هل تزحزح الفقرات يسبب الشلل؟

هل تزحزح الفقرات يسبب الشلل؟

تزحزح الفقرات من مشاكل العمود الفقري الصعبه اللي بتعمل قلق كبير خصوصا لما المريض يسمع من ناس حواليه انها ممكن تعمله شلل , وميقدرش يرجع لحياته الطبيعية تاني , بس لازم المريض يفهم ليه تزحزح الفقرات ممكن يعمله شلل وامتي اصلا ممكن يحصله شلل , فتعالوا نعرف سوا الاجابه علي الاسئلة دي .

في البداية لازم نكون عارفين ان تزحزح الفقرات ممكن يسببلك شلل فعلا , بس دا بيحصل في الحالات المتقدمة, ودي الحالات اللي بيكون فيها المريض مهمل لعلاجه لفتره طويلة , فبيحصله أعراض خطيرة زي سقوط في القدم , وتعالي افهمك اكتر يعني اي سقوط في القدم , هو انك متقدرش ترفع مشط رجلك من علي الارض وهتحس انك بتجر رجلك وانت ماشي واي حاجه بتلبسها في رجلك بتحس انها هتقع منها ، وسقوط القدم دا ممكن انه يبقى نسبي وده لما يكون في بداية المشكلة , وممكن انه يبقى كلي لما تكون المشكلة خلاص وصلت لاعلى درجاتها. 

طيب ليه بقى تزحزح الفقرات ممكن انه يسبب شلل؟

ببساطة احنا عمودنا الفقري فيه فقرات فوق بعضها وبينهم غضاريف و كل فقرة بيكون طالع عصب من الناحيه اليمين وعصب من الناحيه الشمال، والأعصاب دي بتكون مسؤولة على الإحساس والحركة سواء كنا بنتكلم عن الايد أو الرجل ، فلما بيحصل التزحزح , الفقره بتتحرك من مكانها ف ممكن تضغط علي الاعصاب
وفي الوقت دا هتبدء تحس بشوية أعراض
1-الم اسفل الضهر , تنميل وشكشكة في الرجل ( آلام عرق النسا )
ولما تهمل في علاجك لفتره كبيرة هيبدء يظهر عليك الاعراض الخطيرة اللي بتكون جرس انذار بينبهك انك دخلت في مرحله خطر ولازم عملية بسرعه , والاعراض دي :  

1. سقوط نسبي في القدم ,
2. ضعف في الاحساس بمنطقة معينة
3. عدم التحكم في البول والبراز

وفي مرضي بتهمل برضو العلاج حتي بعد ما يظهر عليها الاعراض دي ودا اللي بيوصلهم لشلل دائم

وتقدرتعرف تفاصيل اكتر عن تزحزح الفقرات واعراضها من الفيديو دا مع دكتور علي يسري القاضي 

طيب ايه هو علاج تزحزح الفقرات في الحالة دي؟

لازم نكون عارفين ان علاج تزحزح الفقرات بيتحدد علي حسب درجة التزحزح اللي حصلت عندك , بمعني لوكنت من الدرجة الاولي او التانية , فعلاجك هيكون علاج تحفظي يعني علاج دوائي وعلاج طبيعي لفتره من 4 ل6 اسابيع و علي حسب الفتره اللي هتكون مناسبه مع حالتك

لكن لو متحسنتش علي العلاج التحفظي هنلجأ للإجراءات محدودة التدخل اللي هي حقن جذور الاعصاب والتردد الحراري عشان نقلل الالم  

اما لو كنت من درجات التزحزح المتقدمه ( الدرجة الرابعة والخامسة ) فساعتها بنلجأ ل عملية تثبيت الفقرات القطنية عن طريق الشرايح والمسامير ودا عشان ننهي علي المشكله نهائي
وتقدر تعرف معلومات اكتر عن الدرجات من مقال درحات تزحزح الفقرات القطنية
ولازم ناخد بالنا من نقطه مهمه جدا وهي ان عملية تثبيت الفقرات القطنية مش بتتعمل بالميكروسكوب أو المنظار ، والمسامير والشرايح اللي بنستخدمها في الجراحة بتكون مصنوعة من مادة التيتانيوم اللي بتكون مناسبة مع طبيعة جسم الإنسان ومش بتعمل اي تفاعل ضار ابدا ، وكمان تثبيت الفقرات مش بيأثر ابدا على حركتك بالعكس دا هيساعدك جدا انك ترجع تعيش حياتك الطبيعية مرة تانية بدون اي وجع في الضهر أو في الرجل، وهتقدر انك تمارس الرياضة وتروح شغلك، يعني مفيش حاجه اسمها انا لو عملت تثبيت للفقرات فأنا كدا مش هتحرك تاني

وتقدر تعرف معلومات اكتر عن علاج تزحزح الفقرات من الفيديو دا مع دكتور علي يسري القاضي   

المهم انك تلحق نفسك قبل ما توصل للأعراض الخطيرة جدا من أعراض تزحزح الفقرات عشان متوصلش نفسك لشلل لا قدر الله، وطالما بدأت في العلاج من بدري هتخف في اسرع وقت إن شاء الله بدون ما تحتاج لعملية .