هل الانزلاق الغضروفي القطني يؤثر علي الانتصاب

هل الانزلاق الغضروفي القطني يؤثر علي الانتصاب

في بعض الرجال لما بيحصلهم انزلاق غضروفي قطني بيكونوا قلقانين من تأثير الانزلاق علي قدرتهم الجنسية او انه ممكن يسببلهم ضعف في انتصاب العضو الذكري , وطبعا دا بيسببلهم احباط واكتئاب انهم مش هيقدروا يمارسوا حياتهم الجنسية بشكل طبيعي , بس هل فعلا الانزلاق الغضروفي القطني ممكن يسبب للراجل ضعف انتصاب ويفقد قدرته علي ممارسة العلاقة الحميمة , فتعالوا نعرف الاجابه سوا


في الاول لازم نعرف ان على حسب درجة الانزلاق الغضروفي القطني اللي عندك هنحدد هل الانزلاق هيأثر علي الانتصاب ولا لا
لان في الدرجات البسيطة من الانزلاق الغضروفي القطني ( الدرجة الاولي والتانية ) صعب يسببولك ضعف انتصاب لأن الانزلاق مبيكونش لامس الاعصاب فمش هيأثر عليك في شئ

لكن لو انت عندك غضروف قطني من الدرجة المتقدمة ومسببلك أعراض شديدة في الحاله دي الغضروف ممكن يأثر علي الانتصاب 

طب ليه الدرجات المتقدمة من الغضروف القطني بتأثر علي الانتصاب ؟

لان لو انت عندك غضروف قطني في الفقره الرابعه والخامسه أو الفقرة الخامسة والفقرة العجزية الاولى وكمان من درجة متقدمة يعني الغضروف لامس العصب ومسببلك أعراض خطيرة , في الحاله دي هيكون الغضروف مأثر علي الانتصاب عندك لان الفقرات دي بيكون فيها حزمة من الأعصاب مسؤوله عن منطقة الحوض والأعصاب في العضو الذكري . الحاله دي بنسميها متلازمة ذيل الفرس

فلو حصلك غضروف قطني وضغط علي الاعصاب دي هيحصلك مشكلة في الانتصاب ولو أهملت علاج الغضروف لفتره كبيرة ممكن يحصلك ضعف انتصاب وحتي لو عملت العملية هيكون صعب الانتصاب يرجع زي الاول

فباختصار كدا انت مش هيحصلك ضعف انتصاب بسبب الغضروف القطني اللي عندك الا لو انت وصلت لمرحله متدهورة من الانزلاق الغضروفي ومبقتش قادر تمشي ولا تتحرك يعني دخلت في مرحلة شلل في الوقت دا تقدر تقول ان الانزلاق الغضروفي هو اللي عملك ضعف انتصاب

بس مش عاوزك تقلق لان دا مش بيحصل غير ل 5% من حالات الانزلاق الغضروفي القطني , وال 95 % الباقين الغضروف مش بيأثر علي الانتصاب عندهم , ممكن يكون ضعف الانتصاب عندهم من مشاكل تانيه مش من الغضروف  

طيب انت عندك غضروف وخايف يحصلك ضعف انتصاب بسببه اي الحل ؟

الحل طبعا انك تبدء في علاج الغضروف القطني من بداية اكتشافه عشان تتجنب فرصه ان يحصلك ضعف انتصاب وكمان عشان تحمي نفسك من الإصابة بالشلل بسبب الانزلاق الغضروفي

وبالنسبة لعلاج الانزلاق الغضروفي القطني فالعلاج بينقسم على حسب درجة الانزلاق الغضروفي القطني اللي عندك

الدرجة الأولى والتانية من الانزلاق الغضروفي القطني علاجهم بيكون عبارة عن 

1. العلاج التحفظي اللي بيكون عبارة عن (علاج دوائي وعلاج طبيعي) و90 % من حالات الانزلاق الغضروفي من غير ما يعملوا اي تدخلات تانية زي الحقن والتردد الحراري
2. الإجراءات محدودة التدخل زي

• التردد الحراري
• حقن جذور الاعصاب

ودول بيبقي عبارة عن حقن لجذور الاعصاب عشان نقلل الالم اللي بتكون حاسس بيه بسبب الانزلاق اما لو كنت من حالات الانزلاق الغضروفي المتقدمة , فلازم تعمل عملية استئصال للغضروف ومتقلقش حاليا في اكتر من طريقة لاستئصال الغضروف زي

• استئصال الانزلاق الغضروفي القطني بالميكروسكوب
• استئصال الانزلاق الغضروفي القطني بالمنظار

والنوع دا من العمليات بيكون عن طريق فتحات صغيره وكمان مدة العملية من ساعة لساعه ونص بكتير وتقدر تروح بيتك في نفس اليوم وفتره تعافيك بتكون سريعة .
المهم قبل ما ندور على تأثير الانزلاق الغضروفي علي الانتصاب لازم ندور علي العلاج الصحيح للانزلاق مع دكتور متخصص في جراحة العمود الفقري قبل ما يحصل اي مضاعفات خطيرة تأثر علي حياتك كلها
ولو عاوز تعرف الخطة النموذجية لعلاج الانزلاق الغضروفي تقدر تشوف الفيديو دا مع دكتور علي يسري القاضي