دكتور علي القاضي > من حقك تفهم > اعرف عمودك الفقري
اعرف عمودك الفقري
ليه رقبتك ممكن توجعك ؟
ليه ممكن تحس بوجع في اخر ضهرك
يعني ايه غضروف؟
١٠ أسباب للانزلاق الغضروفي القطني و عرق النسا
كلنا عارفين إن من أساسيات جسم كل إنسان هو العمود الفقري ، مش بس عشان بيديله الشكل والقوامة ، لا دا عشان كمان بيساعدنا على الحركة وكمان عشان بيوصل أطراف الجسم ببعض ، دا غير انه بيمثل درع الحماية لحاجه مهمه جدا جدا وهي الحبل الشوكي ، والحبل الشوكي بيكون موجود جوا العمود الفقري وهنذكر اهميته بالتفصيل و أهمية العمود الفقري أكثر بالتفصيل في مقال النهاردة . وعشان لو عندك وجع في ضهرك و عايز تعرف سببه ايه لازم تعرف هو ضهرك متكون من ايه بالضبط ، وعشان كدا تعالو نتعرف أكثر على جسمنا ونعرف أكثر عن عمودنا الفقري .
العمود الفقري عبارة عن مجموعة من الفقرات اللي بتكون مرصوصة فوق بعض زي السلم بالضبط ، والعمود الفقري ده بيبدأ من بعد الجمجمة على طول و بيوصل لحد منطقة الحوض ، و بتكون من 33 فقرة ، و بين كل فقره و التانية بيكون فى حاجة اسمها الغضروف ، و اللى بتكون وظيفته انه يبعد الفقرتين عن بعض وده بيخلى الفقرات متحتكش ببعضها ، ده غير ان الغضروف بيدى مرونة للعمود الفقرى وقت الحركة و لو عاوزين تعرفوا معلومات اكتر عن الغضروف و اهميته هتلاقوا كل التفاصيل عنه هنا ” يعنى اى غضروف “، و دلوقتى خلونا نرجع تانى للعمود الفقرى و اللى بيتقسم 5 مجموعات :
الفقرات العنقية أو cervical vertebrae ، ودي ببساطة جدا هي الرقبة و بيرمز للفقرات العنقيه بحرف (C) ، وبيكونوا عبارة عن 7 فقرات من أول c1 لغاية c7 ، والفقرات العنقية بتبدأ من آخر الراس لغاية بداية الكتف ، والفقرات القطنية تعتبر من أكثر فقرات العمود الفقري حركة و مرونة و كل فقرة من الفقرات العنقيه بيكون ليها اسم ووظيفة فالفقرة الاولى اللي هي C1 واسمها الأطلس و ده لفظ يونانى معناه الحامل و ده بيدل على وظيفة الفقره دى وانها بتشيل أو بتحمل الجمجمه .
اما الفقرة التانية C2 و دى بنسميها المحور و دى بتكون متعشقة في الفقرة الاولى عشان الفقرة دي هي اللي بتخلينا نحرك راسنا يمين وشمال . ومن C3 لحد C6 دول بيكونوا مجموعه مع بعض و اسمها الفقرات النمطية ، ووظيفتها انها تحمي شريان اسمه الشريان العنقى وكمان بتحافظ على حركة الرقبة. و الفقرة الأخيرة اللي هي C7 و دى اسمها الفقرة الاستثنائية و دى مهمتها انها تربط الفقرات العنقية بالفقرات الصدرية اللي هي بعد الفقرات العنقية على طول . الفقرات العنقيه بيخرج منها (8 أزواج من الأعصاب ) ، و الاعصاب دى هى اللى بتكون مسؤوله عن انها تنقل الأوامر و الاحساس من وإلى الدماغ للذراعين .
الفقرات الصدرية أو Thoracic Vertebrae ، الفقرات دى بنمزلها بالحرف (T) بيكون عددهم 12 فقرة (من T1 لـحد T12) ، و الفقرات دى بتاخد¾ مساحة العمود الفقرى و بتبدأ من اول الضهر لغاية منطقة الضلوع ، و الفقرات الصدرية بتساعد الضلوع فى حماية الاعضاء اللى موجوده فى القفص الصدرى ، ده غير ان الفقرات دى هى اللى بتساعد للأضلاع انها تتحرك عشان نقدر نتنفس.
الفقرات القطنية أو Lumbar vertebrae والحرف اللي بنرمز بيه للفقرات القطنية هو حرف(L) و بيكون عددها 5 فقرات (منL1 لـحد L5) ، والفقرات القطنية بتكون موجوده بعد الفقرات الصدرية و لحد آخر الضهر و هى اللي بتوصل بين الضهر والحوض والرجلين ، والفقرات دي تعتبر من اكبر فقرات العمود الفقرى ، وده من حكمة ربنا لان الفقرات القطنية هي اكثر فقرات بتتعرض للضغط و بتشيل وزن العمود الفقري كله ، وده اللى بيخلى الفقرات القطنية تكون معرضة للأصابه اكتر عن باقى فقرات العمود الفقرى
الفقرات العجزية أو sacral vertebrae و الفقرات دي بيرمز ليها بالحرف (S) ، بتتكون من 5 فقرات (من S1 لـ S5) و فقرات العجز بتكون موجودة بعد الفقرات القطنية ، و وظيفتها انها تربط العمود الفقري بالحوض دة غير انها بتغطى الحوض و بتحمى الاعضاء اللى فيه و الفقرات العجزية بتبدأ تتكون وقت نمو الجنين فى رحم الأم ، و لما بنوصل لمرحلة البلوغ بتبدأ الفقرات دى تلتحم ببعضها ، وتبقى عظمة واحدة كبيره .
وده عبارة عن عضم صغير جدا مكانه بيكون موجود بعد عظام العجز ، فى اخر العمود الفقرى وبيتكون العصعص من 3 او 6 فقرات بيكونوا ملتحمين مع بعض ، والالتحام ده بيحصل بعد سن البلوغ ، و وظيفة الفقرات العصعصية انها بتساعد الجسم على التوازن وقت ما بنيجي نقعد. و عضم العصعص دى تعتبر من الفقرات اللى حركتها قليله جدا ، فالفقرات دى مش بتتحرك لو مشينا او وقفنا لفتره ، و الحالة الوحيده اللى بتتحرك فيها عظمة العصعص هى وقت القعدة و حركتها بتكون بسيطه جدا مش اكتر من 20 درجة.
و هنا لازم نعرف حاجة ان بالرغم من ان فقرات العصعص من الفقرات اللى حركتها بتكون بسيطة جدا ، لكنها من اكتر الفقرات اللى بتكون معرضة للأصابه ، و السبب فى ده ان عظم العصعص مش بيكون حواليه اي عظم عشان يحميه من اي اصابة ، فلو وقعنا عليه مثلا ممكن ده يضر بعظم العصعص و يسببلنا الم شديد جدا ، و اكتر ناس اللي بتكون معرضه لالام العصعص هما السيدات و ده بسبب الحمل و الولاده وكمان اللي بيكونوا معرضين لآلام العصعص هما اللى بيقعدوا لفترات طويله بدون حركة ، لإن كل ده بيعمل اجهاد كبير جدا على العصعص. و دلوقتى بعد ما عرفنا كل حاجة عن فقرات العمود الفقرى تعالوا نتكلم دلوقتى عن حاجة مهمة جدا و هى
الحبل الشوكي هو عبارة عن مجموعة من الأعصاب وزي ما قلنا ان الحبل الشوكي بيوصل لـ ¾ العمود الفقرى و بيكون موجود جوا العمود الفقري تحديدا في قناه اسمها القناة الشوكية ، والقناة دي حجمها بيكون مختلف ، يعني في الفقرات العنقية حجمها بيكون كبير جدا وبيبدأ حجمها يقل ويكون أصغر في باقي الفقرات ، و مهمة الحبل الشوكى انه بيكون مسؤول أنه ينقل الإشارات العصبية من الدماغ لمنطقة معينة في الجسم ومن المنطقة دي للدماغ ، أما الربع الأخير من العمود الفقري فبيكون فيه مجموعة من الأعصاب اسمها ذيل الفرس و دى اللى بتكون مسؤوله عن نقل الاشارات العصبية من الدماغ للرجلين. وهنتكلم بشكل مفصل أكثر عن اهمية الحبل الشوكي في مقال بعنوان ليه الحبل الشوكي مهم والكدمه فيه ممكن تعمل ايه ؟ ودلوقتي خلينا نتكلم عن أي هي المشاكل اللي ممكن انها تحصل في العمود الفقري ، و اللي هتأثر على الفقرات او الغضاريف او الحبل الشوكي و هتعمل الم في الضهر سواء في الرقبة أو نهاية الضهر 1- الانزلاق الغضروفي العنقي 2- الانزلاق الغضروفي القطني 3- الكسور 4- ضيق الفقرات القطنية 5- تزحزح الفقرات 6- الزيادات العظمية وبكدا نكون عرفنا عن عمودنا الفقري وعن أي هي أجزائه وازاي عمودنا الفقري مهم ، اتمنى تكونوا استفدتم من مقال النهاردة واتمنى انكم متتجاهلوش أي وجع أو ألم خصوصا في العمود الفقري والحق عالجه .
