درجات تزحزح الفقرات القطنية

درجات تزحزح الفقرات القطنية

في مرضي كتير بيعانوا من تزحزح فقرات العمود الفقري سواء كان تزحزح عنقي او صدري او قطني بيبدأوا في علاج تزحزح الفقرات علطول من غير ما يحددوا اي هي درجة الانزلاق اللي عندهم , لان دي اهم حاجه لازم يكونوا عرفناها قبل ما يفكروا في علاج التزحزح لان تزحزح الفقرات له اكتر من درجة وعلي حسب كل درجة هيتحدد العلاج المناسب ليها , فتعالوا نعرف درجات تزحزح الفقرات .


في الاول لازم نكون عارفين ان تزحزح الفقرات بيحصل لما فقرة من فقرات العمود الفقري تبدأ انها تتحرك من مكانها ودا بيحصل لاسباب كتير تقدروا تعرفوها من هنا اعراض تزحزح الفقرات وأسبابها ، وتزحزح الفقرات له خمس درجات , ومعني درجة تزحزح الفقرات يعني الفقرة اتحركت من مكانها بنسبه قد اي , تعالوا نفهم سوا اي هي درجات تزحزح الفقرات ونسبه تحرك كل درجة منهم  

ونبدأ بالدرجة الأولى من تزحزح الفقرات :

في الدرجة الأولى : الفقرة بتكون حصل فيها التزحزح بنسبة 25% ، ودي هي أقل درجة من درجات تزحزح الفقرات، والدرجة الأولى هي أكثر نوع شائع ومنتشر بين حالات تزحزح الفقرات واغلب الحالات دي علاجها بيكون عن طريق العلاج التحفظي اللي هو العلاج الدوائي والعلاج الطبيعي .

درجة تزحزح الفقرات التانية :

في الدرجة دي الفقره بتكون اتحركت من مكانها بنسبه من 25% ل 50% ، والمريض في الدرجه دي بيحس بالم اكبر خصوصا لما بيمشي او يقعد لفتره , ومن الدرجة التانية بيكون فيه حالات مناسب ليها العلاج التحفظي وحالات تانية بيكون لازم ليها التدخل الجراحي، ودا بنعرفه بس عن طريق التشخيص الصحيح مع دكتور جراحة العمود الفقري

الدرجة التالتة من درجات تزحزح الفقرات :
ومن هنا بيبدأ تزحزح الفقرات يدخل في مرحلة الخطر ، وده عشان الفقرة اتحركت بعيد عن باقي الفقرات بشكل كبير جدا والآلام بتكون غير محتملة، ونسبة تزحزح الفقرات اللي من الدرجة التالتة بتكون من 50% ل 75%

الدرجة الرابعة من درجات تزحزح الفقرات القطنية

الفقرة بتكون اتحركت بشكل كبير جدا جدا عن مسارها الصحيح ودرجة تزحزح الفقرات هنا بتكون من 75% ل 100% ، ولازم اننا نعمل تدخل جراحي في اسرع وقت قبل ما نوصل للدرجة الخامسة

الدرجة الخامسة من درجات تزحزح الفقرات:

نسبة التزحزح في الدرجة الخامسة بتكون زادت عن 100% وبتكون الفقرة انفصلت عن باقي فقرات العمود الفقري، ودي هي أخطر حالة من حالات تزحزح الفقرات.

بس بلاش اننا نقلق لاننا زي ما قلنا إن الشائع والمنتشر اكتر هما درجات تزحزح الفقرات الأولى والتانية وتحديدا الاولى ، و اللى زي ما ذكرنا فوق يعتبروا من اسهل الدرجات فى العلاج ،و نقدر نعالجها عن طريق الأدوية والعلاج الطبيعي.
المهم انك تتشخص صح وتاخد خطوة العلاج من بدري لو حسيت بأي عرض من أعراض تزحزح الفقرات , ولو عاوز تعرف امتي تعمل عملية التزحزح الفقاري تقدر تشوف الفيديو دا مع دكتور علي يسري القاضي