الغضروف المرتجع وأسبابه

ناس كتيرة بتكون خايفة من عملية الانزلاق الغضروفي القطني لإنهم سمعوا كثير عن ناس عملوا العملية ورجعلهم الغضروف مرة تانية بعد مدة من العملية ، فساعتها ممكن يفكروا انهم ميعملوش العملية لان كدا كدا الغضروف هيرجع ، ف يا ترى هو فعلا الانزلاق الغضروفي القطني ممكن انه يرجع تاني بعد العملية الجراحية؟ ولو رجع فهو بيرجع ليه؟ فخلونا نبدأ بأول سؤال وهو

هو الانزلاق الغضروفي القطني ممكن انه يرجع بعد العملية ؟ 

الإجابة هي اه ، الانزلاق الغضروفي القطني ممكن انه يرجع بعد العملية ، بس ده مش بيلغي فكرة العملية الجراحية لأن زي ما قلنا في مقال هل الانزلاق الغضروفي يسبب شلل؟ أن لو العيان كان محتاج للعملية ومعملهاش فهو فعلا ممكن لا قدر الله يجيله شلل ، طيب في الحالة دي المريض يعمل العملية ولا لا ؟ عشان نقدر نجاوب على السؤال دا لازم نعرف الأول

أي هي أسباب رجوع الغضروف بعد عملية الانزلاق الغضروفي القطني؟ 

1. أن مريض الانزلاق الغضروفي القطني كان محتاج لتثبيت الفقرات مع العملية و معملهوش :
   و اللى بيحصل في الحالة دي ان الفقرات بيكون فيها عدم ثبات ، وعدم الثبات أو اللخلخة دي مع الحركة هتعمل ضغط على الغضروف ، و المادة الجيلاتينية اللي جوا الغضروف هتبدأ انها تطلع من مكانها مرة تانية وتعمل للمريض انزلاق غضروفي قطني جديد ، عشان كده مهم جدا ان اللى يشخص الحالة يكون جراح عمود فقري عشان يحدد للمريض إذا كان هيحتاج لتثبيت الفقرات بعد استئصال الغضروف ولا لأ .
2. ان العملية تكون اتعملت بالجراحة التقليدية وبشكل غلط :
   واللي بيحصل هنا أن الدكتور ممكن يشيل جزء كبير من العضم وهو بيعمل العملية عشان يقدر انه يوصل للغضروف ، وده هيعمل ضعف ولخلخة في العضم ، و بسبب الضعف دا هيحصل ضغط برضو على الغضروف و دا هيخلي المادة الجيلاتينية تخرج من مكانها وتضغط على العصب مرة تانية وده بيكون بسبب اننا مخترناش دكتور متخصص في جراحة العمود الفقري ، وتاني حاجه اننا اخترنا نعمل العملية الجراحية بالطريقة التقليدية مش بالميكروسكوب الجراحي أو المنظار اللي بيمنعوا ان حاجه زي كدا تحصل .
3. عدم التزام المريض بالتعليمات الموصوفة بعد العملية الجراحية :
   اغلب مرضى الانزلاق الغضروفي القطني ميعرفوش ان التعليمات اللي بعد العملية بتكون مهمة زي العملية بالضبط وان التعليمات دي هي اللي هتساعد المريض انه يرجع لحياته الطبيعية ، عشان كدا تعالوا تعرف

اهم التعليمات ما بعد عملية الغضروف :

• نبعد عن اننا نشيل أوزان تقيلة جدا ، لان دا بيعمل ضغط واجهاد كبير جدا على الضهر وخصوصا على أسفل الضهر .
• ان المريض يلتزم بجلسات العلاج الطبيعي ، والجلسات دي هي اللي هتساعد المريض أنه يقوي عضلات ضهره وهتساعده ان يرجع لحياته الطبيعية أسرع .
• نبعد عن القعدة لفترات طويلة جدا بدون حركة ، لان دا بيأثر جدا على عضلات الضهر و بيتسبب فى ضعفها فالصح اننا نحاول نتحرك كل مدة وبلاش اننا نقعد لفترات طويلة . 
  

4 - النقطة الرابعة أن المريض يكون عنده عادات غير صحية بتساعد ان الانزلاق الغضروفي القطني يرجع مرة تانية زي  

• التدخين ، و اللي بيتسبب فى جفاف الغضروف وبيخلي الغضروف بدل ما يبقى لين وطري انه يبقى زي العضم
• الوزن الزايد اللي بيعمل ضغط كبير على الغضروف ، و دا اللى بيخلي الغضروف يرجع مرة تانية .  
  

بعد ما خلصنا الأسباب نقدر دلوقتي اننا نوصل للسؤال اللي سألناه في بداية المقال ، و هو

هل كدا المريض اللي محتاج انه يعمل عملية الانزلاق الغضروفي القطني يعملها ولا لأ ؟

و الاجابة هى ان لو بعد التشخيص الصحيح والفحص السليم عرفنا أن المريض خلاص مش هينفع معاه أي طريقة علاج تانية لازم يعمل العملية ، و دا عشان نتجنب انه يحصل في المستقبل 

• سقوط في القدم
• أو عدم تحكم في البول والبراز ، و وقتها لو اتأخرنا فى أننا نعالج الانزلاق الغضروفى ، المشاكل دي هتبقى دايمة ، وساعتها حتى نسبة نجاح العملية هتكون قليلة ودا عكس نسبتها لما تتعمل في الوقت الصح اللي بتوصل لحد 95%.  
  

المهم اننا: 

• نختار دكتور متخصص في جراحات العمود الفقري عشان نتأكد من التشخيص وكمان نتأكد أن العملية هتتعمل صح .
• و نختار اننا نعمل العملية الجراحية لاستئصال الانزلاق الغضروفي القطني عن طريق الميكروسكوب الجراحي أو المنظار عشان نضمن نجاح العملية أكثر وكمان بدون جرح كبير .
• و اننا لو كنا بندخن فنحاول اننا نبعد عن التدخين ونوقفه .
• ونحال اننا منعملش حركات غلط أو نشيل وزن تقيل علينا عشان ميأثرش على العملية على الأقل أول 6 شهور . 
  

وفي النهاية احب افكركم ان عملية الانزلاق الغضروفي القطني هي من أسهل وأبسط العمليات اللي ممكن تتعمل في الضهر واللي بتخلي العيان ينسى الإنزلاق الغضروفي القطني لباقي حياته الفكرة كلها إنك تفهم أي هو سبب المك وازاي هتعالجه صح.