هل تبخير الغضروف وشفط الغضروف وكي الغضروف بيعالج الإنزلاق الغضروفي القطني ؟

لو انت مريض انزلاق غضروفي قطني ف اكيد لازم تكون سمعت عن طرق علاج الانزلاق الغضروفي القطني المحدود زي: 

• تبخير الغضروف
•  شفط الغضروف
•  وكي الغضروف بالليزر 
  

وساعتها ممكن تفكر ان العلاجات دي هتنفع معاك وكمان هتبعدك عن انك تعمل عملية الانزلاق الغضروفي القطني،
بس قبل ما تقرر انك تعالج الغضروف القطنى بأى طريقة من الطرق دى عاوزك كده تفكر فى كام سؤال  

1. هل كل الطرق دى تنفع فعلا فى علاج الانزلاق الغضروفى اللى عندك ولا لأ ؟
2. ليه ممكن مريض انزلاق غضروفي قطني يعمل الإجراءات دي وبعد فترة يرجعله الألم مرة تانية دا كمان ممكن الأعراض تكون زادت عن اول مرة
3. او ليه المريض بعد ما يعملها ميحسش بأي تحسن نهائيا؟ ، مش المفروض ان الطرق دي هتعالج الغضروف القطنى بدون تدخل جراحي  
   

تعالوا بقى دلوقتى نجاوب على كل الاسئله دى و نفهم حقيقة التدخلات دي .

فى البداية خليني اقولك ان التدخلات دي مش بتنفع لكل مرضى الانزلاق الغضروفي القطني، هي بتنفع بس لأقل من 1 او 2% من عيانين الانزلاق الغضروفي بشكل عام وإنها مش بتنجح مع كل العيانين ، و أن فى شروط لازم تكون متوفره فى المريض اللى هيعمل التدخلات دى و هى

1. أن المادة الجيلاتينية اللى جوا الغضروف يبقى فيها مية كافية عشان لما بيحصل كي او تبخير بالليزر او غيره الميه دي نفسها هي اللي بتتبخر ، فلو الغضروف كان واصل لحالة من الجفاف و المسمى التاني ليها اللي هو black disc مش هينفع اننا نعمله الكى او تبخير بالليزر لان بنسبة 100% الآلام هترجع تاني للمريض بعد ما يعمل الإجراء
2. النقطة التانية ودي مهمه جدا وهي ان الألياف اللي حوالين الغضروف نفسها تكون سليمة ، وغالبا الغضروف اللى بتفضل فيه الألياف سليمة دا بيكون غضروف من الدرجة الأولى أو التانية ، 
   

و هنا لازم ناخد بالنا من حاجتين مهمبن عن تبخير الغضروف وغيرها من التدخلات

• أن التدخلات دى متنفعش مع الانزلاق الغضروفي القطني اللي من الدرجة التالتة او الرابعة لان الألياف اللي حوالين المادة الجلاتينية بتكون اتقطعت و المادة الجيلاتينية نفسها خرجت برا الألياف وساعتها الإجراءات دي مش هتساعد مريض الانزلاق الغضروفي القطني ، و لو عملها هيرجع يحس بأعراض الإنزلاق الغضروفي القطني مرة تانية
• والنقطة التانية ان 90 % من المرضى اللي عندهم انزلاق غضروفى قطنى من الدرجة الاولى او التانية مش محتاجين اصلا لشفط او كي او تبخير الغضروف لانهم هيتحسنوا عن طريق العلاج الدوائي و العلاج الطبيعي الصحيح ، و حتي لو العلاج الدوائي مجابش نتيجة فوقتها ممكن اننا نجرب حقن جذور الاعصاب والتردد الحراري للعصب
  

 ودا هيكفيه تماما ومش هيحتاج يعمل أي إجراءات داخل الغضروف زي تبخير الغضروف وشفط الغضروف وكي الغضروف بالليزر , وتقدروا تعرفوا معلومات اكتر عن امتي تعملوا كي او شفط او تبخير للغضروف من الفيديو دا

طيب يا دكتور هي ليه الإجراءات دي اتشهرت جدا في الفترة الأخيرة و ليه مرضى الانزلاق الغضروفي القطني بقي بيروحوا عشان يعملوها كتير؟

للأسف الشديد العلاجات دي دلوقتي بقي يطلع عنها كلام كثير زى انها بتحسن العيان تماما وبتقضي تماما على الانزلاق الغضروفي القطني، ولكنها زي ما قلنا بتنفع لحالات قليلة جدا ونادرة جدا كمان .

فنصيحة ليك من جراح عمود فقري ، لو انت بعاني من أعراض الإنزلاق الغضروفي القطني ، فأول حاجه لازم تعملها إنك متستناش على نفسك وتروح لدكتور متخصص في العمود الفقري يأكدلك ان سبب المك فعلا الإنزلاق الغضروفي القطني مش أي مشكلة تانية

وساعتها خطة العلاج اللى هنمشى عليها هتكون مناسبة ليك و هتريحك من الالم اللى انت حاسس بيه