هل الانزلاق الغضروفي القطني بيسبب الشلل ؟

كثير من الناس اللي بتعاني من مشكلة الإنزلاق الغضروفي القطني بتفكر انه ممكن يعمل شلل ويخليهم مش قادرين انهم يمشوا أو يمارسوا حياتهم الطبيعية ، وساعتها بيلجأوا للعملية

بس قبل ما نعرف هو الانزلاق الغضروفي القطني بيسبب شلل ولا لا لازم نعرف الاول ايه هي 

أعراض الانزلاق الغضروفي القطني؟

1- وجع في اسفل الظهر
آلام أسفل الظهر من أكتر الأعراض المنتشرة في حالات الانزلاق الغضروف القطني ودايما مشكلة الانزلاق الغضروفي القطني بتبدأ بألم في اسفل الظهر وبعدها تنتقل للرجلين.

2- تشنج عضلات الظهر
تشنج عضلات أسفل الظهر ممكن انه يعمل صعوبة في المشي والحركة وكمان صعوبة في حركة الرجلين

3- أعراض عرق النسا زي : 

• وجع في الرجلين من ورا وشعوره بيكون زي اللسعة أو الكهربا
• تنميل ووخز في الرجل
• الإحساس بضعف في الرجلين واللي ممكن يعمل صعوبة في الحركة
• عدم القدرة على الإحساس بالرجل أو الاحساس بيها بقى اقل من العادي.
• اضطرابات الحركة زي تغيير طريقة المشي نتيجة الألم من الانزلاق الغضروفي القطني

4- الألم الناتج عن الوضعيات

وده معناه ان الالم بيزيد في حالات ووضعيات معينة زي القعدة لفترات طويلة أو طريقة جلوس معينه ممكن تسبب الم أكثر.

5- التاثير على الحياة اليومية

الانزلاق الغضروفي القطني ممكن يأثر على الحياه اليومية بشكل كبير ويعمل مشاكل زي صعوبة في المشي وصعوبة في اننا نعمل أبسط الأنشطة اليومية

وبكدا نكون اتكلمنا عن أي هي أعراض الانزلاق الغضروفي القطني واللي مش شرط انها تحصل كلها مع بعض في نفس الوقت ، ولازم نعرف ان الاعراض بتختلف من شخص للتاني أو من حالة للتانية ، يعني الأعراض دي مش ثابته .

ودلوقتي نيجي لأهم سؤال

هل الانزلاق الغضروفي القطني يسبب الشلل ؟؟

الاجابة هي اه الإنزلاق الغضروفي القطني ممكن يسبب شلل ، لكن ده في الحالات النادرة جدا ،الشائع اكثر انه يحصل هو 

1. سقوط القدم ومعناه ان مبقاش عندنا القدره اننا نرفع مشط الرجل لفوق وقت المشي ، وده بيخلى المشى صعب جدا ومش بيكون بشكل الطبيعي لاننا بنقعد نعرج واحنا ماشيين .
2. ضمور فى عضلات الرجلين ، وده بنلاحظه لما يكون فى رجل اصغر واضعف من من التانية
3. صعوبة فى المشى و خصوصا فى خط مستقيم .
4. تنميل فى فتحة الشرج .
5. سلس البول أو صعوبة فى التحكم فى البول أو البراز .
6. تنميل في الحوض .
7. لو بدأ يكون فى ضعف فى الانتصاب عند الرجل و مكنش ليها اى سبب عضوى ، او تشنجات مهبلية عند السيدات .

يعني حالات الشلل بتكون نادرة جدا وبتحصل في حالات متأخرة جدا ، طيب دلوقتي يا دكتور

هل كل اللي عندهم انزلاق غضروفي قطني هيحتاجوا عملية جراحية لاستئصال الغضروف ؟

الإجابة هي لا ، مش كل انزلاق غضروفي علاجه هو العملية الجراحية ، الجراحة بتتعمل بس للحالات اللي المشكلة بدأت تأثر على أسلوب حياتهم الطبيعة و مبقوش قادرين انهم يمارسوا أبسط الأنشطة في يومهم.

ولو عاوز تعرف امتي لازم تعمل عملية الانزلاق الغضروفي اتفرج علي الفيديو ده:  

عشان كدا دايما بننصح انك لو عندك انزلاق غضروفي قطني مسببلك الآلام اللي قلنا عليها دي لازم تبدأ في مرحلة الفحص والعلاج من بدري مع دكتور متخصص في العمود الفقري عشان التشخيص والعلاج يكون صح ، ومتستناش لغايه ما المشكلة تكون كبيرة .