرة فى عمليات الانزلاق الغضروفى ولا معاه الادوات الحديثه اللى تخليه يقدر انه يعمل العملية :   

• فلو كان الدكتور اللى هيعمل العملية مش جراح عمود فقري ، فهو ممكن يغلط في المكان اللي هيعمل فيه العملية نتيجة قلة الخبرة اللي عند الدكتور بمعنى ان المريض ممكن يكون محتاج استئصال للغضروف القطني بين الفقرة الرابعة والخامسة ، والدكتور يعمل استئصال للغضروف اللي بين الفقرة التالتة والرابعة قطنية و فى الحالة دى المريض مش هيستفاد و هيخرج بعد العملية بنفس الوجع اللى كان عنده لانه معالجش الغضروف اللى عاملة الوجع اصلا .
• اما لو كان الدكتور جراح عمود فقري بس معندهوش خبرة كبيره فى عمليات الانزلاق الغضروفى او بيستعمل ادوات حديثة ، فهو ممكن يغلط فى تحديد الغضروف اللى هيستأصله نتيجة ان مفيش أجهزة تساعد الدكتور انه يتأكد من المكان الصح للعملية ،
  

او انه يتعامل مع الجراحة نفسها بعنف ودا ممكن يعمل 

• إصابات في الأغشية أو العضلات،
• أو ممكن الجراح ميشلش الغضروف كويس ، وده ممكن يسبب ارتجاع للغضروف مرة تانية ويعمل الم مرة تانية عند المريض .  
  

3 - ان المريض يكون محتاج انه يعمل استئصال للغضروف و تثبيت للفقرات : 

يعني ممكن المريض يكون عمل عملية استئصال للانزلاق الغضروفي القطني أو عملية توسيع للقناة العصبية، وكان محتاج انه يعمل معاها تثبيت للفقرات عشان الفقرات كان فيها لخلخة أو تزحزح بسيط ، بس نتيجة ان الدكتور مكنش متخصص وشخص المريض تشخيص غلط من البداية فهو معملش تثبيت وقت العملية ، فالمريض هيخرج من العملية و هو لسه حاسس بألم .

وبكده نكون خلصنا الأسباب اللي ممكن انها تعمل للمريض الم مرة تانية بعد العملية بسبب الدكتور نفسه أو بسبب مشكلة في الجراحة،

وخلونا دلوقتي نتكلم عن 

المشاكل اللي عند المريض نفسه اللي خلت الم الرجل بعد عملية الانزلاق الغضروفي القطني يرجع تاني 

1 - حالة المريض النفسية قبل العملية

الحالة النفسية للمريض ممكن انها تأثر على نتيجة العملية بشكل كبير جدا ، يعني العيان اللي بيكون متوتر أو عنده اكتئاب بيكون معرض أكثر انه يحس بآلام مرة تانية بعد العملية. 

2 - ان المريض ملتزمش بالتعليمات اللي بعد العملية الجراحية

احنا دايما كجراحين عمود فقري بنأكد على التعليمات اللي بعد العملية لإنها مهمة زي العملية بالضبط، زي ان 

• المريض ياخد باله من انه ميقعدش لفترات طويلة
• ان القعدة تكون بطريقة صح وكمان طريقة النوم تكون بشكل معين
•  وانه كمان ميشلش اوزان تقيلة
• وكمان لو المريض كان وزنه زايد لازم يقلل وزنه ، عشان يقلل الضغط على العمود الفقري ، لأن العمود الفقري هو اللي بيكون مسؤول عن انه يشيل وزن الجسم ، فساعتها 100% هيكون عند المريض وجع في الضهر مرة تانية.  
  

كل دي حاجات لو المريض ملتزمش بيها بعد العملية احتمال كبير جدا انها تخليه يحس بالألم مرة تانية . 

طيب ازاي نقدر نتجنب أنه يحصلنا مشكلة فشل جراحة العمود الفقري؟ 

اننا نختار دكتور متخصص وفاهم كويس في المجال عشان يقدر يحدد فعلا أي هو سبب ألمك ويقدر يحطلك خطة العلاج المناسبة ليك. 

• إننا نلتزم بالتعليمات اللي الدكتور المتخصص هيقولهالنا لأنها مهمة زي العملية.
• اننا بعد ما عملنا الفحص الإكلينيكي السليم ورحنا لدكتور متخصص وطلع العلاج الوحيد لينا هو العملية فنحاول نتفهم أن العلاج دا هو فعلا الحل الأخير عشان نعالج المشكلة اللي عندنا . 
  

طيب لو المريض خلاص عمل عملية و للاسف العملية فشلت او حس بعدها بنفس الالم اللى كان بيحس بيه المفروض يعمل اى ؟ 

خلينى اقولك ان للاسف مفيش خطوات علاج ثابته لفشل عمليات العمود الفقري ، بمعنى ان على حسب المشكلة اللي حصلت و اتسببت فى فشل العملية هيتحدد العلاج ، بس نقدر نقول بشكل عام ان العلاج بيكون عبارة عن  

1. فحص اكلينيكي سليم مع دكتور متخصص قادر انه يعرف اي هو سبب رجوع الألم ليك مرة تانية بعد العملية .
2. علاج دوائي كامل مع علاج طبيعي مع دكتور علاج طبيعي متخصص في العمود الفقري .
3. التردد الحراري
4. حقن جذور الاعصاب. 

خليك متطمن انك طالما مع دكتور متخصص فمش هيكون في قلق من مشاكل زي دي ، وبنأكد عليك مرة تانية ان مشاكل العمود الفقري بشكل عام علاجها بيكون عن طريق التشخيص و الأدوية والعلاج الطبيعي من دكاترة متخصصين ، ولو عندكم اي استفسار تقدروا تتواصلوا معانا على رقمنا 01000120118