هل عملية الانزلاق الغضروفي القطني تسبب شلل ؟

هل عملية الانزلاق الغضروفي القطني تسبب شلل ؟

ناس كثيرة بيكون عندها انزلاق غضروفي قطني ، و اعراضه بتوصل معاهم لدرجة انهم مش بيكونوا قادرين يتحركوا أو يمارسوا يومهم بشكل طبيعي ورغم كل ده فهما مش بياخدوا قرار العملية الجراحية عشان بيكونوا خايفين منها لانهم سمعوا انها ممكن تعملهم شلل او انهم ممكن يقضوا باقي حياتهم على كرسي متحرك أو على السرير

فتعالوا نفهم بكل بساطة

هي عملية استئصال الانزلاق الغضروفي القطني ممكن تعمل شلل؟

الإجابة على السؤال ده وعلى غير المتوقع ان عملية استئصال الغضروف القطني مش بتسبب شلل ،لكن اللي ممكن يعملك شلل هو الانزلاق الغضروفي القطني نفسه .

وتقدر تسمع الفيديو ده عشان تتاكد بنفسك ان الانزلاق الغضروفي القطني هو اللي ممكن يعملك شلل مش العملية 

و خلينى اقولك ان انا كجراح متخصص في العمود الفقري متفهم خوفك من العملية بس تعالي واحده واحده افهمك ليه الانزلاق الغضروفي القطني هو اللي هيعملك شلل مش العملية الجراحية ، و ده لان

الانزلاق الغضروفي القطني سببه هو أن المادة الجيلاتينية اللي جوا الغضروف بدأت تتحرك من مكانها و ضغطت على الأعصاب ، والعصب المضغوط ده بيكون مسؤول عن الإحساس أو الحركة في مكان معين فى جسمنا ، فلما بينضغط على العصب بيبدأ جسمك يوصلك إشارات ان في مشكلة عندك ، فممكن تبدأ تحس بتنميل وشكشكة أو حرقان في الرجل ،و مع اهمالك للاعراض دى بسبب خوفك من العملية فيبدأ العصب ينضغط اكتر ، و بدل ما كنت بتحس بأعراض بسيطة هتبدأ تحس بأعراض تانية أشد 

طيب اي هى خطورة الانزلاق الغضروفي القطني ؟ اوالاعراض الخطيرة للانزلاق الغضروفي القطني ؟  

• انك تبتدي تعرج وانت بتمشي فدي بتكون علامة لسقوط قدم نسبي.
• او انك تحس بصعوبة في التحكم في البول والبراز أو صعوبة في اخراجه.
• او انك تلاقي ضهرك بيتعوج لناحية واحدة ومبقتش قادر تقعد في وضعية ثابتة و بتحتاج تغير وضعيتك كل شوية

و هنا لازم تاخد بالك من حاجة ان المرحلة اللى انت وصلتلها دى ماينفعش انك تفكر تجرب العلاج الدوائي او حقن جذور الاعصاب و التردد الحرارى ، و ماينفعش تقول انا مش عاوز اعمل العملية أو حتى تأجلها لان فى الوقت ده هيكون قدمنا 48 ساعه عشان نقدر نلحق العصب ، قبل ما الاعراض دي تكون دائمة ، وده اللى لو حصل هو اللى هيوصل مريض الانزلاق الغضروفى للشلل
اما بقى بخصوص خوفك الزايد من العملية ، خلينى اقولك ان ده خوفك من العملية مالوش لازمه لان   

1. عملية الانزلاق الغضروفي القطني هي اسهل وابسط عملية جراحية ممكن انها تتعمل بالنسبة للجراحين
2. نسبة نجاح العملية بيكون من 93% ب 95% ولو مريض عرف انه محتاج العملية فعلا وعملها بسرعه نسبة النجاح بتزيد عن 95% كمان .
3. أن يحصلك شلل في عملية الانزلاق الغضروفي القطني دا نسبته 0.05% يعني حتى موصلتش ل 1% 

فبلاش اننا نبقى خايفين من إجراء سهل وبسيط بيتعمل بأدوات حديثة جدا ودرجة أمانها كبيرة , فمتخليش خوفك الزايد من العملية يعرضك لمضاعفات خطيرة , لازم تعمل العملية لو الدكتور اكدلك ان حلك الوحيد لعلاج الانزلاق الغضروفي اللي عندك هو العملية , والعملية لازم تكون مع دكتور جراحة العمود الفقري مش اي تخصص تاني عشان تضمن نجاح عمليتك