ما هو الغضروف؟

يعني ايه غضروف؟ 

كثير من الناس اللي عندها مشكلة الانزلاق الغضروفي دايما تسأل عن الغضروف وتفكر ، هي المشكلة في الغضروف ده ممكن تعمل أعراض مؤلمة فعلا ؟ لدرجة ان مشكلة الانزلاق الغضروفي ممكن تعمل صعوبة كبيرة جدا في المشي وممكن نضطر نعمله عملية عشان نقدر نمارس حياتنا بشكل طبيعي تاني
في الحقيقة ان مشاكل الغضروف صعبه فعلا ومؤلمة جدا خصوصا لو اهملناها من البداية , وعشان نفهم مدي صعوبه المها تعالوا نفهم الاول  

أي هو الغضروف ؟

الغضروف عبارة عن نسيج مرن بس في نفس الوقت قوي، والغضاريف بتكون موجودة في أماكن كثيرة في الجسم زي

• الاذنين والانف
• نهايات الأضلاع
• الركبتين والكاحلين
• نهايات العظام الطويلة
• أنابيب الشعب الهوائية
• بين فقرات العمود الفقري

بس أحنا هنتكلم عن الغضاريف اللي بتكون موجودة في العمود الفقري ، والعمود الفقري بيتكون من فقرات مرصوصه فوق بعضها وبين كل فقرة والتانية بينهم غضروف ، والغضروف و بيتكون بشكل أساسي من جزئين: 

• الجزء الأول اللي هي المادة الهلامية أو الجيلاتينة اللي بتكون موجودة في نص الغضروف ووظيفتها انها تمتص الصدمات اللي بتحصل مع الحركة
• اما الجزء التاني واللي هو الحلقة الليفية : والحلقة الليفية بتحاوط المادة الجيلاتينية و مش بتخليها تتحرك من مكانها 
  

في معلومة مهمه لازم نعرفها وهي ان  

1- الغضروف مش بيحتوى على اى اوعية دموية ولا اعصاب ولا أوعية ليمفاوية ، وده بيكون سبب فى ان نمو الغضاريف يكون بطيء مع اى اصابه ، لإن مفيش اي اوعيه دمويه عشان تغذيه.

2- من مكونات الغضاريف هي الماية واللي بتكون موجودة بنسبة من 65 ل 80% في الغضروف .

طب ايه هي وظيفة غضروف الضهر؟ 

1. الغضروف له أكتر من وظيفه اهمها أنه بيمنع احتكاك فقرات العمود الفقري ببعضها عشان زي ما قولنا الغضروف بيفصل بين كل فقره والتانية , و طبعا دا هيساعد انه يمنع تاكل فقرات العمود الفقري بسبب الاحتكاك ،وكمان الغضروف نفسه بيكون عامل زي المخدة فبيكون قادر انه يتمدد وينكمش وبكده بيمنع الأذى والتلف عن الفقرات .
2. الغضروف بيكون مسؤول أنه يمتص الصدمات اللي بتحصل بين فقرات العمود الفقري علشان يحمي العظام مع الحركة.
3. بيساعد المفاصل على انها تحافظ على شكلها مع الحركة وبكدا مش هيحصلها تآكل .
4. من مهام الغضروف كمان انه بيساعد على حماية نهاية الأطراف الطويلة في الجسم .
5. وكمان الغضاريف بتساعد في دعم وزن الجسم عند الجري أو الحركة، يعني حتى في أبسط الحركات الغضاريف اللي في الجسم بتساعدنا اننا نعملها. 
   

بعد ما عرفنا أهمية الغضاريف في الجسم تعالو نعرف ليه ممكن يحصل اصابه لغضروف الضهر ؟ 

1. ممكن يحصل بسبب الرياضه او لاقدر الله بسبب الحوادث
2. كمان ممكن يجيلك الغضروف بسبب قلة الحركة لان قله الحركة هتعمل ضعف في عضلات العمود الفقري وبالتالي هتأثر على الغضاريف .
3. لو بتعاني من السمنه المفرطه ممكن يحصلك غضروف وده لانها بتسبب ضغط كبير على الغضاريف و العمود الفقرى .
4. التقدم في العمر ،عشان كل ما كبرنا في العمر كل ما مرونة الغضاريف بتقل فبيكون عندها احتمالية اكبر انها تتصاب.
5. التدخين لإنه بيساعد في تقليل كمية الاكسجين اللي بتروح للغضروف فبتخليه عرضه أكتر للإصابة.  
   

ومن أشهر المشاكل اللي بتحصل للغضاريف في العمود الفقري هي الإنزلاق الغضروفي وتحديدا الإنزلاق الغضروفي القطني ،

وعشان نحافظ علي عمودنا الفقري من اي اصابه ممكن تحصله لازم نتبع التعليمات دي وهي :   

1. نمارس الرياضة اللي بتقوي عضلات العمود الفقري ، لان تقوية العضلات بتقلل من الضغط على الضهر والغضاريف .
2. نتجنب اننا نتني ضهرنا وقت القعدة ، و كمان نتجنب اننا نقعد لفترات طويلة .
3. نبعد عن شيل الأوزان الثقيلة ولو شيلناها فتكون بالطريقة الصح ونكون فاردين ضهرنا . وتقدر تتأكد اكتر من الفيديو ده عن أسباب ألم الضهر وعلاقتها بالجيم 
   

4- الانتباه على الوزن ، لأن زيادة الوزن بتسبب ضغط على العمود الفقرى .
5- نحاول اننا لو بندخن فنبعد عن التدخين على قد ما نقدر .

كدا عرفنا سوا اي هو الغضروف واهميته في جسمنا بس الاهم اننا لو حصلنا لاقدر الله انزلاق غضروفي لاي سبب من الاسباب لازم نعالجه من البداية قبل ما يحصل اي مضاعفات خطيرة تأثر على حياتنا بشكل كبير وطبعا اي مشكلة في عمودنا الفقري لازم تكون مع دكتور متخصص في جراحة العمود الفقري عشان نضمن ان التشخيص صح والعلاج صح