هل التردد الحراري علاج أم مسكن؟

التردد الحرارى لعلاج الانزلاق الغضروفي القطني واحدة من طرق العلاج اللي اشتهرت في الفترة الأخيرة جدا وبقينا نسمع انها علاج نهائي لمشكلة الانزلاق الغضروفي القطني وإنها الحل المثالي عشان تتخلص من الغضروف القطني ومن آلام عرق النسا، بس يا ترى هو التردد الحراري علاج ام مسكن؟
وهل التردد الحراري علاج نهائي للغضروف؟ ومين اللي هيستفاد من التردد الحراري؟

نبدء باول سؤال هل التردد الحراري علاج نهائي للغضروف؟

التردد الحراري هو مجرد مسكن ،يعني مش علاج نهائي لمشكلة زي مشكلة الانزلاق الغضروفي القطني .

بس الفكرة كلها انه مسكن قوي شوية بيتحقن في العصب عشان يسكن الآلام اللي عندك بشكل سريع جدا على عكس المسكنات العادية اللي بتاخد شوية وقت عشان مفعولها يبدأ يظهر ، يعني نفهم من هنا ان التردد الحراري زيه زي أي مسكن بينفع لناس معينة وناس تانية ، والمفاجأه هي ان 90% من اللي بيعملوا حقن وتردد حراري هم في الحقيقه مش محتاجينه وهيتحسنوا بالعلاج الدوائي والعلاج الطبيعي
وتقدر تعرف معلومات اكتر عن الحقن والتردد الحراري من الفيديو دا  

طب مين هما الناس اللي هينفع معاهم الحقن التردد الحرارى لعلاج الانزلاق الغضروفي القطني؟

1. حالات الانزلاق الغضروفي القطني اللي من الدرجة الأولى والتانية وتحديدا اللي بيكونوا بدأوا ياخدو علاج دوائي ويعملوا علاج طبيعي ، و بدأوا يتحسنوا بس التحسن مش بنسبة كبيرة ولسه عند المريض آلام بسيطة باقية، فممكن ساعتها إننا نعمل التردد الحراري عشان المريض يتخلص من الآلام دي .
2. مريض الانزلاق الغضروفي القطني اللي بدأ علاج طبيعي بس لسه عنده آلام ، و اللى بيخلية يحس بألم خلال جلسة العلاج الطبيعي ، ففي الحالات دي بنعمل التردد الحراري عشان نقدر نخفف الألم شوية عند المريض ، لاننا منقدرش نخلي مريض الانزلاق الغضروفي القطني يعمل علاج طبيعي وهو عنده وجع ، عشان كدا بنوجه المريض أنه يعمل تردد حراري وبعدها هيقدر انه يكمل جلسات العلاج الطبيعي بدون أي مشاكل .
3. اخر حالة بنعمل فيها التردد الحرارى لعلاج الانزلاق الغضروفي القطني هي لما المريض يكون محتاج عملية جراحية لاستئصال الانزلاق الغضروفي القطني بس حابب انه يجرب التردد الحراري كوسيلة أو حل أخير قبل ما يعمل العملية الجراحية . 
   

غير كدا التردد الحراري مش هيساعدك في انك تحل مشكلة الانزلاق الغضروفي القطني

وهنا ممكن حد يسألني ويقولي ليه يا دكتور التردد الحراري مش هيساعد كل الحالات ؟ , مع ان انا كان عندي انزلاق غضروفي قطني عاملي أعراض صعبة جدا ولما جربت التردد الحراري الألم خف بدرجة كبيرة جدا ولو الالم رجع تاني هروح اعمل جلسه كمان وساعتها الالم هيروح في ساعتها

هنا انا كجراح متخصص في العمود الفقري هقولك مفكرتش للحظة هو الألم بيرجع ليه مرة تانية بعد الجلسة؟

خليني اقولك بكل بساطة إنك كدا مش بتعالج مشكلة الانزلاق الغضروفي القطني نفسها، انت كدا بتعالج الآلام اللي انت بتحس بيها بس ، و الانزلاق الغضروفي القطني اللي زي ما احنا عارفين انه بيكون ضاغط على جذر من جذور الاعصاب، والضغط دا مش بيقف حتى بعد ما تعمل التردد الحراري

ودا اللي بيخليك بعد فترة تحس بالألم مرة تانية، وممكن كمان حالتك توصل للأعراض الخطيرة اللي علاجها الوحيد بيكون هو التدخل الجراحي ونسبة نجاح الجراحة وقتها كمان مش بتكون 95% لا دي بتقل جدا ، وتقدر تعرف الاعراض الخطيرة للانزلاق الغضروفي من الفيديو دا  

فأنا كجراح عمود فقري مش ضد التردد الحراري لا دا بالعكس، انا بخليك تعمل التردد الحراري بس الشرط الوحيد هو إنك تكون من الحالات اللي ذكرناها فوق ، وساعتها التردد الحراري هيكون علاج نهائي لمشكلة الانزلاق الغضروفي القطني. 
فبلاش إنك تخاطر بنفسك وتوصل نفسك لمرحلة الخطر ، وعشان تقدر تتعالج صح وتاخد علاج صح وتعرف فعلا أي هي المشكلة اللي عندك لازم تروح لدكتور متخصص في العمود الفقري عشان يقدر يعملك فحص اكلينيكي سليم ، لانه هو اللي هيحددلك انت محتاج تردد حراري ولا لا