دكتور علي القاضي > طرق العلاج > التشخيص
اعرف عمودك الفقري
ليه رقبتك ممكن توجعك ؟
ليه ممكن تحس بوجع في اخر ضهرك
يعني ايه غضروف؟
١٠ أسباب للانزلاق الغضروفي القطني و عرق النسا
ناس كتير لما بتحس بوجع في ضهرها او رقبتها بتحتار جدا ، لانهم مش بيكونوا عارفين الالم ده ممكن يكون سببه اى ، هل هو شد عضلى ، ولا ارهاق و لا الالم ده سببه مشكله فى العمود الفقرى ، و لو سبب الالم طلع فعلا فى العمود الفقرى ، طيب اى هى المشكله اللى حصلت فى العمود اللفقرى و سببتلنا الالم ده هل هى :
وبيبدأ كل حد عنده مشكلة يفكر ، اعمل علاج طبيعي ؟ ولا أخد مسكنات ؟ ولا معملش حاجه اصلا وانا لما استريح شوية هخف لوحدى؟ طيب هو انا المفروض اصلا اكشف عند دكتور تخصصه اى ؟ ، كل دي اسئلة ممكن الواحد يفكر فيها والحل ابسط من كده بكثير وده عشان اهم خطوة في مرحلة العلاج وخصوصا في مشاكل العمود الفقري واللي مفيش اي علاج صح من غيرها هي التشخيص الصحيح . فتعالو نعرف مع بعض اي هو التشخيص واي المراحل بتاعته وازاي لو التشخيص اتعمل غلط ممكن انه يدخلنا في عملية جراحيةاحنا اصلا مش محتاجينها .
التشخيص هي المرحلة اللي الدكتور المختص بيعمل فيها فحص ، عشان يقدر يحدد أي هي المشكلة اللي عند المريض؟ وهل هي كبيرة ولا لا . وكمان عشان يقدر يحط خطة العلاج اللي هتكون مناسبه مع الحالة. و التشخيص بتتكون من 3 مراحل مهمة جدا ، مينفعش مرحلة منهم متكنش موجودة والمراحل دي هي ولازم المراحل دى تتم بنفس الترتيب اللى هنشرحة دلوقتى ، 1- المرحلة الاولي : سماع شكوى المريض: وهنا الدكتور بيبدأ انه يسمع من المريض عن الأعراض اللي بيحس بيها ، وازاى الأعراض دى مأثرة على حياته اليومية ، واماكن الوجع فين بالضبط ، وهل في أماكن أو وضعيات معينة مثلا الوجع بيزيد فيها ؟ كل دي اسئلة مهمة لازم تتسأل للمريض ، بعدها بنبدأ ، 2- المرحلة التانية :الفحص السريري أو الإكلينيكي: وهنا الدكتور بيبدأ انه يفحص المريض ويبدأ انه يضغط على اماكن معينة ويشوف هل لما بيضغط عليها الوجع بيزيد او لا، او ان المريض يعمل حركات معينة والدكتور يشوف هو قادر يعملها ولا عنده صعوبة ، و الخطوه دى مينفعش ابدا نستغنى عنها و نعتمد على اننا سمعنا من المريض شكوته ، لازم نعملها حتى لو المريض من كتر الالم مكانش قادر انه يستحمل الفحص ، لان فى بعض المرضى مش بيكون قادر انه يحدد فين مكان الالم بالظبط ، و ده ممكن يكون سبب فى ان التشخيص يكون غلط ، وبعد الفحص السريري بيكون الدكتور اتأكد من المشكلة بنسبة 90% ، بس عشان نتأكد اكثر لازم نعمل الخطوة اللي بعدها واللي هي 3- الخطوة التالته : الأشعات: بعدها المريض بيكون عمل اشعات زي اشعة الرنين المغناطيسي أو اشعة ديناميكية بالحركة ، ومهمتها بس انها تأكدلنا المشكلة وكمان عشان نتأكد اكثر ان مفيش اي مشاكل او امراض تانيه لا قدر الله مع المشكلة اللي عندنا . و بعد ما نخلص كل ده لازم عشان نقدر نحط خطة علاج صحيحه و نكون متأكدين ان العلاج هيجيب نتيجة ، لازم شكوة المريض و الفحص و الاشعه يكونوا متطابقين و محددين مشكلة واحده هى السبب فى كل الالم اللى المريض حاسس بيه
عشان نفهم اى اللى ممكن يحصل لو التشخيص كان غلط ، خلونا ناخد مثال لمشكلتين فى العمود الفقرى اعراضهم قريبة جدا لبعض و هما الانزلاق الغضروفي القطني و التهاب في مفصل الحوض الحرقفي ، و هنا لو التشخيص كان غلط و المريض اتقاله انت عندك انزلاق غضروفى و محتاج عملية عشان تقدر توقف الألم ، ساعتها المريض ده ممكن انه يدخل عمليات وهو مش محتاجها ، ويطلع منها بنفس الاعراض اللى كانت عنده قبل العملية ، لان اصلا سبب المه مكانش الانزلاق الغضروفى ده كان سببه التهاب فى مفصل الحوض و اللى علاجة اما ادوية او تدخلات محدوده زى ( حقن جذور الاعصاب – التردد الحرارى )
الإجابة اه ، عشان مش كل انزلاق غضروفي علاجه بيكون عملية ، دا غير ان 75% من الناس عندهم انزلاقات غضروفية ومش حاسين بأعراض مشكلة زي دي وعايشين بدون الم . و خلينا نكون متفقين على حاجة ، اننا لما بنحط خطة علاج ، فلازم نكون بنعالج المشكله اللى المريض فعلا بيعانى منها مش المشكلة اللى موجوده فى الاشعه ، يعني الأشعة لوحدها مش كفاية عشان تعرفنا المشكلة اللي عند المريض ، لازم يكون فيه تشخيص كامل ولازم فحص سريري. وبعد ما وصلنا دلوقتي للتشخيص الصحيح هنقدر أننا نبدأ في العلاج واحنا مطمنين ، و تقدروا تعرفوا عن العلاج بشكل مفصل أكثر في مقالات طرق علاج . عالج سبب المك ، وعيش بدون الم.
