دكتور علي القاضي > من حقك تفهم > ١٠ أسباب للانزلاق الغضروفي القطني و عرق النسا
اعرف عمودك الفقري
ليه رقبتك ممكن توجعك ؟
ليه ممكن تحس بوجع في اخر ضهرك
يعني ايه غضروف؟
١٠ أسباب للانزلاق الغضروفي القطني و عرق النسا
ناس كثيرة بتعاني من آلام شديدة جدا في رجلها خصوصا في الرجل من ورا وبتكون عامله زي الكهربا أو اللسعة في الرجل وكمان بيكون معاها وجع في آخر الضهر ، الاعراض دي كلها بنسميها عرق النسا واللي ممكن انها تحصل بسبب مشاكل في العمود الفقري وتحديدا الفقرات القطنية زي الإنزلاق الغضروفي القطني وخلونا دلوقتي نعرف عن أي هي أكثر 10 أسباب ممكن إنها تعمل انزلاق غضروفي قطني وآلام عرق النسا
كنا اتكلمنا قبل كدا في مقال اعرف عمودك الفقري عن الغضروف وقلنا ان الغضروف بيكون مرن بس في نفس الوقت صلب ، وبيكون متكون من مية بنسبة كبيرة جدا ، بس اللي بيحصل مع التقدم في السن ان كل ما كبرنا كل ما مرونة الغضاريف دي قلت ، وده هيخلي سمك الغضروف يقل وساعتها الغضروف مش هيقدر يقوم بوظيفته اللي هي انه يمتص الصدمات ، فهيبدأ الغضروف انه يحصله انزلاق غضروفي قطني.
تاني حاجه واللي كتير من الناس متعرفهاش ان الدراسات اكدت ان الإنزلاق الغضروفي القطني بيحصل للرجال أكثر من السيدات .
زيادة الوزن بتخلي الضغط يزيد على فقرات العمود الفقري وتحديدا الفقرات القطنية اللي هي اصلا شايلة وزن كبير جدا ، ده غير ان زيادة الوزن بتسبب فى إن الدهون تتراكم في ألياف العضلات و ده هيخليها تضعف اكتر وده برضو هيعمل حمل وضغط كبير جدا على الفقرات القطنية ، واللي هينتج عنه انزلاق غضروفي قطني.
الحمل و الولادة من الأسباب اللي بتعمل ضغط كبير جدا على فقرات العمود الفقرى وتحديدا الفقرات القطنية وده بيكون بسبب وزن الجنين الكبير ، فممكن انه يسبب انزلاق غضروفي قطني .
الحركة بشكل كبير بدون راحه ممكن انها تسبب انزلاق غضروفي قطني نتيجة ان الاقراص بدأ انه يحصلها تلف.
قلة الحركة في اليوم هتأثر جدا على عمودنا الفقري ، لانها ممكن تسبب ضغف شديد في العضلات واللي بدوره هيعمل مشاكل كبيرة جدا في العمود الفقري ومنها الانزلاق الغضروفي القطني
شيل اوزان ثقيلة بطريقة غلط ممكن انها تعمل ضغط كبير جدا على الفقرات العمود الفقري سواء الفقرات القطنية أو الفقرات العنقية ، عشان كده مهم اننا لما نيجى نشيل حاجة تقيله اننا نخلى الجسم فى وضعيه صحيحة ، وناخد بالنا ان ضهرنا يكون مفرود وده بيخلينا منأذيش العمود الفقرى ولا نضغط على الفقرات بشكل كبير و احنا بنرفع اى حاجة وزنها تقيل .
التدخين يعتبر من من الأسباب اللي بتساعد في أن الإنزلاق الغضروفي يحصل ، عشان التدخين بيقلل من نسبة الأوكسجين اللي المفروض توصل للغضروف وبالتالي الغضروف دا هيفقد مرونته وهيكون معرض أكثر للإنزلاق ، وبعض الدراسات اثبتت إن المدخنين بشكل عام معرضين لإصابات الظهر 3 مرات أكثر من اللي مش بيدخنوا.
بمعنى إن العائلة كان فيها كذا حالة انزلاق غضروفي ، أو إن فى بعض الأمراض الوراثية هى اللى بتأثر على قوة ومرونة الأنسجة فى الجسم فبيخلي الغضاريف تكون عرضة أكثر للانزلاق الغضروفي.
من أكبر وأهم الأسباب اللي ممكن تسبب انزلاق غضروفي خصوصا عند الشباب هي القعدة لفترات طويلة قدام التليفزيون والتليفون بطريقة جلوس غير صحيحة ، وكمان الجلوس على مكتب فترات طويلة من غير تغيير الوضعية أو الحركة بين كل فترة والتانية ممكن انها تسبب انزلاق غضروفي وآلام في الظهر . وبكده نكون ذكرنا أكثر 10 أسباب ممكن انها تسبب انزلاق غضروفي قطني وآلام عرق النسا ، اتمنى انكم تكونوا استفدتم من المعلومات وانكم تحافظوا على العمود الفقري و نحاول نتجنب الأسباب اللي ذكرناها . ولو حسيتم بأي ألم أو وجع فلازم تعرف اي هو سبب المك وتعالجه بأسرع وقت.
